ކޮވިޑް-19 އަށް ޓެސްޓުކުރުމަށްފަހު ނަތީޖާ ލިބުން ލަސްވުމުގެ ޝަކުވާ އިތުރުވުމާ ގުޅިގެން އެކަން ހައްލުކުރުމުގެ ގޮތުން، ސާމްޕަލްތަކުގެ ނަތީޖާ ހެލްތު ޕްރޮޓެކްޝަން އެޖެންސީ (އެޗްޕީއޭ) އަށް ލިބުނުހާ އަވަހަކަށް އެސްއެމްއެސް އެއް މެދުވެރިކޮށް އަންގަން ނިންމާފައިވާ ކަމަށް ރައީސް އޮފީހުގެ ތަރުޖަމާން މަބްރޫކް އަޒީޒް ވިދާޅުވެއްޖެއެވެ.

ހެލްތު އެމަޖެންސީ އޮޕަރޭޝަން ސެންޓަރުން ކުރިއަށްގެންދިޔަ ނޫސްވެރިންގެ ބައްދަލުވުމުގައި ވާހަކަދައްކަމުން މަބްރޫކް ވަނީ ބައެއް ފަރާތްތަކުން ކޮވިޑަށް ޓެސްޓުކޮށް، ބައްޔަށް ޕޮޒިޓިވްވާކަން އެނގެނީ އެތައް ދުވަހެއް ފަހުން ކަމަށާއި، އެކަމުގެ ޝަކުވާ އިތުރުވުމާ ގުޅިގެން މިމަައްސަލަ ހައްލުކުރުމުގެ މަސައްކަތް ފެށިފައިވާ ކަމަށް ވިދާޅުވެފައެވެ. މިގޮތަށް ނަތީޖާ އެންގުން ލަސްވެގެން ދިޔައީ ގިނަ އަދަދެއްގެ ސާމްޕަލްތައް ޓެސްޓުނުކުރެވި ބެކްލޮގްވުމުގެ ސަބަބުންނާއި އެޗްޕީއޭއަށް ނަތީޖާ ލިބުމުން ޕޮޒިޓިވްވާ މީހުންނަށް ގުޅައި އެކަން އެންގުމުގައި ލަސްތަކެއް އުޅުމުން ކަމަށް މަބްރޫކް ވިދާޅުވިއެވެ.

މީގެ ކުރިން ޓެސްޓުތަކުގެ ނަތީޖާ ލިބުމުން ނެގެޓިވްވާ މީހުންނަށް އެސްއެމްއެސް މެދުވެރިކޮށް އެކަން އަންގާ ކަމަށާއި އަދި ޕޮޒިޓިވްވާ މީހުންނަށް ވަކިވަކިން ގުޅައި އެކަން އަންގަމުން ދިޔަ ކަމަށް މަބްރޫކް ފާހަގަކުރިއެވެ. ނަމަވެސް މިގޮތަށް މީހުންނަށް ވަކިވަކިން ގުޅާއިރު، ޕޮޒިޓިވްވާ މީހުންނަށް އެކަން އެންގޭލެއް ލަސްވާކަމަށް މަބްރޫކް ވިދާޅުވިއެވެ. މިކަން ހައްލުކުރުމަށް މި ހޯމަ ދުވަހުން ފެށިގެން ސާމްޕަލްގެ ނަތީޖާ އެޗްޕީއޭއަށް ލިބުނުހާ އަވަހަށް އެސްއެމްއެސް މެދުވެރިކޮށް އެންގޭނެ ކަމަށާއި، ނެގެޓިވްވި މީހުންގެ އިތުރުން ޕޮޒިޓިވްވާ މީހުންނަށްވެސް މި އެސްއެމްއެސް ލިބޭނެ ކަމަށް މަބްރޫކް ވިދާޅުވިއެވެ.

މިގޮތަށް ފޮނުވޭ އެސްއެމްއެސް ގައި ހިމެނޭ ލިންކް މެދުވެރިކޮށް ކޮންމެ މީހަކަށްވެސް އެމީހެއްގެ ސާމްޕަލްގެ ނަތީޖާ ބަލާލެވޭނެ ކަމަށް މަބްރޫކް ވިދާޅުވިއެވެ. އަދި މިގޮތަށް ޕޮޒިޓިވްވާ މީހުންނަށް އެކަން އެންގި ނަމަވެސް، އެޗްޕީއޭ އިން ވަކިން ގުޅާނެ ކަމަށްވެސް މަބްރޫކް ވިދާޅުވިއެވެ. އަދި މިގޮތަށް ނިންމީ ވީހާވެސް އަވަހަށް ނަތީޖާތައް ފޮނުވަން ކަމަށް މަބްރޫކް ވިދާޅުވިއެވެ. އަދި ޑައިރެކްޓް ކޮންޓެކްޓްވާ މީހުންގެ ތެރެއިން ގެއަށްގޮސް ސާމްޕަލް ނަގާނީ ހަމައެކަނި ހާއްސައެހީއަށް ބޭނުންވާ މީހުންނާއި މާބަނޑުމީހުންގެ އިތުރުން 65 އަހަރުން މަތީގެ މީހުންނާއި އެއް އަހަރުން ދަށުގެ ކުދިންގެ ކަމަށް މަބްރޫކް ވަނީ ފާހަގަކޮށްފައެވެ.

މީގެ އިތުރުން ހެލްތު މިނިސްޓްރީގެ ކޮވިޑް-19 ޑޭޝްބޯޑް އަޕްޑޭޓް ވުމުގައި ލަސްވާ ޝަކުވާ ލިބުމާ އެކު އެކަން ހައްލުކުރުމަށް ކުރެވުނު މަސައްކަތުގެ ދަށުން ކޮންމެ ދުވަހެއްގެ މެންދުރު 2:00ގެ ކުރިން ޑޭޝްބޯޑް އަޕްޑޭޓްކުރަން މިހާރު ނިންމާފައިވާ ކަމަށް މަބްރޫކް ވިދާޅުވިއެވެ. އަދި ކޮވިޑް-19 އާއި އެހެނިހެން އާންމު ބަލިތަކުގައި ރެޕިޑް ރެސްޕޮންސް ޓީމުން ރެސްޕޮންޑް ވުމުގައި ލަސްތަކެއް ހުރުމުން އެކަން ހައްލުކުރުމުގެ މަސައްކަތްކުރެވިގެން ދިޔަ ކަމަށާއި އޭގެ ނަތީޖާއެއްގެ ގޮތުން ދުވާލެއްގެ މައްޗަށް އެޓެންޑު ނުވެ ދޫކޮށްލެވޭ 200 އެއްހާ ކޭސް މިހާރު 25ށް ދަށްކުރެވިފައިވާ ކަމަށް މަބްރޫކް ވިދާޅުވިއެވެ.

މަބްރޫކް ވަނީ މިގޮތަށް ދިމާވާ މައްސަލަތަކާއި ގޮންޖެހުންތައް ހައްލުކުރުމަށް 24 ގަޑިއިރު، ކަމާގުޅޭ އިދާރާތަކުން މަސައްކަތްކުރަމުންދާ ކަމަށް ވިދާޅުވެފައެވެ.