ފަންސާހެއްހާ މާބަނޑު މީހުން ޕޮޒިޓިވްވެ ފަރުވާ ދެނީ، އެކަކު ވެންޓިލޭޓަރުގައި

ކޮވިޑް-19ށް ފަންސާހެއްހާ މާބަނޑު މީހުން ޕޮޒިޓިވްވެ ފަރުވާ ދެމުންދާ ކަމަށާއި، އެކަކުގެ ހާލު ސިރިއަސް ކަމަށް އައިޖީއެމްއެޗްގެ ޑރ. މުހައްމަދު އަލީ ވިދާޅުވެއްޖެއެވެ.

ކޮވިޑް-19ގެ މަސައްކަތުގައި އިސް ސަފުގައި ހަރަކާތްތެރިވަމުންދާ ޑރ. މުހައްމަދު ވިދާޅުވީ ކޮވިޑް-19ގެ ހާލަތު ގޯސްވެފައިވާ މިދަނޑިވަޅުގައި ބައްޔަށް ޕޮޒިޓިވްވެގެން ގާތްގަނޑަކަށް 50 މާބަނޑު އަންހެނުންނަށް ފަރުވާ ދެމުން އަންނަ ކަމަށެވެ. އޭގެ ތެރެއިން އެކަކު އޮތީ ވެންޓިލޭޓަރުގައި ކަމަށް ވެސް ޑރ. މުހައްމަދު ވިދާޅުވިއެވެ.

މާބަނޑު މީހުންނަކީ ހައިރިސްކް މީހުންނަށްވާތީ، އެމީހުންނަށް ޚާއްސަ ގޮތެއްގައި ސަމާލުވުމަށް ހެލްތު އެމަޖެންސެންސީ އޮޕަރޭޝަން ސެންޓަރ (އެޗްއީއޯސީ)ގެ ޑޮކްޓަރުންގެ ޓީމުން އިލްތިމާސްކޮށްފައިވެއެވެ. ކޮވިޑް-19ން ރައްކާތެރިވުމަށް މާބަނޑު މީހުންނަށް ދެމުން އަންނަނީ ފައިޒާ ވެކްސިނެވެ.

ރާއްޖެއަށް ކުރިމަތިވި ކޮވިޑް-19ގެ ހަތަރު ވަނަ ރާޅާއެކު ކޮންމެ ދުވަހަކު ވެސް ދަނީ ގިނަ ބަޔަކު ޕޮޒިޓިވްވަމުންނެވެ. މާބަނޑު މީހުންނާއި، ކުޑަ ކުދިން ގިނަ އަދަދަކަށް ޕޮޒިޓިވްވަމުންދާތީ މީގެ ކުރިން ވެސް އެޗްއީއޯސީން ވަނީ ކަންބޮޑުވުންފާޅު ކޮށްފައެވެ.

ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އެންމެ ފަހުން އާންމުކުރި ތަފާސް ހިސާބުތައް ދައްކާ ގޮތުން ފާއިތުވެދިޔަ 24 ގަޑިއިރުގެ ތެރޭގައި ރާއްޖެއިން ކޮވިޑަށް ޓެސްޓު ކޮށްފައިވަނީ 3،159 މީހުންނެވެ. މިއީ މިފަހުން ކޮވިޑަށް އެންމެ މަދުން މީހުން ޓެސްޓު ކުރި ދުވަސް ވެސްމެއެވެ. ޓެސްޓުކުރި މީހުންގެ ތެރެއިން 1،007 މީހުން ކޮވިޑަށް ޕޮޒިޓިވްވެފައިވާއިރު، އެއީ މާލެ ސަރަހައްދުން ޕޮޒިޓިވްވި 793 މީހުންނާއި، އަތޮޅު ތެރެއިން ޕޮޒިޓިވްވި 183 މީހުންގެ އިތުރުން ރިސޯޓުތަކުން ޕޮޒިޓިވްވި 26 މީހުންނެވެ.

އިތުރު 1،007 މީހުން ކޮވިޑަށް ޕޮޒިޓިވްވުމާއެކު، ރާއްޖެއިން މި ބައްޔަށް ޕޮޒިޓިވްވި މީހުންގެ އަދަދު ވަނީ 43،782ށް އަރައިފައެވެ. އަދި އެކްޓިވް ކޭސްތަކުގެ ގޮތުގައި 15،666 މީހުން ތިބިއިރު، 260 މީހުންނަށް ފަރުވާ ދެމުން އަންނަނީ ހޮސްޕިޓަލުގައި އެޑްމިޓްކޮށްގެންނެވެ. ރާއްޖެއިން މިހާތަނަށް 28،013 މީހުން ބަލިން ފަސޭހަވެފައިވާއިރު، 94 މީހުން ވަނީ ނިޔާވެފައެވެ.