ނަރުހުން އިތުރުކުރުމަށް އޮނިގަނޑަށް އިސްލާހު ގެންނަން ފެނޭ – ފަރުޒާނާ
ނަރުހުންގެ އޮނިގަނޑަށް ބަދަލު ގެންނަން ބަލާއިރު އުޖޫރަ އަކީ ވެސް މުހިންމު އެއްޗެއް
އައިޖީއެމްއެޗްގެ ވޯޑް މެނޭޖަރު ފަރުޒާނާ ސާބިގު
ސިއްހީ ދާއިރާގައި މަސައްކަތް ކުރާ ނަރުހުން އިތުރު ކުރުމަށާއި މަސައްކަތުގައި ދެމި ތިބުމުގެ ފުރުސަތު ފަހިކުރުމަށް ނަރުހުންގެ އޮނިގަނޑަށް އިސްލާހު ގެންނަން ފެނިވަޑައިގަންނަވާ ކަމަށް އައިޖީއެމްއެޗްގެ ވޯޑް މެނޭޖަރެއްގެ ގޮތުގައި މަސައްކަތް ކުރައްވާ ފަރުޒާނާ ސާބިގް ވިދާޅުވެއްޖެއެވެ.
ނަރުހުންގެ ދުވަހުގެ މުނާސަބަތުގައި ރާއްޖެ ޓީވީގެ 'ފަލަސުރުޚީ' ޕްރޮގްރާމްގައި ފަރުޒާނާ ވަނީ ސިއްހީ ދާއިރާއަށް ނިކުންނަ ނަރުހުން ޚިދުމަތުގައި ގިނަ ދުވަހު ދެމިނުތިބޭ ސަބަބުތަކަށް އަލިއަޅުއްވާފައެވެ. މިކަމާ ގުޅޭ ގޮތުން ކުރެވިދާނެ ކަންކަމަކީ ކޮބައިތޯ ބަލަން ޖެހޭ ކަމަށް ވިދާޅުވިއެވެ.
ނަރުހުންގެ އޮނިގަނޑަށް އިސްލާހު ގެނައުމާއި ގުޅޭ ގޮތުން ފަރުޒާނާ ވިދާޅުވީ، މިހާރު ވެސް އޮނިގަނޑަށް ގިނަ ބަދަލުތަކެއް ގެނެސްފައި ވާކަމަށެވެ. އެހެން ނަމަވެސް، ނަރުހުން ވަޒީފާގައި ގިނަދުވަހު ދެމިތިބޭނެ ގޮތެއް ހެދުމަށްޓަކައި، މި އޮނިގަނޑަށް އަދި ވެސް އިތުރު ބަދަލު ތަކެއް ގެނައުން މުހިންމު ކަމަށެވެ.
ނަރުހުންގެ އޮނިގަނޑަށް ބަދަލު ގެނައުމާއި ގުޅޭގޮތުން، ފަރުޒާނާއާއެކު ފަލަސުރުޚީ ޕްރޮގްރާމްގައި ބައިވެރިވެވަޑައިގެންނެވި އައިޖީއެމްއެޗްގެ ވޯޑް މެނޭޖަރު ޖަބީން މުހައްމަދު ވެސް ވާހަކަދެއްކެވިއެވެ. ޖަބީން ފާހަގަކުރެއްވި ގޮތުގައި، ނަރުހުންގެ އޮނިގަނޑަށް ބަދަލު ގެންނަން ބަލާއިރު އުޖޫރަ އަކީ ވެސް މުހިންމު އެއްޗެކެވެ. އެހެން ނަމަވެސް އޮނިގަނޑަށް ބަދަލު ގެނައުމަކީ ހަމައެކަނީ އުޖޫރައަށް ބަދަލު ގެނައުން ނޫން ކަމަށް ޖަބީން ވިދާޅުވިއެވެ. އެގޮތުން އެކޮމޮޑޭޝަން ދިނުމާއި، މާހައުލުގައި ދިމާވާ ރިސްކް ތަކަށް ރިއާޔަތް ކުރުމަށްފަހު އޮނިގަނޑު ބައްޓަން ކުރުން މުހިންމު ކަން ޖަބީން ފާހަގަ ކުރެއްވިއެވެ.
