އިސްރާއީލުގެ ސިފައިންގެ އެންމެ އިސްވެރިޔާ، ލެފްޓިނަންޓް ޖެނެރަލް ހެރްޒީ ހަލޭވީ، 2023 ވަނަ އަހަރުގެ އޮކްޓޯބަރު 7 ވަނަ ދުވަހު ފަލަސްތީނުގެ ހަމާސް އިން ދިން ހަމަލާގައި އަސްކަރިއްޔާ "ފެއިލްވުމުގެ" ޒިންމާ އޭނާ އުފުލާ ކަމަށް ބުނެ އަންގާރަ ދުވަހު އިސްތިއުފާދީފިއެވެ.

ސިފައިންގެ ފަރާތުން އާންމު ކޮށްފައިވާ އޭނާގެ އިސްތިއުފާގެ ސިޓީގައި ހަލޭވީ ބުނެފައިވަނީ "އޮކްޓޯބަރު 7 ގައި (ސިފައިން) ފެއިލްވުމުގެ ޒިންމާ ނަގަން ޖެހޭނެ ކަމަށް ޤަބޫލުކުރާތީ" އިސްތިއުފާ ދިނީ ކަމަށެވެ.

އޭނާގެ ސިޓީގައި އިސްރާއީލުގެ ސިފައިންނަށް "ފާހަގަކޮށްލެވޭ ކާމިޔާބީތަކެއް" ލިބިފައިވާ ވަގުތެއްގައި އިސްތިއުފާ ދޭން ނިންމި ކަމަށް ފާހަގަ ކުރަމުން، އެހެން ނަމަވެސް އިސްރާއީލުން ކަނޑައެޅި ހަނގުރާމައިގެ ހުރިހާ ލަނޑުދަނޑިތައް ހާސިލުވެފައި ނުވާކަން ވެސް ވަނީ ފާހަގަ ކޮށްފައެވެ.

"ހަނގުރާމައިގެ ހުރިހާ ލަނޑުދަނޑިތައް ހާސިލުވެފައެއް ނުވޭ. ސިފައިންގެ އޮޕަރޭޝަން ކުރިއަށް ގެންދާނީ ހަމާސް އާއި ހަމާސް ގެ ވެރިކަމުގެ ޤާބިލުކަން އިތުރަށް ނައްތާލުމަށާއި، ރަހީނުން އަނބުރާ ގެނައުން ކަށަވަރު ކުރުމަށް" ކަމަށް އޭނާގެ އިސްތިއުފާގެ ސިޓީގައި ވެއެވެ.

ޣައްޒާ އަށް ޒިންމާވާ އިސްރާއީލުގެ ދެކުނު ސަރަޙައްދުގެ ސިފައިންގެ ވެރިޔާ، މޭޖަރ ޖެނެރަލް ޔަރޯން ފިންކެލްމަން ވެސް ވަނީ އިސްތިއުފާ ދީފައެވެ.

އިސްރާއީލުގެ އަސްކަރިއްޔާގެ އިސް ދެ އޮފިޝަލަކު އިސްތިއުފާ ދީފައި މިވަނީ އިސްރާއީލުގެ ތާރީޚުގައި އެގައުމަށް ދިން އެންމެ ނުރައްކާތެރި ހަމަލާ އިން ފެށުނު ހަނގުރާމައަށް 15 މަސްދުސް ވީ ފަހުން އެ ހަނގުރާމަ ހުއްޓުމަކަށް ގެނައުމަށް ހަމާސް އާ އެކު ހެދި އެއްބަސްވުން ތަންފީޒު ކުރަން ފެށިތާ ދެތިން ދުވަހުގެ ތެރޭގައެވެ.

ހަލޭވީ ނިންމާފައިވަނީ މާރިޗު 6 ގައި މަޤާމުން ވަކިވުމަށެވެ. "އެހާތަނަށް، އޮކްޓޯބަރު 7 ގެ ހާދިސާތަކުގެ ތަޙުޤީޤުތައް ނިންމައި (ސިފައިންގެ) އިންތިޒާމުތައް ވަރުގަދަކުރާނަން" ކަމަށް ބުނެފައިވެއެވެ.

2023 ވަނަ އަހަރުގެ އޮކްޓޯބަރު 7 ވަނަ ދުވަހު އެތައް ހާސް ފަލަސްތީނުގެ ހަނގުރާމަވެރިން ޣައްޒާގެ ދެކުނުން އިސްރާއީލަށް ވަދެ، 1,200 މީހުން މަރާލައި، 250 އަށްވުރެ ގިނަ މީހުން ރަހީނުންގެ ގޮތުގައި ވަނީ ގެންގޮސްފައެވެ.

އޭގެ ފަހުން، ޣައްޒާ އަށް އިސްރާއީލުން ދިން ހަމަލާތަކުގައި މެޑިކަލް އޮފިޝަލުން ބުނާގޮތުގައި 47,000 އަށްވުރެ ގިނަ ފަލަސްތީނު މީހުން ޝަހީދުވެފައިވެއެވެ.