މިމެއި މަހުގެ 10 ވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންގެންދާ ހަމަލާތަކުގައި މިހާތަނަށް އައިއިރު ކޮންމެ ގަޑިއިރަކުން ތިން ކުޑަކުދިން ޒަޚަމްކޮށްފައިވާކަމަށް އަމިއްލަ ޖަމިއްޔާއެއްކަމުގައިވާ ސޭވް ދަ ޗިލްޑްރަން އިން ބުނެފިއެވެ.

ފާއިތުވި ހަފްތާއެއްހާ ދުވަހުގެތެރޭގައި 58 ކުޑަކުދިން ވަނީ ޝަހީދުވެފައެވެ. މީގެއިތުރުން ޣައްޒާގެ ހާހަކަށްވުރެ ގިނަ މީހުންނަށް އެކިވަރުގެ އަނިޔާތައް ލިބިފައިވާއިރު މީގެތެރޭގައި 366 ކުޑަކުދިން ހިމެނެއެވެ.

ސޭވް ދަ ޗިލްޑްރަންގެ ފަލަސްތީނުގެ ޑިރެކްޓަރ ވަނީ ކުޑަކުދިން ދިރިއުޅެމުންދާ ގެތަކުގެ މައްޗަށް ބޮން އަޅަމުންދާއިރު އެކުދިން ސަލާމަތްވާނީ ކޮންތާކަށްތޯ ސުވާލު އުފައްދަވާފައެވެ.

" އަދި ކިތައް މީހުން އެމީހުން ލޯބިވާ އާއިލާއާ ވަކިވީމަތޯ ބައިނަލްއަގްވާމީ ފަރާތްތަކުން މިކަމާ ދެކޮޅަށް ކަމެއްކުރާނީ؟" ޖޭސަން ލީ ވިދާޅުވިއެވެ.

މިހާތަނަށް ރިކޯޑްކުރެވިފައިވާ ތަފާސްހިސާބުތަކަށް ބަލާއިރު 2000 ވަނަ އަހަރުން ފެށިގެން މި އަހަރުގެ މިހާތަނަށް ފަލަސްތީނުގެ 3090 ކުޑަކުއްޖަކު ވަނީ އިސްރާއީލުން ދެމުންގެންދާ ލާއިންސާނީ ހަމަލާތަކުގައި ޝަހީދުވެފައެވެ.

ހޯމަ ދުވަސް ފެށުމާއެކު އިސްރާއީލުން ވަނީ އަނެއްކާވެސް ޣައްޒާއަށް ވައިގެ މަގުން ހަމަލާތައް ދޭންފަށާފައެވެ. ކުރިއަށްވުރެ ބާރުގަދަކޮށް ދޭ މިހަމަލާތަކުގައި އާދިއްތަ ދުވަހު ވަނީ ފަލަސްތީނުގެ 42 މީހަކު ޝަހީދުވެފައެވެ.

މިހާތަނަށް އައިއިރު މިހަމަލާތަކުގައި 192 މީހުން ޝަހީދުވެފައިވާއިރު މީގެތެރޭގައި 58 ކުޑަކުދިންނާއި 34 އަންހެނުން ހިމެނެއެވެ.

އިސްރާއީލުން ދެމުންދާ ހަމަލާތަކަށް ބަދަލު ހިފުމުގެ ގޮތުން ހަމާސް އިން ފޮނުވާލި ރޮކެޓް ހަމަލާތަކެއްގައި އިސްރާއީލްގެ 10 މީހަކު ވަނީ މަރުވެފައެވެ. އޭގެތެރޭގައި ދެ ކުޑަކުދިން ހިމެނެއެވެ.

އދ.ގެ ސެކިޔުރިޓީ ކައުންސިލުން ވަނީ އާދިއްތަ ދުވަހު ބައްދަލުވުމެއް ބާއްވާފައެވެ. ނަމަވެސް ގުޅިފައިވާ ބަޔާނެއް ނެރުމަށް ވަނީ ނުކުޅެދިފައެވެ. ޗައިނާއިން ބުނާގޮތުގައި ކައުންސިލަށް އެއް އަޑެއްގެ ގޮތުގައި ވާހަކަ ނުދެއްކެނީ އެމެރިކާގެ ސަބަބުންނެވެ.