ގާޒާގެ ރެފިއުޖީ ކޭމްޕަކަށް އިސްރާއީލުން ބޮން އަޅައި އަށް ކުޑަކުދިން ހިމެނޭހެން އެއް އާއިލާއެއްގެ 10 މެންބަރުން ޝަހީދުކޮށްލައިފިއެވެ.
އެ އާއިލާއިން ޝަހީދުވެފައިވަނީ އަށް ކުދިންނާއި ދެ އަންހެނުންނެވެ. އިޒްރޭލުން ބޮން އަޅާފައިވަނީ ޝާތީ ރެފިއުޖީ ކޭމްޕަށެވެ.
މިދިޔަ ހޯމަ ދުވަހުން ފެށިގެން މެދުކެނޑުމެއް ނެތި އިޒްރޭލުން ގާޒާއަށް ބޮން އަޅަމުން ދާތީ ޝަހީދުވީ މީހުންގެ ޖުމްލަ އަދަދު ވަނީ 188 އަށް އަރާފަ އެވެ. އޭގެ ތެރޭގައި 47 ކުޑަކުދިން ހިމެނެއެވެ.
އާދީއްތަ ދުވަހުގެ ހެނދުނު ދިން ހަމަލާއާ ގުޅިގެން އަބޫ ހަތާބް އާއިލާ ރެފިއުޖީ ކޭމްޕުގައި ދިރިއުޅެމުން ދިޔަ ޖިފުޓި ބިމާ ހަމަވިއެވެ. އެ ތަނުގެ އަޑީގައި އިތުރު މީހުންގެ މަރުވެފައިވާ ހަށިތައް ފޮރުވިފައިވުން އެކަށީގެންވާ ކަމަށް ރިޕޯޓުތައް ބުނެއެވެ. ރެފިއުޖީ ކޭމްޕަށް ދިން ހަމަލާގައި މަދުވެގެން 15 މީހުން ޒަޚަމްވި ކަމަށްވެސް ރިޕޯޓުތައް ބުނެއެވެ.
އަލްޝިފާ ހޮސްޕިޓަލުގެ ޑރ. ނަބީލް އަބޫ އަލްރީޝް ވިދާޅުވީ މިއީ ގަތުލުއާއްމެއް ކަމަށެވެ. ހޮސްޕިޓަލް ފުރިފައިވާ ކަަމަށާއި ހޮސްޕިޓަލްގެ ރިސެޕްޝަނުގައިވެސް ފަރުވާ ދެމުން އަންނަ ކަމަށް އޭނާ ވިދަޅުވިއެވެ.
ރެފިއުޖީކޭމްޕަށް ބޮން އަޅާފައިވަނީ އިންޒާރު ދިނުމެއްވެސް ނެތިއެވެ. އަޑު އިވިގެން ގޮސް ބެލިއިރު، ހަތަރު ބުރީގެ އިމާރާތް ބިމާ ހަމަވެފައިވާ މަންޒަރު ފެނުނު ކަމަށް ނޫސްތަކުން ރިޕޯޓުކޮށްފައިވެއެވެ. އދ. އިން ބުނެފައިވާ ގޮތުގައި ޝާތީ ރެއިފުޖީ ކޭމްޕަކީ ގާޒާގައި ތިން ވަނައަށް އެންމެ ބޮޑު ރެފިއުޖީ ކޭމްޕެވެ. އެތަނުގައި 85،000 މީހުން ދިރިއުޅެއެވެ.
އިޒްރޭލުން ބުނެފައިވަނީ ބޮން އަޅަނީ އާއްމުންނަށް އަމާޒުކޮށްގެން ނޫން ކަމަށާއި ގާޒާގައި ވެރިކަން ކުރާ ހަމާސްގެ މެމްބަރުންނަށް އަމާޒުކޮށް ކަމަށެވެ. އެކަމަކު ގާޒާގައި މީހުން ދިރިއުޅޭ އިމާރާތްތަކަށް އަމާޒުކޮށް އިޒްރޭލުން އަންނަނީ ތަކުރާރުކޮށް ހަމަލާ ދެމުންނެވެ.
ރެފިއުޖީ ކޭމްޕަށް ދިން ހަމަލާގެ ރައްދުގައި ހަމާސްއިން ރޮކެޓު ހަމަލާތައް ފޮނުވީ އިޒްރޭލުގެ އަޝްކެލޯން އަދި އަޝްދޯދް އަވަށަށެވެ. އެއްވެސް މީހަކު މަރުވި ކަމަށް ރިޕޯޓުކޮށްފައެއް ނުވެއެވެ.
