ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ އެންގެވުމަށް ގައުމީ އިންޓެލިޖެންސް އިދާރާތަކުގެ އޮޑިޓެއް ހެދުމުގެ މަސައްކަތް ފަށަފައިފިއެވެ.

ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދީފައިވާ ޓެރަރިސްޓް ހަމަލާއަށްފަހު، ސިފައިންނާއި ފުލުހުންގެ އިންޓެލިޖެންސް އޮޑިޓެއް ހެއްދެވުމަށް ނިންމަވާފައިވާކަމަށް ރައީސް ސާލިހު މީގެ ކުރިން ވަނީ ވިދާޅުވެފައެވެ. ރައީސް މިހެން ވިދާޅުވީ، ރައީސް ނަޝީދުގެ ހާލުކޮޅު ބައްލަވައިލެއްވުމަށް އޭޑީކޭ ހޮސްޕިޓަލަށް ޒިޔާރަތް ކުރެއްވުމަށްފަހު ނޫސްވެރިންނާ ބައްދަލު ކުރައްވައި ދެއްކެވި ވާހަކަފުޅުގައެވެ. ރައީސް ވިދާޅުވެފައިވަނީ، އިންޓެލިޖެންސާ ހިސާބަށް އެ ހަމަލާގެ މައުލޫމާތު ތިލަވެގެން ނުދިޔަ ސަބަބާއި، އެކަން ނޭނގި އޮތީ ކީއްވެގެންތޯ ސާފު ކުރައްވާފައިވާކަަމަށެވެ.

ރައީސް ވިދާޅުވީ، މި ހުރިހާ އެއްޗެއް ބެލުމަށްފަހު، އިންޓެލިޖެންސް މިހާރަށްވުރެ ވަރުގަދަ ކުރަންޖެހޭ ކަމާއި، ސެކިއުރިޓީވެސް މިހާރަށްވުރެ ރަނގަޅަށް އޮންނަންޖެހޭކަން ފާހަގަ ކުރެއްވުނު ކަމަށެވެ.

އެކަމާ ގުޅޭ ފަހުގެ މައުލޫމާތުތައް ހިއްސާ ކުރައްވައި ރައީސް އޮފީހުގެ ތަރުޖަމާނު މަބްރޫކު އަޒީޒް ކުރެއްވި ޓްވީޓެއްގައި ވިދާޅުވީ، ރައީސްގެ އެންގެވުމަށް ގައުމީ އިންޓެލިޖެންސް އިދާރާތަކުގެ އޮޑިޓެއް ހެދުމުގެ މަސައްކަތް ފަށާފައިވާ ކަމަށެވެ. އެކަން ކުރަމުންދަނީ ރައީސް އޮފީހާއި ބަންޑާރަނާއިބުގެ އޮފީހުގެ ޓީމަކުން ގުޅިގެންކަން މަބްރޫކު ފާހަގަ ކުރެއްވިއެވެ. މަބްރޫކު ވިދާޅުވީ، އެ ޓީމުގެ ހޯދުންތައް ހިއްސާކުރާނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާ ކަމަށެވެ.

ރައީސް ނަޝީދަށް އަމާޒުކޮށް ދީފައިވާ ހަމަލާއާ ގުޅިގެން މިހާތަނަށް 3 މީހަކު ވަނީ ހައްޔަރުކޮށްފައެވެ.