ރާއްޖޭގައި ކޮވިޑް-19 އަށް ފަރުވާހޯދަމުންދާ ކުޑަކުދިންގެ އަދަދު 3000ށް ވުރެ ގިނަ ކަމަށް ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.

އާދިއްތަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އާންމުކޮށްފައިވާ އެންމެ ފަހުގެ މައުލޫމާތުތައް ދައްކާގޮތުން 18 އަހަރުން ދަށުގެ 3012 ކުދިން ދަނީ ކޮވިޑަށް ފަރުވާހޯދަމުންނެވެ. ރައީސް އޮފީހުގެ ތަރުޖަމާން މަބްރޫކް އަޒީޒް ހާމަކުރެއްވި ތަފާސްހިސާބުތައް ދައްކާގޮތުން 10 އަހަރުން ދަށުގެ 1563 ކުދިން މިވަގުތު ދަނީ ކޮވިޑަށް ފަރުވާހޯދަމުންނެވެ. އަދި 18 އަހަރާއި 10 އަހަރާ ދެމެދުގެ 1449 ކުދިން ދަނީ މި ބައްޔަށް ފަރުވާހޯދަމުންނެވެ.

މަބްރޫކް ހާމަކުރެއްވި ތަފާސްހިސާބުތައް ދައްކާގޮތުން މިވަގުތު އެންމެ ގިނަ އަދަދެއްގެ ބަޔަކު ބައްޔަށް ފަރުވާހޯދަމުންދަނީ އުމުރުން 18 އަހަރާއި 39 އަހަރާ ދެމެދުގެ އުމުރުފުރާއިންނެވެ. މި އުމުރުފުރާއިން 7495 މީހުން ދަނީ ކޮވިޑަށް ފަރުވާހޯދަމުންނެވެ. އުމުރުން 40 އަހަރާއި 59 އަހަރާ ދެމެދުގެ 3185 މީހުން ކޮވިޑަށް ފަރުވާހޯދަމުންދާއިރު، 60 އަހަރުން މަތީގެ 927 މީހުން ބައްޔަށް ފަރުވާހޯދަމުންދާ ކަމަށް މަބްރޫކްވިދާޅުވިއެވެ. އަދި ކޮވިޑަށް ޕޮޒިޓިވްވެ ފަރުވާދެމުންދާ މީހުންގެ ތެރޭގައި އުމުރުފުރާ ނޭނގޭ 284 މީހުން އެބަ ތިބިކަމަށާއި އޭގެތޭރޭގައި ރާއްޖޭގައި މަސައްކަތްކުރާ ބިދޭސީން ހިމެނޭކަމަށް މަބްރޫކް ފާހަގަކުރެއްވިއެވެ.

ރާއްޖޭގައި 15،956 މީހުން ކޮވިޑަށް ފަރުވާ ހޯދަމުންދާއިރު، ހޮސްޕިޓަލްގައި އެޑްމިޓްކޮށްގެން 259 މީހުންނަށް ދަނީ ފަރުވާދެމުންނެވެ. އެގޮތުން ދަރުމަވަންތަ ހޮސްޕިޓަލްގެ އެކި ފަންގިފިލާތަކުގައި 12 މީހުންނަށް ފަރުވާދެމުންދާއިރު، ހުޅުމާލެ މެޑިކަލް ފެސިލިޓީގެ ވޯޑް އަދި އައިސީޔޫގައި ޖުމްލަ 192 މީހުންނަށް ދަނީ ފަރުވާދެމުންނެވެ. މީގެ އިތުރުން ހުޅުމާލެ މެޑިކަލް ހޮސްޕިޓަލްގައި 25 މީހުން، އައްޑޫ ކޮވިޑް ފެސިލިޓީގައި އެކަކަށް ދަނީ ފަރުވާދެމުންނެވެ. ބ. އޭދަފުށި ކޮވިޑް ފެސިލިޓީގައި ފަސް މީހުން، ފުނަދޫ ފެސިލިޓީގައި ނުވަ މީހުން އަދި ލ. ގަމު ކޮވިޑް ފެސިލިޓީގައި ހަ މީހަކަށް ދަނީ ފަރުވާދެމުންނެވެ.

އެޗްއީއޯސީން ހާމަކުރި މައުލޫމާތުތައް ދައްކާގޮތުން 15،956 އެކްޓިވް ކޭސްގެ ތެރެއިން 12،011 މީހުންނަކީ ދިވެހިންނެވެ. އަދި ބަންގްލަދޭޝްގެ 1371 މީހުން ހިމެނޭއިރު، އިންޑިއާގެ 893 މީހުން، ލަންކާގެ 205 މީހުން އަދި ނޭޕާލްގެ 174 މީހުން ދަނީ މިވަގުތު ރާއްޖޭގައި ކޮވިޑަށް ފަރުވާހޯދަމުންނެވެ. މީގެ އިތުރުން އެހެނިހެން ގައުމުތަކަށް ނިސްބަތްވާ 1302 މީހުން ދަނީ ކޮވިޑަށް ޕޮޒިޓިވްވެ ފަރުވާހޯދަމުންނެވެ.

ރާއްޖޭގައި ކޮވިޑް ޖެހުނު 100 މީހުން މިހާރު ނިޔާވެފައިވާއިރު، 99 ވަނަ މަރު ރިޕޯޓްކޮށްފައި ވަނީ 98 ވަނަ މަރު ރިޕޯޓްކުރިތާ ދެ ގަޑިއިރު ވެސް ނުވަނީހެއެވެ. މީގެ ކުރިން ރާއްޖޭގެ ކޮވިޑް-19ގެ ހާލަތު ގޯސްނުވާވަރަށް ހާލަތު ގޯސްވެ، މުޅި ގައުމަށް ބަލިފެތުރިފައިވާއިރު، ފާއިތުވި ދުވަސްތަކުގައި ކޮންމެ ދުވަހަކުވެސް ހާހަކަށްވުރެ ގިނަ މީހުން ދިޔައީ ބައްޔަށް ޕޮޒިޓިވްވަމުންނެވެ. އާދިއްތަ ދުވަހު 741 ކޭސް ރިޕޯޓްކުރެވުނު ނަމަވެސް ޓެސްޓުކޮށްފައި ވަނީ 2881 ސާމްޕަލްއެވެ. އެހެން ކަމުން ޕޮޒިޓިވްވާ މީހުންގެ އަދަދު ނިސްބަތުން މާބޮޑުތަން ދަށްވެފައެއް ނުވެއެވެ.