މިއަދު ހަވީރުގެ ނިޔަލަށް ފިތުރު ޒަކާތް ދޫކުރަނީ
ޒަކާތް ދޫކުރުމަށް ހަމަޖެހިފައިވަނީ ކީރިތި ޤުރުއާނާބެހޭ ޤައުމީ މަރުކަޒުން
އިސްލާމިކް މިނިސްޓްރީން ބުނެފައިވާ ގޮތުގައި ޒަކާތް ދޫކުރުމަށް ހަމަޖެހިފައިވަނީ އަލަށް އެކުލަވާލެވުނު ފަޤީރުންގެ ދަފްތަރުގައި ހިމެނޭ ފަރާތްތަކަށް
ފިތުރު ޒަކާތުގެ ގޮތުގައި ގޮވާމުން ދޫކޮށްފައިވާ ތަކެތި ބެހުމުގެ މަސައްކަތް އިސްލާމިކް މިނިސްޓްރީން ފަށައިފިއެވެ.
1442 ވަނަ އަހަރުގެ ފިޠުރު ޒަކާތުގެ ގޮތުގައި ގޮވާމުން ބަލައިގަނެވިފައިވާ ތަކެތި ދޫކުރުމާއި ބެހޭގޮތުން މިނިސްޓްރީން ނެރުނު ބަޔާނެއްގައި ބުނީ، ފިތުރު ޒަކާތުގެ ގޮތުގައި ގޮވާމުން ބަލައިގެންފައިވާ ތަކެތި ފަޤީރުންނާ މިސްކީނުންނަށް ދޫކުރުމަށް ހަމަޖެހިފައިވަނީ ބުދަ ދުވަހުގެ މެންދުރު ފަހު 15:30 އާ ހަމައަށް ކަމަށެވެ. ކޮވިޑް-19 ގެ ސަބަބުން ރައްކާތެރިކަމުގެ ފިޔަވަޅެއްގެ ގޮތުން ހަވީރު 16:00ން ފެށިގެން ހިންގާ ކާފިއުއަށް އަލިއަޅުވާލާ މިނިސްޓްރީން ވަނީ ލަސްނުކޮށް ޒަކާތާ ޙަވާލުވުމަށް އެދިފައެވެ.
މިނިސްޓްރީން ބުނީ، މިއަހަރު ފިތުރު ޒަކާތް ދޫކުރުމަށް ހަމަޖެހިފައިވަނީ އަލަށް އެކުލަވާލެވުނު ފަޤީރުންގެ ދަފްތަރުގައި ހިމެނޭ ފަރާތްތަކަށް ކަމަށެވެ. އަދި ޒަކާތް ދޫކުރާނީ އައިޑީކާޑް، ޕާސްޕޯޓު ނުވަތަ އުފަންދުވަހުގެ ސެޓްފިކެޓުގެ އަސްލު ލިބުމުންކަމަށް މިނިސްޓްރީން ބުނެފައިވެއެވެ.
ޒަކާތް ދޫކުރުމަށް ހަމަޖެހިފައިވަނީ ކީރިތި ޤުރުއާނާބެހޭ ޤައުމީ މަރުކަޒުންނެވެ.
