ފުވައްމުލަކު ގައި ހިނގަމުން އަންނަ މަޝްރޫޢުތަކުގެ ދުވެލި އަވަސްކޮށް، ހުއްޓިފައިވާ މަޝްރޫޢުތައް އަލުން ފެށުމަށް ސަރުކާރަށް އިލްތިމާސްކުރަން: ފައިސަލް ނަސީމް
26 ނޮވެމްބަރު 2025 | ބުދަ 02:29އެމްޑީޕީ ސަރުކާރުން ފުވައްމުލަކަށް ގިނަ ތަރައްގީގެ މަޝްރޫޢުތަކެއް ހިންގާ ސްކޫލުތަކާއި ހޮސްޕިޓަލާއި މަގުތަކަށް ބޮޑެތި ކުރިއެރުންތަކެއް ލިބިއްޖެކަން ފައިސަލް ފާހަގަ ކުރެއްވި
ފައިސަލް ނަސީމް އާއި އެމްޑީޕީގެ ލީޑަރޝިޕް އިން ފުވައްމުލަކު އަށް ކުރި ދަތުރުގެ ތެރެއިން
ޏ ފުވައްމުލަކު ގައި ހިނގަމުން އަންނަ މަޝްރޫއުތަކުގެ ދުވެލި އަވަސްކޮށް، ހުއްޓިފައިވާ މަޝްރޫޢުތައް އަލުން ފެށުމާއި، ފުވައްމުލަކު ސިޓީގެ ތަރައްޤީއަށް ސަމާލުކަން ދެއްވުމަށް، ކުރީގެ ނައިބު ރައީސް ފައިސަލް ނަސީމް ސަރުކާރަށް އިލްތިމާސް ކުރައްވައިފި އެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ފައިސަލް ވިދާޅުވި، އެމްޑީޕީގެ ވެރިކަމުގައި ފުވައްމުލައް ސިޓީއަށް ގިނަ ކުރިއެރުންތަކެއް ހޯދައި ދެވިފައި ވުމަކީ، އެކަމުގެ ސަބަބުން ހިތްހަމަޖެހުމާއި އުފާ ލިބޭކަމެއް ކަމަށެވެ. އަދި ފުވައްމުލަކު ސިޓީގެ މަގުތައް ރަނގަޅު ފެންވަރަކަށް ހެދުމާއި ރަށުގެ އިރުމަތީ ފަރާތުގެ ގިރާ ސަރަހައްދު ހިމާޔަތް ކުރުން ފަދަ ކަންކަމުން ރަށު ރައްޔިތުންގެ ދިރިއުޅުމަށްވަނީ ގިނަ ލުއި ފަސޭހަތަކެއް ލިބިފައި ކަމަށް ފައިސަލް ވިދާޅުވި އެވެ.
އޭގެ އިތުރުން ހުރިހާ ސްކޫލުތަކެއްގައި އިތުރު ކިލާސްރޫމްތަކާއި މަލްޓިޕަރޕަސް ހޯލުތައް ޤާއިމުކުރެވިފައިވުމުން، ދަރިވަރުންގެ ކިޔެވުމާއި އެކުދިންނަށް އުނގަންނައިދިނުމުގެ މަސައްކަތްތަކުން ދަނީ ހެޔޮބަދަލުތައް ފެންނަމުން ކަމަށާއި ހޮސްޕިޓަލްގެ އިމާރާތް ބޮޑުކުރެވި، ލެބޯޓަރީގެ ޚިދުމަތްފުޅާކުރެވި، ޑައިލިސިސް ޚިދްމަތާއި ޑެންޓަލް ޚިދްމަތްތަކާއި ސީޓީ ސްކޭންގެ ޚިދްމަތް ދޭން ފެށުމުގެ ސަބަބުން، ޞިއްޙީ ޚިދުމަތުގައި މީގެ ކުރިން ރައްޔިތުން އުފުލަންޖެހުނު އެތައް ތަކުލީފަކަށް ވަނީ ލުއި ލިބިފައި ކަމަށް ވެސް ނައިބު ރައީސް ފައިސަލް ނަސީމް ގެ ޕޯސްޓުގައި ވިދާޅުވި އެވެ.
ފާހަގަ ކޮށްލެވޭ ގޮތުގައި އެމްޑީޕީގެ ސަރުކާރުން ފުވައްމުލަކުގައި ތަރައްގީގެ ގިނަ މަޝްރޫއު ތަކެއް ވަނީ ފަށައިފަ އެވެ. އަދި އޭގެގ ތެރެއިން ގިނަ މަޝްރޫއުތަކެއް ވަނީ ނިންމާއިފަ އެވެ. ނަމަވެސް އެމްޑީޕީގެ ސަރުކާރު ބަދަލުވުމާއެކު އެ މަޝްރޫއުތައް ހުއްޓިފައިވުމަކީ އެ ރަށު ރައްޔިތުން ކަންބޮޑުވާ ކަމެކެވެ.
މިމަހުގެ 21 ވަނަ ދުވަހު ކުރީގެ ނައިބް ރައީސް ފައިސަލް ނަސީމް އާއި އެމްޑީޕީ ގެ ލީޑަރޝިޕްގެ ބައެއް ބޭފުޅުން ފުވައްމުލަކަށް ކުރެއްވި ދަތުރުފުޅުގައި ރައީސް ސާލިހްގެ ސަރުކާރުން ފެށި މަޝްރޫއުތައް ވަނީ ބައްލަވާލައްވާފަ އެވެ.
އެ ދަތުރުފުޅު ނިންމާވާ ލެއްވުމަށް ފަހު ފައިސަލް ވިދާޅުވި، ފުވައްމުލަކަށް ކުރި ދަތުރުގައި ބައްދަލުވި ގިނަ ރައްޔިތުން ވަނީ އެމީހުންގެ ކަންބޮޑުވުންތައްވެސް ޙިއްޞާކޮށްފައި ކަމަށެވެ. އަދި މިސަރުކާރަށް 2 އަހަރު ވީއިރު، ފުވައްމުލަކު ގެ ތަރައްޤީއަށް އެކަށީގެންވާ މަސައްކަތްތަކެއް ކުރެވިފައި ނެތުމާއި، ކުރީ ސަރުކާރުގައި ފަށައި ހިނގަމުންދާ މަޝްރޫޢުތަކުގެ ތެރެއިން ބައެއް މަޝްރޫޢުތައް މަޑުޖެހި އަދި ބައެއް މަޝްރޫޢުތައް ހުއްޓިފައި ވުމަކީ ރައްޔިތުންގެ ކަން ބޮޑުވުން އިންތިހާއަށް އޮތް ކަމެއް. ކަމަށް ފައިސަލް ވިދާޅުވި އެވެ.
