މުލާގެ ރިކޯޑާ ލެވަންޑޯސްކީ ހަމަކުރި މެޗުން ބަޔާން އެއްވަރު

ލީގު ސީޒަނެއްގައި 40 ލަނޑު ޖަަހައިގެން ކުރީގެ އެއްވަަނަ ފޯވާޑް ގާޑް މުލާ ހަދާފައިވާ ރިކޯޑާ ބަޔާން މިއުނިކަށް ކުޅެމުން އަންނަ ޕޮލެންޑުގެ ތަރި ރޮބަޓް ލެވަންޑޯސްކީ އެއްވަރުކޮށްފިއެވެ.

މުލާގެ ރިކޯޑާ ލެވަންޑޯސްކީ އެއްވަރުކުރީ ޖަރުމަން ލީގުގައި ހޮނިހިރު ދުވަހުގެރޭ ފްރެއިބާގާ 2-2 ގެ ނަތީޖާއަކުން ބަޔާން އެއްވަރުވި މެޗުގައެވެ.

ރަށުން ބޭރުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ބަޔާނުންނެވެ. މެޗުގެ 26 ވަނަ މިނެޓުގައި ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ލެވަންޑޯސްކީއެވެ. މި ލަނޑާއެކު މުލާގެ ރިކޯޑާ ލެވަންޑޯސްކީ އެއްވަރުކުރިއިރު، މުލާ މި ރިކޯޑު ހަދާފައިވަނީ މީގެ 49 އަހަރު ކުރިން 1972 ވަނަ އަހަރުއެވެ. މި ފަހަރުގެ ލީގުގައި 28 މެޗުން ލެވަންޑޯސްކީ 40 ލަނޑު ޖެހިއިރު، އަނިޔާގެ ސަބަބުން އޭނާއަށް ބައެއް މެޗުތައް ގެއްލުނެވެ. އެކަމަކު މުލާގެ ރިކޯޑު މުގުރާލަން ލެވަންޑޯސްކީއަށް ބާކީ މެޗެއް އެބައޮތެވެ.

ހޮނިހިރު ދުވަހުގެރޭ ކުޅުނު މެޗުގައި ލެވަންޑޯސްކީ ބަޔާނަށް ލިޑު ނަގައިދިން ނަމަވެސް، އޭގެ ތިން މިނެޓު ފަހުން ފްރެއިބާގުން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ކާމިޔާބުކޮށްދިނީ މެނުއަލް ގޫލްޑާއެވެ. އަދި މެޗުގެ ދެވަނަ ހާފް ފަށައިގެން އަށްވަނަ މިނެޓުގައި ލެރޯއި ސާނޭ ބަޔާނަށް އަލުން ލީޑު ނަގައިދިން ނަމަވެސް، މެޗު ނިމެން ނުވަ މިނެޓަށް ވެފައި ވަނިކޮށް ކްރިސްޓިއަން ގަންޓާ ވަނީ އަލުން ފްރެއިބާގަށް ނަތީޖާ އެއްވަރުކޮށްދީފައެވެ.

މި މެޗުން ބަޔާން އެއްވަރުވި ނަމަވެސް، މިދިޔަ ހަފުތާގައި އެ ޓީމުން ވަނީ ލީގު ޗެމްޕިއަންކަން ކަށަވަރުކޮށްފައެވެ. ތާވަލުގެ އެއްވަނައިގައި އޮތް ބަޔާނަށް ކުޅުނު 33 މެޗުން 75 ޕޮއިންޓް ލިބިފައިވާއިރު، ދެވަނައިގައި އޮތް އާރްބީ ލައިޕްޒީގަށް 32 މެޗުން ލިބިފައިވަނީ 64 ޕޮއިންޓެވެ. އަދި ތިންވަނައިގައި އޮތް ވުލްފްސްބާގަށް 32 މެޗުން 60 ޕޮއިންޓް ލިބިފައިވާއިރު، ހަތަރުވަނައިގައި އޮތް ޑޯޓްމަންޑަށް 32 މެޗުން ލިބިފައިވަނީ 58 ޕޮއިންޓެވެ.