4،000 ފްލެޓު ރެޖިސްޓަރީ ކޮށްދޭނީ ކުލިދައްކައި ނިމުމުން: މުއްތަލިބު
4،000 ފްލެޓް ލިބޭ މީހުންނަށް އެތަންތަން މިލްކުކޮށްދޭނީ ފްލެޓަށް ދައްކަންޖެހޭ ކުލި ދައްކައި ނިމުމުން
ހައުސިންގ މިނިސްޓަރު މުއްތަލިބް: ސޯޝަލް ހައުސިން މަޝްރޫއުގެ ދަށުން ސަރުކާރުން ދޫކޮށްފައިވާ ފްލެޓުތަކަށް ގަވާއިދުން ކުލި ނުލިބޭ މައްސަލާގައި ކަންބޮޑުވުން ފާޅުކުރެއްވި
ފަހި ދިރިއުޅުން ކޯޕަރޭޝަނުން ތަރައްގީ ކުރާ 4،000 ފްލެޓު ލިބޭ މީހުންނަށް އެތަންތަން މިލްކުކޮށްދޭނީ ފްލެޓަށް ދައްކަންޖެހޭ ކުލި ދައްކައި ނިމުމުން ކަމަށް ހައުސިން މިނިސްޓަރު ޑރ. އަބްދުﷲ މުއްތޮލިބު ވިދާޅުވެއްޖެ އެވެ.
ދައުލަތުގެ މީޑިއާ ދިވެހިރާއްޖޭގެ އަޑުން ގެނެސްދިން ޕްރޮގްރާމެއްހައި ވާހަކަދައްކަވަމުން މިނިސްޓަރު ވިދާޅުވީ، އެ އުސޫލުން އަމަލު ކުރަން ނިންމީ ސަރުކާރުން ދޫކުރާ ފްލެޓުތަކަށް ކުލި ނުދެއްކުމުގެ މައްސަލަ ބޮޑުވުމުން ކަމަށެވެ.
ސަރުކާރުން ހިންގާ ހައުސިން މަޝްރޫޢުތަކުގައި ދޫކުރާ ހައުސިން ޔުނިޓްތަކަށް، ގިނަ ބަޔަކު ކުލި ނުދައްކާ ދިރިއުޅެމުންދާތީ، އާއްމު ރައްޔިތުންގެ ގިނަ ޝަކުވާތަކެއް ލިބެމުން އަންނަ ކަމަށް މިނިސްޓަރ ވިދާޅުވިއެވެ.
އެގްރިމަންޓްގައި އޮންނަގޮތުން، ހައުސިން ޔުނިޓް މިލްކުވާނީ، ސަރުކާރާއެކު އެއްބަސްވެފައިވާ މުއްދަތަށް، ކަނޑައެޅިފައިވާ އުސޫލުން ކުލި ދައްކާ ފަރާތްތަކަށެވެ. ނަމަވެސް އެކި މަޝްރޫޢުތަކުން ފްލެޓް ލިބި، ދަޢުލަތަށް ލިބެން ޖެހޭ ކުލިން، 700 މިލިޔާން ރުފިޔާއަށްވުރެ ގިނަ ރުފިޔާ ދަޢުލަތަށް ނުލިބި އެބަހުރި ކަން މިނިސްޓަރ ފާހަގަކުރެއްވި އެވެ.
މިހާރު މި ދޫކުރަން އުޅޭ 4،000 ފްލެޓު އަޅުގަނޑުމެން އެގްރިމެންޓު ކުރާނީ މި ދެންނެވި ގޮތަށް 25 އަހަރުގެ މުއްދަތަށް ކަނޑައެޅިފައިވާ ކުއްޔެއް ދެއްކީމާ އެ ފަރާތްތަކަށް އެތަން ރެޖިސްޓްރީ ކޮށްދޭ ގޮތަށްމިނިސްޓަރ އަބްދުﷲ މުއްތަލިބު
މިނިސްޓަރ މުއްޠަލިބް ވިދާޅުވީ، ކުލި ނުދައްކާ މައްސަލައިގެ ސަބަބުން ދަޢުލަތަށް އާމްދަނީއެއް ނުލިބުމަށްވުރެ، އެކަމުގައި މައްސަލަ ކުރިމަތިވަނީ އިތުރަށް ހައުސިން މަޝްރޫޢުތައް ހިންގުމާއި އެހެނިހެން މަޝްރޫޢުތަކަށް ބޭނުންވާ ފައިނޭންސިންއަށް ދަތިވުންކަމަށެވެ.
