އޮގަނައިޒޭޝަން އޮފް އިސްލާމިކް ސަމިޓް (އޯއައިސީ) ގެ ބައްދަލުވުމުގައި ފަލަސްތީނުގެ އަޑު އިއްވައިދެއްވާނެ ކަމަށް ޚާރިޖީ ވަޒީރު އަބްދުﷲ ޝާހިދު ވިދާޅުވެއްޖެއެވެ.
ޤައުމުތަކުގެ ޚާރިޖީ ވަޒީރުންނާއެކު އޯއައިސީން ވާރޗުއަލްކޮށް ބާއްވާ ބައްދަލުވުން އާދިއްތަ ދުވަހު މެންދުރު ފެށުމަށް ހަމަޖެހިފައިވާއިރު، މި ބައްދަލުވުމުގައި އިޒްރޭލުން ފަލަސްތީނަށް އަމާޒުކޮށް ދެމުންގެންދާ އުދުވާނީ ޙަމަލާތަކާ ގުޅޭގޮތުން މަޝްވަރާ ކުރުމަށް ވަނީ ނިންމާފައެވެ. ޚާއްސަކޮށް ޤުދުސްއާއި، އަލް އަޤްޞާ މިސްކިތަށް އަމާޒުކޮށް ދެމުންގެންދާ ޙަމަލާތަކާ ގުޅޭގޮތުން ވެސް މަޝްވަރާ ކުރުމަށް ވަނީ ނިންމާފައެވެ.
މި ބައްދަލުވުމުގައި ރާއްޖެ ތަމްސީލު ކުރައްވާ ޚާރިޖީ ވަޒީރު އަބްދުﷲ ޝާހިދު ބައިވެރިވެވަޑައިގަތުމަށް ނިންމަވާފައިވާއިރު، ރާއްޖެއިން އެ ޤައުމުގެ ރައްޔިތުންނާއެކު އޮތް ކަން މިނިސްޓަރ ކުރެއްވި ޓްވީޓެއްގައި ވަނީ ފާހަގަކުރައްވާފައެވެ. މިނިސްޓަރ ވިދާޅުވީ، މި ބައްދަލުވުމުގައި ފަލަސްތީނުގެ އަޑު އިއްވަވައި ދެއްވާނެ ކަމަށާއި، އެ ޤައުމަށް ދެމުންގެންދާ ޙަމަލާތައް ހަރުކަށި އިބާރާތުން ކުށްވެރި ކުރައްވާނެ ކަމަށެވެ.
މެއި މަހުގެ 10 ވަނަ ދުވަހުން ފެށިގެން އިސްރާއީލުން މެދުކެނޑުމެއްނެތި ދެމުން ގެންދާ ހަމަލާތަކުގައި ފަލަސްތީނުގެ އެތައް ރައްޔިތުންނެއް ދަނީ ޝަހީދުވަމުންނެވެ. ހަމަލާތައް ދިނުން ވަގުތުން ހުއްޓާލުމަށް އދ. ގެ ސެކެޓްރީ ޖެނެރަލް އެންތޯނިއޯ ގުޓަރޭސް ހިމެނިވަޑައިގަންނަވާ ގޮތަށް ބައިނަލްއަގްވާމީ މުޖުތަމައުތަކުން ދަނީ ގޮވާލަމުންނެވެ. ނަމަވެސް އިސްރާއީލްގެ ބޮޑު ވަޒީރު ބެންޔަމިން ނަތަންޔާހޫ ވިދާޅުވެފައިވަނީ އިސްރާއީލަށް ސުލްހަ ގެނައުމަށްޓަކައި ހަމަލާތައް ކުރިޔަށް ގެންދަންޖެހޭކަމަށެވެ.
