ނޭޝަނަލް އާޓް ގެލެރީގައި މައުރަޒުތައް ބާއްވަން އެދޭ ފަރާތްތަކަށް، އެތަން ކުއްޔަށް ހިފުމުގެ ފުރުސަތު ހުޅުވާލައިފިއެވެ.
ނޭޝަނަލް ސެންޓަރ ފޮރ ދި އާޓްސް (އެންސީއޭ)އިން ބުނީ، ހޯމަ ދުވަހުން ފެށިގެން އާޓް ގެލެރީ ކުއްޔަށް ހިފުމަށް ހުޅުވާލާފައިވާކަމަށެވެ. އެގޮތުން 15 ފެބްރުއަރީން ގެށިގެން އެތަން ބުކް ކުރެވޭނެ ކަމަށް އެންސީއޭއިން ބުނެފައިވެއެވެ.
އެންސީއޭއިން އާޓް ގެލެރީ ކުއްޔަށް ދޫކުރަން ހުޅުވާލާފައިވަނީ އެ ތަން ނުހުޅުވި ގިނަ ދުވަސްތަކެއް ވަމުންދާތީ، ދިވެހި އާޓިސްޓުންގެ ޖަމްއިއްޔާއިން ކަންބޮޑުވުން ފާޅުކޮށްފައިވަނިކޮށެވެ. އެ ޖަމްއިއްޔާއިން ވަނީ އާޓް ގެލެރީ ގިނަ ދުވަސްތަކެއް ވަންދެން ބަންދުކުރެވިފައި ހުރުމުން ރާއްޖޭގެ ގިނަ ޕްރޮފެޝަނަލް ވިޜުއަލް އާޓިސްޓުންނަށް މިކަމުގެ ދަތިތައް ކުރިމަތިވަމުންދާކަން ފާހަަގަކޮށްފައެވެ.
އަދި އެ ޖަމްއިއްޔާގެ ފަރާތުން ރާވައި ހިންގަން ހުރި ގިނަ އިވެންޓުތައްވެސް ނުބޭއްވި ގިނަ ދުވަސްތަކެއް ވަމުންދާކަމުގެ ކަންބޮޑުވުން ވަނީ ފާޅުކޮށްފައެވެ. ޚާއްސަކޮށް ގިނަ ހުނަރުވެރި ޒުވާނުން ބައިވެރިވާ އެގްޒިބިޝަންތައް ނުބޭއްވި ލަސްވާކަމީ ރާއްޖޭގެ އާޓްގެ ދާއިރާއަށް ލިބޭ ވަަރަށް ބޮޑު ނިކަމެތި ކަމެއް ކަމަށް އެ ޖަމްއިއްޔާއިން ބުނެފައިވެއެވެ.
