މާރާމާރީއެއްގައި އަނިޔާވެގެން ފަރުވާ ދެމުންދިޔަ މީހަކު މެޑިކަލް ސްޓާފުންނަށް ބިރު ދެއްކި މައްސަލާގައި ހައްޔަރުކޮށްފި
ލޫތުގެ ބަންދަށް 15 ދުވަސް ވަނީ ޖަހާލާފައި
މާރާމާރީއެއްގައި އަނިޔާވެގެން ފަރުވާ ދެމުންދިޔަ އިބްރާހިމް ލޫތު
މާލޭގައި ހިންގި މާރާމާރީއެއްގައި އަނިޔާވެގެން ފަރުވާ ދެމުންދިޔަ މީހަކު ހޮސްޕިޓަލުގެ މެޑިކަލް ސްޓާފުންނަށް ބިރު ދެއްކި މައްސަލާގައި ހައްޔަރުކޮށް ބަންދުގެ މުއްދަތު ޖަހައިފިއެވެ.
އާދިއްތަ ދުވަހު ފުލުހުން ބުނީ، ސެޕްޓެންބަރު މަހުގެ 14 ވަނަ ދުވަހުގެ ފަތިހުގެ ވަގުތެއްގައި ހިންގި މާރާމާރީއެއްގައި ގދ. ވާދޫ، ފުރުސަތު، 28 އަހަރުގެ ލޫތު އިބްރާހީމްއަށް އަނިޔާވުމާއި ގުޅިގެން އައިޖީއެމްއެޗްގައި އެޑްމިޓް ކޮށްގެން ފަރުވާ ދެމުން ގެންދިޔަ ކަމަށެވެ.
އަދި، ހަމަ އެދުވަހު މެންދުރުގެ ވަގުތެއްގައި އޭނާއަށް ފަރުވާ ދެމުންދިޔަ މެޑިކަލް ސްޓާފުންނަށް މަރުގެ އިންޒާރުދީ ބިރު ދެއްކުމުގެ އިތުރުން ޖީބުން ވަޅިއެއް ފެނިފައިވާ މައްސަލާގައި 19 ސެޕްޓެންބަރު ވަނަ ދުވަހު ކޯޓު އަމުރެއްގެ ދަށުން ލޫތު ހައްޔަރުކޮށްފައިވާ ކަމަށް ފުލުހުން ބުނެއެވެ.
މީގެ އިތުރުން ފުލުހުން ބުނީ، މިމައްސަލައާ ގުޅިގެން އޭނާ ކޯޓަށް ހާޒިރު ކުރުމުން 15 ދުވަހަށް ބަންދު ކުރުމަށް އަމުރުކޮށްފައިވާ ކަމަށެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
