އޮޑިޓަރ ޖެނެރަލް ހަސަން ޒިޔަތު އިސްތިއުފާ ދެއްވައިފި
12 މެއި 2021 | ބުދަ 16:55ޚިޔާނާތައި ރިޝްވަތުގެ އަމަލެއްގައި ބައިވެރިވެފައި ނުވާނެ ކަމަށް އިސްތިއުފާގެ ސިޓީގައި ވިދާޅުވެފައިވޭ
އޮޑިޓަރ ޖެނެރަލް ހަސަން ޒިޔަތު
އޮޑިޓރ ޖެނެރަލް ހަސަން ޒިޔަތު އިސްތިއުފާ ދެއްވައިފިއެވެ.
ޒިޔަތު އިސްތިއުފާ ދެއްވާފައި މިވަނީ، މަޖިލީހުން އާންމުކުރި އެމްއެމްޕީއާރްސީގެ ޚިޔާނާތުގެ ފައިސާ ލިބުނުކަމަށް ތުހުމަތު ކުރެވޭ މީހުންގެ ލިސްޓުގައި އޭނާގެ ނަން ހިމެނިފައި ވަނިކޮށެވެ.
ޒިޔަތުގެ އިސްތިއުފާގެ ސިޓީ މަޖިލީހަށާއި، ރައީސް އޮފީހަށް ވަނީ ފޮނުވާފައެވެ. މަޖިލީހަށް އެ ސިޓީ ފޮނުވާފައި ވާކަން 'ރާއްޖެއެމްވީ' އަށް ކަށަވަރު ކޮށްދެއްވަމުން މަޖިލީހުގެ މީީޑއާ ޑިރެކްޓަރ ހަސަން ޒިޔާއު ވިދާޅުވީ އެއިދާރާއަށް މިރޭގެ ވަގުތެއްގައި ސިޓީ ލިބިފައިވާކަމަށެވެ.
މިސިޓީގައި ޒިޔަތު ވިދާޅުވެފައިވަނީ އެމްއެމްޕީއާރުސީގެ ޚިޔާނާތުގެ މައްސަލައާ ގުޅޭ ރިޕޯޓުގައި އެފައިސާގައި ޖެހިފައިވާ ދައުލަތުގެ މިހާރުގެ މުވައްޒަފުންނާއި ކުރީގެ މުވައްޒަފުންގެ މައްޗަށް އެކުލެވޭ 119 މީހުންގެ ލިސްޓުގައި ޒިޔަތުގެ ނަން ހިމަނާފައިވާކަމަށެވެ.
"ވުމާއކު އޮޑިޓަރ ޖެނެރަލްގެ ހައިސިއްޔަތުން އެމަގާމުގައި ހުރުމަކީ އޮޑިޓަރ ޖެނެރަލްގެ އޮފީހާއި ދައުލަތަށް ކަރާމާތާއި ގަދަރަށް އުނިކަން އަންނަ ކަމެއް ކަމަށް ދެކޭތީ މަގާމުން އަޅުގަނޑު އިސްތިއުފާދީފީމެވެ. އަދި ޚިޔާނާތައި ރިޝްވަތުގެ އެއްވެސް އަމަލެއްގައި ބައިވެރިވެފައިނުވާނެ ކަމުގެ ޔަގީންކަން އަރުވަމެވެ."
މަޖިލީހުގެ ޖުޑިޝަރީ ކޮމިޓީއާއި 241 ކޮމިޓީގެ ޖޮއިންޓް ކޮމިޓީން، އެމްއެމްޕީއާރުސީގެ މައްސަލަ ބަލައި، ތަހުގީގުގެ ރިޕޯޓު އާންމުކޮށްފައި ވަނީ ބުދަދުވަހުގެ ހަވީރުއެވެ. މި ރިޕޯޓުގައި ހިމެނޭ ލިސްޓަކީ އެސެޓް ރިކަވަރީ ކޮމިޝަނުން ފޮނުވި ލިސްޓަށް އެއްވެސް އުނިއިތުރެއް ގެނައުމަކާއި ނުލައި ނެރެފައިވާ ލިސްޓެކެވެ.
