ބޮޑު ޚިޔާނާތުގެ ލިސްޓް އާންމުކުރާގޮތަށް ކޮމިޓީން ފާސްކޮށްފި
އެގޮތަށް ފާސްކޮށްފައިވަނީ ކޮމިޓީ މެމްބަރުންގެ އަޣްލަބިއްޔަތުން
ޖުޑިޝަރީ ކޮމިޓީ އާއި ސަލާމަތީ ހިދުމަތްތަކާ ބެހޭ ކޮމިޓީގެ ޖޮއިންޓް ކޮމިޓީގެ ބައްދަލުވުން
އެމްއެމްޕީއާރުސީގެ ހިޔާނާތުގެ ފައިސާގެ މައްސަލަ ބަލަމުން އަންނަ ޖުޑިޝަރީ ކޮމިޓީ އާއި ސަލާމަތީ ހިދުމަތްތަކާ ބެހޭ ކޮމިޓީގެ ޖޮއިންޓް ކޮމިޓީގެ ރިޕޯޓުގައި ޚިޔާނާތުގެ ލިސްޓު ހިމަނާ އާންމުކުރާ ގޮތަށް ކޮމިޓީން ފާސްކޮށްފިއެވެ.
މިގޮތަށް ފާސްކޮށްފައިވަނީ ޖޮއިންޓް ކޮމިޓީގެ ބައްދަލުވުމުގައި ރިޕޯޓް ފާސްކުރުމަށް ނެގުނު ވޯޓުގައި ބައިވެރިވެވަޑައިގެންނެވި ހުރިހާ މެމްބަރުންގެ އަޣްލަބިއްޔަތުންނެވެ.
ޖޮއިންޓް ކޮމިޓީގެ ބައްދަލުވުމުގައި ވަނީ މިމައްސަލަ ދިރާސާކުރި ސަބް ކޮމިޓީގެ ރިޕޯޓް އިއްވަވާފައެވެ. ރިޕޯޓް އިއްވަވަމުން ސަބް ކޮމިޓީގެ މުގައްރިރު މާފަންނު އުތުރު ދާއިރާގެ މެމްބަރ އިމްތިޔާޒު ފަހުމީ ވިދާޅުވީ ކޮމިޓީން މަސައްކަތްކުރަމުންދަނީ އެކި މަރުހަލާތަކަށް ބަހާލައިގެންކަމަށެވެ. އަދި އެކި މަރުހަލާތަކުގައި ކުރަމުންދާ މަސައްކަތުގެ މައްޗަށް އެކުލެވޭ ރިޕޯޓް އާންމުކުރަމުންދާނެ ކަމަށް އިންތި ވިދާޅުވިއެވެ.
މިކަން ދިރާސާކުރި ސަބް ކޮމިޓީން ބަލާފައިވަނީ އެސެޓް ރިކަވަރީ ކޮމިޝަނާއި، އެންޓި ކޮރަޕްޝަން ކޮމިޝަން (އޭސީސީ) އަދި ފުލުހުން ހިންގަމުންދާ ތަހުގީގުތަކެވެ. އެއަށްފަހު ސަބް ކޮމިޓީން އެކުލަވާލި ރިޕޯޓް ހުށަހަޅާފައިވާއިރު އާންމުކުރަން ނިންމާފައިވަނީ މުޅި ލިސްޓާއި ދައުލަތުގެ މަގާމުތަކުގައި ތިބި މީހުންގެ ނަންތައް ހިމެނޭ ލިސްޓް ވަކިންނެވެ.
ކޮމިޓީން މިހާރު ބަލަމުން އަންނަނީ ދައުލަތުގެ ވަޒީފާތަކުގައި ތިބި މީހުންގެ މައްސަލަތަކެވެ. އިންތި ވިދާޅުވީ މިމީހުންގެ ތެރޭގައި ސަލާމަތީ ޚިދުމަތްތަކާއި، ފުލުހުންނާއި، މިނިވަން މުއައްސަސާތަކާއި، ޖުޑީޝަރީ އާއި މަޖިލީހާއި ކެބިނެޓުގައި ކުރީގަޔާއި މިހާރު ހިމެނިވަޑައިގަންނަވާ ބޭފުޅުން ހިމެނޭކަމަށެވެ. އެގޮތަށް އެކަން ކުރަނީ މިމަގާމުތަކުގައި ތިބި މީހުންނަކީ ނުފޫޒުގެ ބޭނުންކުރެވޭ ހިސާބުތަކުގައި ތިބި މީހުން ކަމަށްވާތީ މިމައްސަލަތައް އަވަސްކުރުމަށް ތަހުގީގީ އިދާރާތަކަށް ބާރު އެޅުމަށެވެ. މިލިސްޓުގައި 119 މީހެއްގެ ނަން އެބައޮތެވެ.
