އެމްއެމްޕީއާރްސީ ހިޔާނާތުގެ ތަހުގީގު ނުނިމެނީސް އޭގެ ތެރެއިން ގިނައީ ހިޔާނާތުގައި ބައިވެރިނުވާ މީހުންކަމަށް ރައީސް ވިދާޅުވެއްޖެ

އެމްއެމްޕީއާރްސީ ހިޔާނާތުގެ ތަހުގީގު ނުނިމެނީސް އޭގެ ތެރެއިން ގިނައީ ހިޔާނާތުގައި ބައިވެރިނުވާ މީހުންކަމަށް ރައީސް ޑރ މުޙައްމަދު މުއިއްޒު ވިދާޅުވެއްޖެއެވެ.

ޕީއެންސީން ބޭއްވި ހަރުގެ ޖަލްސާގައި ވާހަކަ ދައްކަވަމުން ރައީސް ވިދާޅުވީ، އެމްއެމްޕީއާރްސީ ލިސްޓުގައި ތިބި ގިނަ މީހުންނަކީ އެ ހިޔާނާތުގައި ބައިވެރިވި މީހުންނެއް ނޫން ކަމަށެވެ.

އޭގެ ތެރެއިން ގިނަ މީހުންނަކީ ޑޮލަރު މާރު ކުރުމުގެ ގޮތުން މުއާމަލާތް ކޮށްފައިވާ މީހުންކަމަށް ރައީސް ވިދާޅުވިއެވެ.

 ރައީސް މުއިއްޒު އެހެން ވިދާޅުވެފައިވާއިރު، އެމްއެމްޕީއާރްސީ ހިޔާނާތާ ގުޅޭ ގިނަ މައްސަލަތަކެއް އޭސީސީން މިހާރުވެސް ތަހުގީގު ކުރަމުންދެއެވެ. އަދި އެއީ އެތައް ބައެއްގެ މައްޗަށް ތުުުހުމަތު ކުރެވޭ މައްސަލައެކެވެ.

 ވީއިރު، ތަހުގީގު ކުރިއަށްދާ މައްސަލަތަކެއްގައި އެއީ ހިޔާނާތުގެ ފައިސާކަމަށް ރައީސް ކަނޑައެޅުއްވީ ކީއްވެތޯ ގިނަ ބަޔަކު ދަނީ ސުވާލު އުފައްދަމުންނެވެ.

ރައީސް ވަނީ ބޭންކް އޮފް މޯލްޑިވްސް (ބީއެމްއެލް) އިން ހިންގިކަމަށް ބުނާ ބަޣާވާތުގެ މައްސަލައިގައިވެސް އެ މޭރުމުން ވާހަކަ ދައްކަވާފައެވެ. އެގޮތުން އެ މައްސަލަ ތަހުގީގު ކުރަމުންދާކަމަށް ފުލުހުން ބުނެފައިވާއިރު، ރައީސް ވަނީ އެއީ ސީދާ ބަޣާވާތެއްކަމަށް ހަމަ އެ ޖަލްސާގައި ވިދާޅުވެފައެވެ.

އެކަންކަމާ ގުޅިގެން ގިނަ ބަޔަކު ދަނީ ކަންބޮޑުވުން ފާޅު ކުރަމުންނެވެ.