ލިސްޓުގައި ތިބި އެމްޑީޕީގެ މެމްބަރުންނާމެދު ފިޔަވަޅު އަޅަން އަދި ނިންމާފައެއް ނެތް: ހަސަން
މިއީ އެސެޓް ރިކަވަރީ ކޮމިޝަނުގެ ހޯދުންތަކުގެ މައްޗަށް ބިނާކޮށް ހެދި ލިސްޓެއް
އެމްޑީޕީގެ ޗެއަރޕަރސަން އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް
އެމްއެމްޕީއާރްސީގެ ޚިޔާނާތާއި ގުޅިގެން އެސެޓް ރިކަވަރީ ކޮމިޝަނުން އެކުލަވާލާފައިވާ ލިސްޓުގައި ތިބި އެމްޑީޕީގެ މެމްބަރުންނަށް ޕާޓީ ތެރެއިން ފިޔަވަޅު އެޅުމަށް އަދި ނިންމާފައި ނުވާކަމަށް އެޕާޓީގެ ޗެއަރޕަރސަން އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެއްޖެއެވެ.
ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީއާއި ޖުޑީޝަރީ ކޮމިޓީން އާންމުކުރި މި ލިސްޓަކީ އެސެޓް ރިކަވަރީ ކޮމިޝަނުގެ ހޯދުންތަކުގެ މައްޗަށް ބިނާކޮށް ކޮމިޝަނުން އެކުލަވާލާފައިވާ ލިސްޓެކެވެ. މި ލިސްޓުގައި 19 ވަނަ ރައްޔިތުންގެ މަޖިލީހުން އެމްޑީޕީގެ 4 މެމްބަރުންގެ ނަންވެސް ހިމެނިފައިވެއެވެ. އޭގެތެރޭގައި ހިމެނެނީ އެމްޑީޕީ ޕީޖީ ގްރޫޕްގެ ލީޑަރ މެދުހެންވޭރު ދާއިރާގެ މެމްބަރ އަލީ އާޒިމް، މުލަކު ދާއިރާގެ މެމްބަރ އިބްރާހީމް ނަސީރު، މަރަދޫ ދާއިރާގެ މެމްބަރ އިބްރާހީމް ޝަރީފް އަދި ކެނދިކުޅުދޫ ދާއިރާގެ މެމްބަރ އަހުމަދު އީސާ އެވެ.
ލިސްޓުގައި ހިމެނޭ އެމްޑީޕީ މެމްބަރުންނާ ދޭތެރޭގައި ޕާޓީގެ އެތެރެއިން އެއްވެސް ފިޔަވަޅެއް އެޅުމަށް ނިންމާފައިވޭތޯ "ރާއްޖެއެމްވީން" ސުވާލުކުރުމުން ހަސަން ވިދާޅުވީ، މިވަގުތު އެފަދަ ނިންމުމެއް ޕާޓީން ނިންމާފައި ނުވާ ކަމަށެވެ. އެގޮތުން ލިސްޓު އަދި އޮތީ ކޮމިޓީ މަރުޙަލާގައިކަން ހަސަން ފާހަގަ ކުރެއްވިއެވެ.
އެސެޓް ރިކަވަރީ ކޮމިޝަނުން ރައްޔިތުންގެ މަޖިލީހުގެ ޖުޑީޝަރީ ކޮމިޓީއާއި، ސަލާމަތީ ޚިދުމަތްތަކާ ބެހޭ ކޮމިޓީގެ ޖޮއިންޓް ކޮމިޓީއާ ހިއްސާކުރި ލިސްޓު އެ ކޮމިޓީން އާންމުކޮށްފައިވާއިރު އޭގައި ޕާސްން އޮފް އިންޓްރަސްޓުގެ ގޮތުގައި ހިމެނޭ 119 ބޭފުޅުންނަކީ މިދިޔަ ސަރުކާރުގައި ވެސް އަދި މި ސަރުކާރުގައި ވެސް އެކި މަގާމުތަކުގައި ތިއްބެވި ބޭފުޅުންނެވެ. އޭގެ ތެރޭގައި ރައްޔިތުންގެ މަޖިލީހުގެ މެމްބަރުންނާއި މިނިސްޓަރުން ވެސް ހިމެނިވަޑައިގަންނަވައެވެ.
