ރައީސް ނަޝީދުގެ ހަށިކޮޅުގެ ސީޓީ ސްކޭނެއް ހަދައިފި، ނަތީޖާ އައުމުން ފަރުވާ ފަށާނެ: އާއިލާ
ރައީސް ނަޝީދުގެ ހަށިކޮޅަށް 10 ރޭޒާފުއް ވަދެ މުހިއްމު ގުނަވަންތައް ފޫއަޅުވާލާފައިވޭ
ހަމަލާއާ ގުޅިގެން ރައީސް ނަޝީދުގެ ހަށިކޮޅަށް ވަނީ ބޮޑެތި ޒަޚަމްތަކެއް ލިބިފައި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ހަށިކޮޅުގެ ސީޓީ ސްކޭނެއް ހަދާފައިވާ ކަމަށާއި، ސްކޭންގެ ނަތީޖާ އައުމުން ފަރުވާ ފަށާނެ ކަމަށް އާއިލާއިން ބުނެފިއެވެ.
ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން ބޮޑެތި ޒަޚަމްތަކެއް އެމަނިކުފާނަށް ވަނީ ލިބިވަޑައިގެންފައެވެ. ރައީސް ނަޝީދުގެ ހަށިކޮޅަށް 10 ރޭޒާފުއް ވަދެ މުހިއްމު ގުނަވަންތައް ފޫއަޅުވާލާފައިވެއެވެ. އެތަކެތި ނެގުމަށް 16 ގަޑިއިރުގެ އޮޕަރޭޝަންތަކެއް ކުރިއެވެ. އޭޑީކޭގައި ފަރުވާ ހޯއްދެވުމަށްފަހު ޖަރުމަނުވިލާތަށް ފުރާވަޑައިގެންނެވީ ހުކުރު ދުވަހުގެ ހެނދުނުގެ ވަގުތެއްގައެވެ.
ރައީސް ނަޝީދުގެ ހާލުކޮޅާ ގުޅޭގޮތުން ރާއްޖެއެމްވީއަށް އެމަނިކުފާނުގެ ބޭބެ ޑރ.އިބްރާހިމް ނާޝިދު ވިދާޅުވީ ހުކުރު ދުވަހާއި ހޮނިހިރު ދުވަހު ސްކޭންތައް ހަދާފައިވާ ކަމަށެވެ. އަދި އިތުރު ފަރުވާ ފަށާނީ ސްކޭންތަކުގެ ނަތީޖާ ލިބުމުން ކަމަށް ވިދާޅުވިއެވެ.
ރައީސް ނަޝީދު އަވަހާރަކޮށްލަން އައިއީޑީ ގޮއްވާލި ހަމަލާއަށްފަހު މިހާތަނަށް ތިން މީހަކު ހައްޔަރުކޮށް، އެ މީހުންގެ ބަންދަށް 15 ދުވަސް ޖަހާފައިވެއެވެ. މި ތިން މީހުން ވެސް މިނިވަން ތަހުގީގަކަށް ފަހު އިންސާފުގެ ކުރިމަށްޗަށް ގެނެވޭނެ ކަމަށް ރައީސް ސާލިހު ވަނީ ވިދާޅުވެފައެވެ. އަދި ހަމަލާގެ ފަހަތުގައި ތިބި އެހެން މީހުން ވެސް ހޯއްދަވާނެ ކަމަށް އެމަނިކުފާނު ވިދާޅުވިއެވެ.
