އުފަންދުވަހުގެ ޕާޓީއަކަށް ދައުވަތު ނުދީގެން ބޮޑު ލޭ އޮހޮރުވުމެއް ހިންގައިފި

އެމެރިކާގެ ކޮލޮރާޑޯ ސްޓޭޓްގެ ޒުވާނަކު އޭނާގެ ލޯބިވެރިޔާ އާއި ލޯބިވެރިޔާގެ އާއިލާއިން ފަސް މީހެއްގެ ގަޔަށް ބަޑިޖަހައި މަރާލައި އޭގެފަހުން އަމިއްލައަށް މަރުވެއްޖެއެވެ.

އުމުރުން 28 އަހަރުވީ ތިއޮޑޯރޯ މަސީއާސް ރުޅިއައީ އޭނާއަށް ދައުވަތު ނުދީ އުފަންދުވަހުގެ ޕާޓީއެއް ބޭއްވުމުންނެވެ. އެކަމާ ރުޅިއައިސްގެން ލޯބިވެރިޔާގެ ގެޔަށް ގޮސް އެވަގުތު ޕާޓީގައި ބައިވެރިވެގެން ތިބި މީހުންނަށް ބަޑިން ހަމަލަ ދިނީއެވެ. އެއަށްފަހު އަމިއްލަ ބޮލަށް ބަޑި ޖަހައިގެން އަމިއްލައަށް ވެސް މަރުވެގަތީއެވެ. މި ހާދިސާ ހިނގާފައިވަނީ މި ހަފުތާގެ އާދީއްތަ ދުވަހުއެވެ.

ފުލުހުން ބުނެފައިވަނީ މަރުވި މީހުންގެ ތެރޭގައި އުމުރުން 28 އަހަރުވީ ސަންޑްރާ ޕެރޭޒް ހިމެނޭ ކަމަށާއި ހަމަލަދިން ޒުވާނާޔާ ސަންޑްރާއާ ރައްޓެހިވެގެން އުޅޭތާ އަހަރެއް ވެދާނެ ކަމަށެވެ. ދެމީހުންގެ ދޭތެރޭގައި ވަރަށް ގިނައިން މައްސަލަ އުފެދޭ ކަމަށާއި އެންމެ ފަހުން އަރައިރުމެއް ހިނގާފައިވަނީ މީގެ ހަފުތާއެއް ކުރިން ކަމަށް އެނގިފައިވާ ކަމުގައެވެ.

ފުލުހުން މި ހާދިސާގެ ތަހުގީގު ކުރިއަށް ގެންދާއިރު މިހާތަނަށް ލިބިފައިހުރި މައުލޫމާތުތައް ހިއްސާ ކުރަމުން ބުނެފައިވަނީ ހަމަލާދިން ތިއޮޑޯރޯއަކީ ކުރިން ކުށުގެ ރިކޯޑު އޮތް މީހެއް ނޫންކަމަށެވެ. އެކަމަކު ކަންކަމާ ނިކަން އަވަހަށް ރުޅި އިސްކޮށް ލޯބިވެރިޔާގެ މައްޗަށް ޝައްކުކުރުން ވަރަށް ބޮޑު މީހެއް ކަމަށް ބުނެފައިވެއެވެ.

ކޮލޮރާޑޯ ސްޓޭޓަކީ އެމެރިކާގައިވެސް ބަޑި ޖަހައިގެން މީހުން މެރުން ގިނަ ސްޓޭޓެކެވެ. ފުލުހުން ބުނެފައިވަނީ އެންމެ ފަހުގެ ލޭ އޮހޮރުވުމުގައި ތިއޮޑޯރޯ ބޭނުން ކުރި ބަޑިޔަކީ ހުއްދަ ލިބިގެން ގެންގުޅުނު ބަޑިއެއް ނޫންކަމަށާއި އެކަމަކު އޭނާ ދާހައިތާކަށް ބަޑިވެސް ގެންދާކަމުގެ މައުލޫމާތު ލިބިފައިވާ ކަމަށެވެ.