ކޮމިޓީ ރިޕޯޓްގައި ވަނީ 8 ހުށަހެޅުމެއް ހުށަހަޅާފައެވެ. އެގޮތުން ރިޕޯޓްގައި ހިމަނާފައިވާ ލިސްޓްގައި ދައުލަތުގެ މުވައްޒަފުންގެ ގޮތުގައި މަސައްކަތްކޮށްފައިވާ ނުވަތަ މިހާރު މަސައްކަތްކުރަމުންދާ ފަރާތްތަކަކީ ދައުލަތުގެ އޮނިގަނޑުގެ ތެރެއިން މައުލޫމާތު ލިބޭނެ އަދި ނުފޫޒު ފޯރުވުމުގެ ފުރުސަތު އޮންނާނެ ފަރާތްތަކެއްކަމަށްވާތީ މިމައްސަލައިގެ ތަހުގީގު އަވަސްކުރުމަށް އެސެޓް ރިކަވަރީ ކޮމިޝަންގައި ދެންނެވުމަށް ކޮމިޓީން ހުށަހަޅާފައެވެ.
އަދި މިފަދަ ތަހުގީގުތައް ކުރިޔަށް ގެންދިޔުމުގައި އޭސީސީގެ މުވައްޒަފުންނާއި ފަންނީ ވަސީލަތްތައް އެންމެ ފުރިހަމަގޮތުގައި ބޭނުންކުރުމުގެ އިންތިޒާމުތައް ހަމަޖައްސައި ދިނުމަށް އޭސީސީގައި ދެންނެވުމަށްވެސް ވަނީ ނިންމާފައެވެ.
އެމްއެމްޕީއާރުސީގެ ވައްކަމާއި ޚިޔާނާތުގެ މައްސަލާގައި ފައިސާ ލިބިފައިވާ ފަރާތްތަކުގެ ތެރެއިން މިހާތަނަށް ތަހުގީގު ނިމިފައިވާ ފަރާތްތަކުގެ އަތުން އެފައިސާ އަނބުރާ ހޯދުމުގެ މަސައްކަތް ކުރިޔަށް ގެންދިޔުމަށް ދައުލަތުގެ ކަމާގުޅުންހުރި އިދާރާގައި ދެންނެވުމަށް ފެންނަކަމަށާއި އެމަސައްކަތް ކުރިޔަށް ގެންދާގޮތް ރައްޔިތުންގެ މަޖިލީހުން ބަލަމުން ގެންދިޔުމަށް ފެންނަކަމަށް ކޮމިޓީން ވަނީ ހުށަހަޅާފައެވެ.
މީގެއިތުރުން މިމައްސަލައިގައި ތުހުމަތުކުރެވޭ ފަރާތްތަކުގެ މައްސަލަތައް ތަހުގީގުކުރާއިރު އެފަރާތްތަކާމެދު އެވަގުތަކު އެޅެންހުރި މުހިންމު ފިޔަވަޅުތައް އެޅުމަށް ފެންނަކަމަށާއި އެގޮތުން ތުހުމަތުކުރެވޭ ފަރާތްތަކުގެ ތެރެއިން ދައުލަތުގެ މަގާމުތަކުގައި ވަކިކުރެވޭނެ ފަރާތްތައް އެވަގުތަކު ހުރި މަގާމަކުން ވަކިކުރުމަށް ފެންނަކަމަށެވެ.
އިންތިޚާބީ މަގާމުތަކުގައި ތިބި ފަރާތްތައް މަގާމުން ވަކި ކުރެވޭނީ އެފަރާތެއް އަމިއްލައަށް އެ މަގާމުން އިސްތިއުފާދިނުމުން ނުވަތަ ޝަރުޢީ ހުކުމަކުން ކަމަށްވާތީ، މިމައްސަލައިގައި ތުހުމަތުކުރެވޭ ފަރާތްތަކުގެ ތަހުގީގު އަވަސްކުރުމަށް އެސެޓް ރިކަވަރީގައި ދެންނެވުމަށް ފެންނަކަމަށް ވަނީ ކޮމިޓީން ހުށަހަޅާފައެވެ.
އެމްއެމްޕީއާރުސީގެ ވައްކަމާއި ޚިޔާނާތުގެ މައްސަލައިގެ ތަހުގީގަށް ބޭނުންވާ މައުލޫމާތުތައް ވީއެންމެ އަވަހަކަށް ދައުލަތުގެ އިދާރާތަކުންނާއި ބޭންކުތަކުން ފޯރުކޮށްދިނުމަށާއި ގާނޫނުގައި ލާޒިމްކޮށްފައިވާ ގޮތަށް ތަހުގީގީ އިދާރާތަކަށް އެއްބާރުލުން ދިނުމަށް އެފަރާތްތަކަށް ދެންނެވުމަށްވެސް ކޮމިޓީން ވަނީ ހުށަހަޅާފައެވެ.
ކޮމިޓީ ރިޕޯޓާއެކު އެމްއެމްޕީއާރުސީ މެދުވެރިކޮށް ހިންގާފައިވާ ވައްކަމާއި ޚިޔާނާތުގެ މައްސަލައިގައި ބައިވެރިވިކަމަށް ނުވަތަ މަންފާ ލިބުނުކަމަށް ތުހުމަތުކުރެވޭ 281 މީހެއްގެ ނަން ހިމެނޭ ލިސްޓް ހިމަނާފައެވެ. މިލިސްޓަކީ އެސެޓް ރިކަވަރީ ކޮމިޝަނުން މަޖިލީހާ ހިއްސާކޮށްފައިވާ ލިސްޓްކަމަށް ކޮމިޓީން ބުނެއެވެ.
