ކޮވިޑް-19ށް ފަރުވާ ހޯދަމުންދާ މީހުންގެ ތެރެއިން 10 މީހަކަށް ފަރުވާ ދެމުންދަނީ ވެންޓިލޭޓަރުގެ އެހީގައި

ކޮވިޑް-19ށް ފަރުވާ ހޯދަމުންދާ މީހުންގެ ތެރެއިން 10 މީހަކަށް ފަރުވާ ދެމުންދަނީ ވެންޓިލޭޓަރުގެ އެހީގައި ކަމަށް ހެލްތު އެމަޖެންސެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.

އާދިއްތަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މަބްރޫކް އަޒީޒް ވިދާޅުވީ ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި 9 މީހަކަށް ފަރުވާ ދެމުންދާ ކަމަށެވެ. އޭގެ ތެރެއިން 7 މީހަކަށް ފަރުވާ ދެމުންދަނީ ވެންޓިލޭޓަރުގެ އެހީގައި ކަމަށް މަބްރޫކް ވިދާޅުވިއެވެ.

މަބްރޫކް ވިދާޅުވީ ދަރުމަވަންތަ ހޮސްޕިޓަލްގެ 17 ވަނަ ފަންގިފިލާގައި 8 މީހަކަށް ފަރުވާ ދެމުންދާއިރު، ދަރުމަވަންތަ ހޮސްޕިޓަލްގެ 16 ވަނަ ފަންގިފިލާގައި 6 މީހަކަށް ފަރުވާ ދެމުންދާ ކަމަށެވެ.

މީގެ އިތުރުން މަބްރޫކް ވިދާޅުވީ ހުޅުމާލެ މެޑިކަލް ފެސިލިޓީގައި ޖުމްލަ 193 މީހަކަށް ފަރުވާ ދެމުންދާ ކަމަށެވެ. އޭގެ ތެރެއިން 186 މީހަކަށް ވޯޑުގައި ފަރުވާ ދެމުންދާ ކަމަށާއި، އައިސީޔޫގައި 7 މީހަކަށް ފަރުވާ ދެމުންދާ ކަމަށް މަބްރޫކް ވިދާޅުވިއެވެ. އަދި ވިދާޅުވީ އައިސީޔޫގައި ފަރުވާ ދެމުންދާ މީހުންގެ ތެރެއިން 3 މީހަކަށް ފަރުވާ ދެމުންދަނީ ވެންޓިލޭޓަރުގައި ކަމަށެވެ.

މަބްރޫކް ވިދާޅުވީ ހުޅުމާލެ މެޑިކަލް ހޮސްޕިޓަލްގައި 25 މީހަކު، އައްޑޫ ހޮސްޕިޓަލްގައި އެކަކު، ބ.އޭދަފުށީ ފެސިލިޓީގައި 5 މީހުން، ށ.ފުނަދޫ ފެސިލިޓީގައި 9 މީހުން އަދި ލ.ގަން ފެސިލިޓީގައި 6 މީހަކަށް ފަރުވާ ދެމުންދާ ކަމަށެވެ.

ރާއްޖެއަށް ކުރިމަތިވި ކޮވިޑް-19ގެ ހަތަރު ވަނަ ރާޅާއެކު ކޮންމެ ދުވަހަކު ވެސް ދަނީ ގިނަ ބަޔަކު ޕޮޒިޓިވްވަމުންނެވެ. ކޭސްތައް އިތުރުވުމާއި ގުޅިގެން ބެޑްގެ ކެޕޭސިޓީ ފުލް ވެދާނެކަމުގެ އިންޒާރު އެޗްއީއޯސީން ވަނީ ދީފައެވެ. އެކްޓިވް ކޭސްތަކުގެ އަދަދު 15000ށްވުރެ މައްޗަށް އަރާފައިވާއިރު، ހޮސްޕިޓަލްތަކުގައި ޖުމްލަ 262 މީހަކަށް ދަނީ ފަރުވާ ދެމުންނެވެ.