ލަންކާގައި 14 ދުވަހުގެ ކަރަންޓީނެއް ފުރިހަމަކުރަން ޖެހޭތީ ސަމާލުވުމަށް އަންގައިފި
15 މެއި 2021 | ހޮނިހިރު 03:41ހާލަތު ގޯސްވާން ފެށީ އިންޑިއާ ވޭރިއެންޓް ލަންކާގައި ވެސް ފެތުރެން ފެށުމުން
ސްރީލަންކާގައި ރެންޑަމް ސާމްޕަލް ނަގާ މަންޒަރު
ސްރިލަންކާއަށް ދަތުރުކުރާ ދިވެހިންވެސް މިހާރު އެ ގައުމުގައި އަމަލުކުރަން ފަށާފައިވާ ކޮވިޑްގެ އައު އުސޫލުގެ ދަށުން 14 ދުވަހުގެ ކަރަންޓީނެއް ފުރިހަމަކުރަން ޖެހޭނެކަމަށް ރާއްޖޭގެ ފޮރިން މިނިސްޓްރީން ބުނެފިއެވެ.
ލަންކާގައި ކޮވިޑް ކޮންޓްރޯލްކުރުމަށް އަޅާފިޔަވަޅެއްގެ ގޮތުން އެތާގެ ސަރުކާރުން ވަނީ މީގެ ކުރިން ބައްޔާދެކޮޅަށް އަޅާފައިވާ ފިޔަވަޅުތައްވެސް ވަރުގަދަކޮށްފައެވެ. މިކަންކަމަށް ސަމާލުވުމަށް އިލްތިމާސްކޮށް ފޮރިން މިނސްޓްރީން ބުނީ، ބަލި ފެތުރުމުގެ ފުރުސަތު ކުޑަކުރުމަށް އެ ގައުމުން އަޅާފައިވާ އެންމެ މުހިންމު ފިޔަވަޅަކީ ކަރަންޓީނުވާ އުސޫލަށް ގެނައި ބަދަލުތައް ކަމަށެވެ. މިހާރު ނިންމާފައިވާ ނިންމުމުގެ ދަށުން މިމަހުގެ 31ވަނަ ދުވަހުގެ ނިޔަލަށް އެ ގައުމަށް ދަތުކުރާ ހުރިހާ އެންމެން 14 ދުވަހުގެ ކަރަންޓީން މުއްދަތެއް ފުރިހަމަކުރަން ޖެހޭނެއެވެ. ކަރަންޓީނުވާން ޖެހޭނީ ލަންކާ ސަރުކާރުން ކަނޑައަޅާ ކަރަންޓީން ހޮޓަލެއް ނުވަތަ ސެންޓަރެއް ނުވަތަ ރައްކާތެރިކަމަށް ކަނޑައަޅާފައިވާ ލެވެލް 1ގެ ހޮޓަލެއްގައެވެ. އެ ގައުމަށް ދަތުރުކުރާ 12 އަހަރުން މަތީގެ ހުރިހާ ކުދިންނާއި މީހުން 14 ދުވަހުގެ ކަރަންޓީނު ފުރިހަމަކުރުމަށްފަހު ދޫކުރެވޭނީ، އެ ގައުމަށް ދަތުރުކުރާ ފުރަތަމަ ދުވަހު ހަދާ "އޮން އެރައިވަލް ޕީސީއާރް" ޓެސްޓާއި، ކަރަންޓީނުގެ 11ވަނަ ދުވަހާއި 14ވަނަ ދުވަހާ ދެމެދު ހަދާ "އެގްޒިޓް ޕީސީއާރް" ޓެސްޓުގެ ނަތީޖާ ނެގެޓިވް ވުމުން ކަމަށް ވަނީ އަންގާފައެވެ.
އެރައިވަލް އަދި އެގްޒިޓް ޕީސީއާރް ހަދަން ނުޖެހޭނީ ދެ އަހަރުން ދަށުގެ ކުދިންނަށް އެކަންޏެވެ. ކަރަންޓީނު ކުރުމުގެ އުސޫލަށް މިގޮތަށް ބަދަލު ގެނެސްފައިވީނަމަވެސް، ކްރިޓިކަލް ފަރުވާއަށް ގޮސް ހޮސްޕިޓަލުގައި ކަރަންޓީނުވާން އެދޭ މީހުން، ހޮސްޕިޓަލާއި ސްރީލަންކާގެ ހެލްތް މިނިސްޓްރީގެ ޚާއްސަ ހުއްދައިގެ ދަށުން، ބޭސްފަރުވާއަށް ދަތުރުކުރުމުގެ ފުރުސަތު ކުރިއެކޭ އެއްގޮތަށް މި މުއްދަތުގައިވެސް ފަހިވެފައި އޮންނާނެ ކަމަށް ފޮރިން މިނިސްޓްރީން ބުނެއެވެ. އެހެންކަމުން ސްރީލަންކާއަށް ދަތުރުކުރާ ދިވެހިން މިކަމަށް ސަމާލުކަން ދިނުމަށް މިނިސްޓްރިންވަނީ އެދިފައެވެ. މި ފިޔަވަޅުތަކަށް ބަދަލު އައުން އެކަށީގެންވުމާއެކު، ދަތުރުކުރުމުގެ ކުރިން މައުލޫމާތު ސާފުކުރުމަށްވެސް އިލްތިމާސްކޮށްފައިވެއެވެ.
ލަންކާއަކީ ތައުލީމު ހާސިލުކުރުމަށާއި އެކި ބޭނުންތަކުގައި ގިނަ އަދަދަކަށް ދިވެހިން ދިރިއުޅެމުން އަންނަ ގައުމެކެވެ. ލަންކާގައި ކޮވިޑް ކޭސްތައް 13،0000ށް އަރާފައިވާއިރު، މަރުވި މީހުންގެ އަދަދު 800ން މައްޗަށް ވަނީ އަރާފައެވެ. ލަންކާގެ ހާލަތު ގޯސްވާން ފަށާފައިވަނީ އިންޑިއާގައި މިހާރު ފެތުރެމުންދާ ކޮވިޑުގެ ވޭރިއެންޓް ލަންކާގައިވެސް ފެތުރެން ފެށުމާއެކުއެވެ. ލަންކާގެ އިތުރުންވެސް 17 ގައުމެއްގައި މި ވޭރިއެންޓް އުޅޭކަމަށް ދުނިޔޭގެ ސިއްޙަތު ޖަމިއްޔާއިން ހާމަކޮށްފައިވާއިރު، އިންޑިއާގައި މިހާރު ފެތުރެމުންދާ ވޭރިއެންޓަކީ "ވޭރިއެންޓް އޮފް ކޮންސަރން" އެއް ކަމަށް އެ ޖަމިއްޔާއިން ވަނީ ކަނޑައަޅާފައެވެ.
