"ޒިޔާރަތެއްގެ މަސައްކަތް ކުރަން ވަދެފައި ނިކުންނަ އިރަށް މަރުގެ އިންޒާރު ވެސް އާދޭ"
14 މެއި 2021 | ހުކުރު 06:44ތަރިކަ ރައްކާތެރިކުރުމުގެ ބޭނުމަކީ ކާބަފައިން ކޮށްފައި ހުރި މަސައްކަތްތަކާއި ވާހަކަތައް އޮޅުން ފިލުވުން
އާޓްސް، ކަލްޗަރ އެންޑް ހެރިޓޭޖް ގެ ސްޓޭޓް މިނިސްޓަރު މުހައްމަދު ޠާރިގް | ރާއްޖެއެމްވީ
ޒިޔާރަތްތައް މަރާމާތުކުރުމާއި ބެލެހެއްޓުމުގެ މަސައްކަތް ކުރަމުން ގެންދާއިރު ބައެއް ފަހަރު މަރުގެ އިންޒާރު ލިބޭ ކަމަށް އާޓްސް، ކަލްޗަރ އެންޑް ހެރިޓޭޖް ގެ ސްޓޭޓް މިނިސްޓަރު މުހައްމަދު ޠާރިގް ވިދާޅުވެއްޖެއެވެ.
ފަހަކަށް އައިސް ބައެއް ފަރާތްތަކުން ގެންގުޅޭ ފިކުރާ ބެހޭ ގޮތުން ރާއްޖެ ޓީވީގެ ފަލަސުރުޚީ ޕްރޮގްރާމްގައި ޠާރިގް ވިދާޅުވީ، މަގާމްފުޅުތަކާއި އެހެނިހެން ބައެއް ތާރީޚީ ތަރިކަ ބެލެހެއްޓުމަކީ ބިދުޢައެއްގެ ގޮތުގައި ބައެއް މީހުން ދެކޭ ކަމަށެވެ. އެހެންނަމަވެސް ޒިޔާރަތެއް ރައްކާތެރި ކުރުމުގެ މަސައްކަތްތައް ކުރަނީ އެއްވެސް ހާލެއްގައި ދީނީ އަޅުކަމެއްގެ ގޮތުގައި ބަލައިގެނެއް ނޫން ކަމަށެވެ.
ޠާރިގް ވިދާޅުވީ، ތަރިކަ ހިމާޔަތް ކުރުމަށް ގިނަގުނަ މަސައްކަތްތަކެއް ކުރެވޭތޯ ބަލާ ކަމަށާއި، އެކަމަކު އެއީ އޮތް ބިރުވެރި ކަމެއް ކަމަށެވެ. އެހެން ކަމުން ތަރިކަ ހިމާޔަތްކުރުމުގެ މަސައްކަތާއި، އެ މަސައްކަތުގެ މަޤްސަދާ މެދު ހޭލުންތެރިވާން ޖެހޭ ކަމަށެވެ. އަދި މި މަސައްކަތުގައި ދީނާ ޚިލާފުކަމެއް ކުރުމުގެ ވިސްނުމެއް ނެތް ކަން ޠާރިގް ފާހަގަ ކުރެއްވިއެވެ.
ތަރިކަ ރައްކާތެރިކޮށް ބެލެހެއްޓުމުގެ ބޭނުމަކީ ކާބަފައިން ކޮށްފައި ހުރި މަސައްކަތްތަކާއި މަސައްކަތްތެރިކަމާއި، އެ ތަންތަނާ ބެހޭ ގޮތުން ދެކެވިފައި ހުރި ވާހަކަތައް އޮޅުން ފިލުވުން ކަމަށް ޠާރިގް ވިދާޅުވިއެވެ. އެ ކަންތައްތަކާއި އިހު ޒަމާނުގެ އެތައް ބައިވަރު ހަގީގަތްތަކެއް ގުޅިފައި ހުންނާނެ ކަމަށާއި، ކާބަފައިންގެ ވާހަކަތަކަށް ބަލައިގެން ކުރިމަގުގެ ކަންކަން ރާވައިފިނަމަ މުސްތަގުބަލު ހަރުދަނާ ވާނެ ކަމަށް ވިދާޅުވިއެވެ.
