ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ހަމަލާއާ ގުޅޭ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި އަޑުއެހުމުގައި އޮތީ ދައުލަތުގެ ހެކިންގެ ހެކިބަސް ނެގުމެވެ.
ނަޝީދަށް ދިން ޓެރަރިސްޓް ޙަމަލާއާ ގުޅޭގޮތުން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީން އެކުލަވާލާފައިވާ އިންކުއަރީ ރިޕޯޓު ހޯދުމަށް އިސްހާގުގެ ވަކީލުން ވަނީ އެދިފައެވެ. އެ ރިޕޯޓު ލިބެންދެން ހެކިބަސް ނެގުން މަޑުޖައްސާލުމަށް އިސްހާގުގެ ދިފާއީ ވަކީލު އެދިލެއްވިއެވެ.
އެހެންނަމަވެސް، އެއީ ޝަރީއަތް ފެށުމުގެ ކުރިންވެސް އެންގޭނެ ކަންކަންކަން ފާހަގަ ކުރައްވައި ގާޒީ ވަނީ އެ ފުރުސަތު ނުދެއްވުމަށް ނިންމަވާފައެވެ. އެގޮތުން މިހާރު ހެކިވެރިންވެސް ހާޒިރުކުރެވިފައިވާއިރު، ހެކިބަސްތަކާއި ގުޅޭގޮތުން އިތުރު ކަމެއް ފާހަގަ ކުރައްވަން ބޭނުންނަމަ ފަހުން ލިއުމުން ހުށައެޅުމުން އެ ހެކިވެރިން އަލުން ހާޒިރު ކޮށްދޭން ޖެހޭނަމަ، ކޮށްދެވިދާނެކަމަށް ގާޒީ ވިދާޅުވިއެވެ.
އެއަށްފަހު ހެކިބަސް ނެގުން ވަނީ ކުރިއަށް ގެންގޮސްފައެވެ.
ފުރަތަމަ ހާޒިރުކުރި ހެކިވެރިޔާއަކީ ނަޝީދަށް ސެކިއުރިޓީ ދިނުމުގައި ޙަރަކާތްތެރިވި އޮފިސަރެކެވެ. ބޮމުގެ ޙަމަލާގެ ވަގުތުގައި އޭނާ ހުރީ ވީއަޕީ ވެހިކަލް ކައިރީގައެވެ.
އޭނާ ބުނީ، ޙަމަލާ ދިން ވަގުތު ނަޝީދު ހުރީ ކާރާ ގާތްގަނޑަކަށް ހަތަރު ވަރަކަށް ފޫޓު ކައިރީގައި ކަމަށެވެ. ކުއްލިއަކަށް އެއްޗެއް ގޮވިއަޑު އިވުނު ކަމަށާއި، މުޅި ތަނުގައި ދުމުގެ އަސަރު ފެންނަން ހުރިކަމަށް އޭނާ ބުންޏެވެ.
ޙާދިސާގެ ސަބަބުން އޭނާއަށްވެސް އަނިޔާވިކަމަށް އެ ހެކިވެރިޔާ ބުންޏެވެ. އެގޮތުން ކަނާއަތް އަދި ބުރަކައްޓަށް ޒަޚަމްތަކެއް ލިބުނުކަމަށް އޭނާ ބުންޏެވެ.
ބޮމުގެ ޙަމަލާ ދިނުމާއެކު ފުރަތަމަވެސް މަސައްކަތް ކުރީ ނަޝީދު ހޮސްޕިޓަލަށް ގެންދިއުމަށްކަމަށް އޭނާ ބުންޏެވެ.
މި މައްސަލައިގައި އަންގާރަ ދުވަހު އިތުރު ހެކިންތަކެއްގެ ހެކިބަސް ނެގުމަށްވެސް ތާވަލު ކުރެވިފައިވެއެވެ.
