އަލީ ވަހީދުގެ ޕާސްޕޯޓު މައްސަލައިގައި އަޑުބަރޭއަށް ޖަލުހުކުމެއް ކަނޑައަޅައި ދިނުމަށް އެދިއްޖެ

ޖިންސީ ގޯނާގެ ގިނަ ދައުވާ ތަކެއް ރައްދުވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓު ދޫކޮށްލަން ކްރިމިނަލް ކޯޓުން ކުރި އަމުރުގައި ޖާމިނުވި ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ (އަޑުބަރޭ)، އިގުރާރާއި ޚިލާފުވެފައި ވާތީ އޭނާގެ މައްޗަށް އެއް އަހަރު ދުވަހުގެ ޖަލު ހުކުމެއް ކަނޑައަޅައި ދިނުމަށް ކުރިމިނަލް ކޯޓުގައި ދައުލަތުން އެދިއްޖެއެވެ.

އަލީ ވަހީދުގެ މައްޗަށް ތުހުމަތުކުރެވޭ ޖިންސީ ގޯނާގެ މައްސަލައިގެ ތަހުގީގު ފެށުނު ހިސާބުން އޭނާގެ ޕާސްޕޯޓު އޮތީ ހިފަހައްޓާފައެވެ. އެހެން ނަމަވެސް މި މައްސަލައިގައި އަޑުބަރޭ ޖާމިނު ކުރުމަށްފަހު އަލީ ވަހީދުގެ ޕާސްޕޯޓު އަލުން ދޫކުރުމަށް ކްރިމިނަލް ކޯޓުން ވަނީ އަމުރު ކޮށްފައެވެ. ކްރިމިނަލް ކޯޓުން މިހެން އަމުރު ކޮށްފައި ވަނީ، އަލީ ވަހީދުގެ މެޑިކަލް ޗެކަޕެއް ހެދުމަށްފަހު، ޚަބީރެއްގެ ގޮތުގައި ޑރ. ޝާން ހާޒިރުކޮށް އޭނާގެ ހެކި ބަސްނަގައިގެންނެވެ.

އަޑުބަރޭ ޖާމިނުވި އިގުރާރުގައި ކޯޓުން ކަނޑައަޅާ ދުވަހެއްގައި އެ މީހަކު އަޑުއެހުމަށް ހާޒިރުކުރަންޖެހޭނެ ކަމަށް ބުނެފައި ވެއެވެ. އެކަމަކު ކްރިމިނަލް ކޯޓުގެ އަމުރު ހައިކޯޓުގައި އިސްތިއުނާފު ކުރުމުން، އިސްތިއުނާފުގެ އަޑުއެހުމަށް އަލީ ވަހީދު ކޯޓަށް ހާޒިރު ވެފައެއް ނުވެއެވެ. އެހެން ކަމުން، ޖާމިނުވި އިގުރާރުގައިވާ ޝަރުތުތަކާ އަޑުބަރޭ ޚިލާފުވެފައިވާތީ، ޖިނާއީ އިޖުރާއަތުގެ ގާނޫނުގެ 64 ވަނަ މާއްދާގެ ދަށުން ފިޔަވަޅު އަޅައި ދިނުމަށް ދައުލަތުން ވަނީ އެދިފައެވެ.

ޖާމިނުވާ ފަރާތުން އިގުރާރާ ޚިލާފު ވެއްޖެނަމަ އެޅޭނެ ފިޔަވަޅު ތަކެއް ޖިނާއީ އިޖުރާއަތުގެ ގާނޫނުގެ 64 ވަނަ މާއްދާގައި ބަޔާންކޮށްފައިވެއެވެ. އޭގެ ތެރޭގައި ހިމެނެނީ، އެއް އަހަރު ދުވަހަށް ޖަލަށްލުމާއި، ދެ އަހަރު ދުވަހަށް ގޭ ބަންދު ކުރުން ނުވަތަ 15000 ރުފިޔާއިން ޖޫރި މަނާ ކުރުމެވެ. އެހެންކަމުން މި މައްސަލައިގައި އެއް އަހަރު ދުވަހަށް އަޑުބަރޭ ޖަލަށް ލުމަށް ދައުލަތުން ވަނީ އެދިފައެވެ.

އަލީ ވަހީދުގެ މައްޗަށް ކުރެވިފައިވާ ދައުވާގެ އިތުރު އަޑުއެހުމެއް ބާއްވައި ދިނުމަށް ވެސް ކްރިމިނަލް ކޯޓުގައި ދައުލަތުން ވަނީ އެދިފައެވެ.

ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާ ކުރި ކަމުގެ ތުހުމަތުގައި އަލީ ވަހީދުގެ މައްޗަށް އުފުލާފައިވާ ދައުވާތަކަކީ ޖިންސީ އަނިޔާ ކުރުމުގެ ދައުވާ އާއި ޖިންސީ ގޯނާ ކުރުމުގެ ދައުވާ އާއި ޖިންސީ ގޯނާކުރަން އުޅުމުގެ ދައުވާ އާއި ރޭޕް ކުރަން އުޅުމުގެ ދައުވާ އާއި ބޭއަދަބީ ގޮތުގައި ލަދު ގުނަވަން ހާމަކުރުމުގެ ދައުވާ އާއި ހުއްދަނޫން ޖިންސީ މުއާމަލާތެއް ހިންގުމަށް އެދުމުގެ ކުށުގެ ދައުވާ އެވެ.