މިނިސްޓަރ ވިދާޅުވީ ސަރުކާރުން މަޝްރޫޢުތައް ހިންގަން ނަގާ ލޯނުތައް ގަވާއިދުން ދައްކަމުންނުދާނަމަ، އިތުރު މަޝްރޫޢުތަކަށް ލޯނު ހޯދަން ދަތިވާކަމަށެވެ.
މިނިސްޓަރ ވިދާޅުވީ ފްލެޓްތައް ލިބޭ މީހުން އެތަނަށް ދައްކަން ޖެހޭ ކުލި ނުދެއްކުމަކީ ދަޢުލަތަށް އާމްދަނީ ލިބުމުގެ ހުރަހަކަށްވުރެ އެއީ އެއަށްވުރެ މާ ބޮޑު މައްސަލައެއް ކަމަށެވެ.
ސޯޝަލް ހައުސިން ސްކީމްތަކުގެ ދަށުން ސަރުކާރުން ދޫކޮށްފައިވާ ފްލެޓުތަކުގެ ވެރިފަރާތުން ކުލި ނުދެއްކުމުގެ މައްސަލަ ބޮޑުވެފައިވާއިރު، މިނިސްޓަރު ވިދާޅުވިގޮތުގައި އެ މައްސަލަ އަށް ހައްލެއް ލިބެން މި ވަގުތަށް އޮތީ ރައްޔިތުންގެ މަޖިލިހުން މިހާރު ފާސްކުރަން ތައްޔާރުވަމުން އަންނަ ގެދޮވެރިވެރިކަމުގެ ބިލުންނެވެ. އޭރުން ކުލި ނުދައްކާ މީހުން ގޮވައިގެން ކޯޓު މަރުހަލާ އަށް ނުގޮސް އަދި މާ ބޮޑު ދަތިތަކެއް ނެތި ކުލި ހޯދުމުގެ ފުރުސަތު ފަހިވާނެ ކަމަށް އޭނާ ވިދާޅުވި އެވެ.
ގެދޮރުވެރިޔާ ސްކީމްގެ ދަށުން ދޫކުރަން ތައްޔާރުވަމުން އަންނަ 4،000 ފްލެޓާ މެދު އަމަލުކުރަން ނިންމާފައި ވަނީ މުއްތަލިބު ވިދާޅުވި ގޮތުގައި ކުލި ދައްކައި ނިމުމުން މިލްކު ކޮށްދިނުމުގެ އުސޫލެވެ.
ސޯޝަލް ހައުސިން ސްކީމްތަކުގެ ދަށުން ދޫކޮށްފައިވާ ފްލެޓުތަކުގެ ކުލީގެ ގޮތުގައި ނުލިބިވާ ފައިސާގެ އަދަދު 700 މިލިއަން ރުފިޔާ އަށް ވުރެ މަތިކަން ފާހަގަކުރައްވާ މިނިސްޓަރ ވިދާޅުވީ އެޗްޑީސީން މި މަހު ވަނީ ކުލި ނުދައްކާ މީހުންނަށް ނޯޓިސް ފޮނުވަން ފަށައި އެ ކަންކަން ދާއިމީކޮށް މޮނިޓަ ކުރެވޭނެ ނިޒާމެއް ގާއިމްކޮށްފައި ކަމަށެވެ.
މުތައްލިބު ވިދާޅުވީ، ސަރުކާރުން ދޫކުރާ ފްލެޓުތަކަށް ކުލި ނުދެއްކުމަކީ އެތައް ބައެއްގެ ހައްގަށް އަރައިގަތުން ކަމަށާއި އެކަން އެ ގޮތަށް ނުކުރަން އެދިވަޑައިގަންނަވާ ކަމަށެވެ.
އެޗްޑީސީން ބަލަހައްޓާ ހުޅުމާލޭގެ ހައުސިން ޔުނިޓުތަކުގެ ޖުމްލަ އަދަދު 8،511 އަށް އަރާކަމަށް ބުނާއިރު، އޭގެ ތެރެއިން ގަވާއިދުން ކުލި ދައްކަނީ 3،219 ފްލެޓަކުންކަމަށާއި އަދި 5،099 ފްލެޓަކުން ކުލި ނުދައްކާކަމަށް ސަރުކާރުން ބުނެއެވެ.
މިނިސްޓަރު މުއްތަލިބު މި މަހުގެ 19 ވަނަ ދުވަހު ވިދާޅުވެފައި ވަނީ 4،000 ފްލެޓުތަކުގެ މަސައްކަތް ނިމެމުން އަންނަ ވަރަކުން، އަންނަ މަހުން ފަށައިގެން ފްލެޓްތައް ހައްގުވެރިންނަށް ދޫކުރަން ފަށާނެ ކަމަށެވެ.
