ޝަމީމުގެ ނަމެއް ނެތް، ޒިޔަތުގެ ނަން ހިމެނޭ
ވަކީލު ފީގެ ގޮތުގައި 3 މިލިއަން ރުފިޔާ ހަމަޖައްސައިދީފައިވާ ކަމަށް ފެތުރުނީ ދޮގު ޚަބަރެއް
އޮޑިޓަރ ޖެނެރަލް ހަސަން ޒިޔަތު އަދި ޕްރޮސެކިއުޓަރ ޖެނެރަލް ހުސައިން ޝަމީމް
އެމްއެމްޕީއާރްސީ ޚިޔާނާތުގެ މައްސަލައާ ގުޅޭ ރިޕޯޓާއެކު އާންމުކޮށްފައިވާ ލިސްޓުގައި ޕްރޮސެކިއުޓަރ ޖެނެރަލް ހުސައިން ޝަމީމްގެ ނަން ހިމެނޭކަމަށް ޚަބަރު ފެތުރުނުނަމަވެސް، ލިސްޓުގައި ޝަމީމްގެ ނަން ހިމެނިފައެއް ނުވެއެވެ.
ޝަމީމަށް 3 މިލިއަން ރުފިޔާ ލިބުނު ކަމަށް އެމްއެމްޕީއާރުސީ ޚިޔާނާތާއި ގުޅޭގޮތުން އެސްޓް ރިކަވަރީ ކޮމިޝަނުން ހެދި ރިޕޯޓުން ދައްކާފައިވާކަމަށް ބައެއް ނޫސްތަކުން ވަނީ ރިޕޯޓު ކޮށްފައެވެ. އެގޮތުން އަދީބު ހައްޔަރު ކުރުމުން ވަކީލު ފީގެ ގޮތުގައި 3 މިލިއަން ރުފިޔާ ހަމަޖައްސައިދީފައިވާ ކަމަށް މުހައްމަދު އައްލާމް ލަތީފުއާ ހަވާލާދީ މީގެ ކުރިން ރިޕޯޓު ކޮށްފައިވެއެވެ.
އެހެންނަމަވެސް، ބުދަ ދުވަހު މަޖިލީހުން މި މައްސަލައިގެ ލިސްޓު އާންމުކުރިއިރު، ޝަމީމްގެ ނަން ހިމެނިފައެއް ނުވެއެވެ. އެހެންނަމަވެސް، އާންމުކޮށްފައިވާ ލިސްޓުގައި އޮޑިޓަރ ޖެނެރަލް ހަސަން ޒިޔަތުގެ ނަން ހިމެނިފައިވެއެވެ. ޒިޔަތުގެ ނަން ހިމެނިފައިވަނީ މައުލޫމާތު ސާފު ކުރުމުގެ މަރުޙަލާގައިވާ ފަރާތެއްގެ ގޮތުގައެވެ.
ލިސްޓުގައި މީހުން ތިބީ ހެކިތަކުގެ މައްޗަށް ބިނާކޮށް ގިންތި ކޮށްފައެވެ. ގިންތިކޮށްފައިވަނީ ފައިސާގެ މަންފާ ލިބިފައިވާ މީހުންގެ އޭރުގެ މަގާމާއި މިހާރުގެ މަގާމުގެ އިތުރުން ފައިސާގެ އަދަދާއި އެހެނިހެން ކިތާބީ ހެކިތަކަށް ވަކި ޕޮއިންޓްތަކެއް ކަނޑައަޅައިގެންނެވެ. ޕޮއިންޓް އެންމެ ގިނައިން ދީފައި ވަނީ ދިހަޔަކާ ހަމައަށެވެ. ތުހުމަތުކުރެވޭ 281 މީހުންގެ ލިސްޓުގައި ދައުމަތުގެ އެކި ފަންތީގެ މަގާމުތަކުގައި ކުރިން ތިބި އަދި މިހާރު ވެސް މަގާމުތަކުގައި ތިބި 119 މީހަކު ހިމެނެއެވެ. ލިސްޓުގައި އެމީހަކަށް ލިބުނު ފައިސާގެ އަދަދު އެނގެން ނެތް ނަމަވެސް އެމީހަކު އަދާކުރީ ކޮން ވަޒީފާއެއްކަން ބަޔާންކޮށްފައިވެއެވެ.
