އިނގިރޭސިވިލާތުގެ މަޝްހޫރު ދަ ޓެލެގްރާފް ނޫހުން އަހަރަކު އެއްފަހަރު ހޮވާ ދުނިޔޭގެ އެންމެ މަގުބޫލު ގައުމުތަކުގެ މިއަހަރުގެ ލިސްޓުން ބޮޑުތަނުން ރާއްޖެ ދަށަށް ވެއްޓިއްޖެ އެވެ.

2025 ވަނަ އަހަރު ރާއްޖެ އަށް ލިބިފައިވަނީ 8 ވަނަ އެވެ.

އެންމެ މަގުބޫލު ގައުމުގެ ގޮތުގައި ނިއު ޒީލެންޑް ހޮވިފައިވާއިރު، 2025 ވަނަ އަހަރުގެ ޓެލެގްރާފް ޓްރެވެލް އެވޯޑްސް ގައި ގާތްގަނޑަކަށް 20،000 ކިޔުންތެރިން ވޯޓުލީ ކަމަށް އެ ނޫހުން ބުނެފައި ވެއެވެ.

ރާއްޖޭގެ މަގްބޫލުކަން ވެއްޓިފައިވާ މިންވަރު ހައިރާން ކަމާ އެކު އެ ނޫހުން ވެސް ވަނީ ފާހަގަ ކޮށްފައެވެ.

"ދަ ޓެލެގްރާފް ޓްރެވެލް އެވޯޑްސްގެ ފާއިތުވި ހަ އަހަރުގައި، ކިޔުންތެރިން ދިވެހިރާއްޖެ ވަނީ ދެވަނަ ނުވަތަ ތިންވަނައަށް ރޭންކު ކޮށްފައެވެ، އެއަށްވުރެ ދަށަކުން ނޫނެވެ - އެހެން ކަމުން އަށް ވަނަ އަށް ވެއްޓުމަކީ ކުރިއާ އަޅާބަލާ އިރު ވަރަށް ބޮޑު ވެއްޓުމެކެވެ."

ރާއްޖޭގެ މަގުބޫލުކަން ކިޔުންތެރިންގެ މެދުގައި ވެއްޓުމުގެ ސަބަބުތައް ހުރެދާނެ ކަން ފާހަގަ ކުރަމުން އެ ނޫހުން ބުނެފައިވަނީ ގިނަފަހަރަށް ފަތުރުވެރިން ރާއްޖެ ދެކެނީ އަގުހެޔޮ ތަނެއްގެ ގޮތުގައެއް ނޫން ކަމަށާއި، އަގުތައް އުފުލި، ޚަރަދުތައް އިތުރުވަމުންދާ މި ދަނޑިވަޅުގައި، ދުބާއީ، ތައިލެންޑު، އަދި ސައޫދީ އަރަބިއްޔާ ފަދަ އަވީގެ އެހެން މަންޒިލް ތައް އިޚްތިޔާރު ކުރަނީ ކަމަށް ވުން އެކަށީގެންވާ ކަމަށް ބުނެފައިވެއެވެ. އެތަންތާނގައި ވެސް މޫދާ ކައިރީގައި ރީތި ތަންތަން ހުންނަ ކަމަށް ބުނެފައިވެއެވެ.

އަށް ވަނައިގައި ވިޔަސް، ދިވެހި ރާއްޖެ އަކީ އަދިވެސް، ގޮނޑުދޮށުގައި އަރާމު ކުރުމަށް ކިޔުންތެރިންގެ މެދުގައި އެންމެ މަގުބޫލު ތަން ކަމަށް ނޫހުގައި ވެއެވެ. އެ ގޮތުން ރޭކިން އަށް ބަލާއިރު އަތްވާއި އާއި ދޮންވެލީގެ މަޝްހޫރު އެހެން ޤައުމެއް ފެންނަން އޮތީ 18 ވަނައިގައި އޮތް މޮރިޝަސް ކަން ފާހަގަ ކޮށްފައިވެއެވެ. އަދި ކުރިއެކޭ ވެސް އެއް ގޮތައް ކެރިބިއަންގެ އެންމެ މަޤްބޫލު މިފަދަ މަންޒިލު ކަމުގައިވާ ބާބަޑޯސް ލިސްޓުގައި ފެންނަން އޮތީ ކުރިއެކޭ ވެސް އެއް ގޮތައް 31 ވަނައިގައި ކަން ފާހަގަ ކޮށްފައިވެއެވެ.

އިނގިރޭސި ވިލާތުގެ ދަ ޓެލެގްރާފް ނޫހުން ހޮވާ އެންމެ މަގްބޫލު މަންޒިލުތަކުގެ ލިސްޓުން ރާއްޖެ ބޮޑު ތަނުން ދަށަށް ދިޔައިރު އިނގިރޭސި މަޝްހޫރު ކްލަބް ލިވަރޕޫލް އާއި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އާ ދެމެދު ރާއްޖެ ޕްރޮމޯޓް ކުރުމުގެ ޕާޓްނަރޝިޕެއް ޤާއިމުކޮށް، ދިވެހިރާއްޖެ އެ ކްލަބުގެ ރަސްމީ ފަތުރުވެރިކަމުގެ މަންޒިލުގެ ޕާޓްނަރުގެ ގޮތުގައި ހަމަޖައްސާފައިވާ ކަމަށް ސަރުކާރުން ވަނީ ބުނެފައެވެ.

ލިވަރޕޫލް އެފްސީ އާ ގުޅިގެން ރާއްޖެ ޕްރޮމޯޓް ކުރުމުގެ ކެމްޕޭން ފެށުމަށް ރާއްޖޭގެ މަތީ ފެންވަރުގެ ވަފުދަކާ އެކު ރައީސް ޑރ. މުޙައްމަދު މުޢިއްޒު، އިނގިރޭސިވިލާތައް ދަތުރުފުޅެއް ވެސް އޭފްރީލް މަހުގެ ތެރޭގައި ވަނީ ކުރައްވާފައެވެ.

މި ޕާޓްނަރޝިޕް ގެ ސަބަބުން ދުނިޔޭގެ ފެންވަރުގައި ދިވެހިރާއްޖެ ފެންނަ މިންވަރު ވަރަށް ބޮޑަށް އިތުރުވެ، މަތީ ފަންތީގެ ފަތުރުވެރިން އިތުރަށް ރާއްޖެ އަށް ޝައުގުވެރިވެ، އަދި ޤައުމުގެ ފަތުރުވެރިކަމުގެ ސިނާޢަތަށް ވަރަށް ބޮޑެތި އިޤްތިޞާދީ ފައިދާތަކެއް ލިބިގެންދާނެ ކަމަށް ވެސް ސަރުކާރުން ވަނީ ބުނެފައެވެ.