ލަންކާގެ ބޮޑުވަޒީރު، ރައީސް ނަޝީދުގެ ހާލުކޮޅު ބައްލަވާލައްވައިފި

ލަންކާގެ ބޮޑުވަޒީރު މަހިންދަ ރާޖަޕަކްސާ، ރައީސް ނަޝީދުގެ ހާލުކޮޅު ބައްލަވައި ލައްވައިފިއެވެ.

ލަންކާގެ ވަޒީރު ވަނީ އަންގާރަ ދުވަހުގެ ހެނދުނު ރައީސް ނަޝީދުގެ ބައްޕާފުޅަށް ފޯނުން ގުޅުއްވައި ރައީސް ނަޝީދުގެ ސިއްޚީ ހާލުކޮޅު ބައްލަވާލައްވާފައެވެ. ބޮޑުވަޒީރު ވަނީ މިދިޔަ ހަފްތާގައި ރައީސް ނަޝީދަށް ކުރިމަތިވި މި ނުރައްކާތެރި ހާދިސާގައި އެމަނިކުފާނަށް ލިބިލެއްވި އަނިޔާ ތަކަށް އަވަސް ޝިފާއަކަށް އެދިވަޑައިގެންފައެވެ.

ރައީސް ނަޝީދަށް އަމާޒުކޮށްދިން މި ހަމަލާއާއެކު ދުނިޔޭގެ އެކި ގައުމުތަކުގެ ވެރިން އެމަނިކުފާނަށް އަވަސް ޝިފާއަކަށް އެދިވަޑައިގެން މެސެޖް ފޮނުއްވާފައިވެއެވެ.

ނަޝީދު ދިރިއުޅުއްވާ ކެނެރީގެ ކައިރީގައި ސައިކަލެއްގައި އައިއީޑީއެއް ގޮއްވާލުމުން އެމަނިކުފާނުގެ ހަށިކޮޅަށް 10 ރޭޒަރ ފުއް ވަދެފައިވެއެވެ. ހަށިގަނޑުގެ މުހިއްމު ގުނަވަންތައް ފޫއަޅުވާލި ރޭޒަރ ފުއްތައް ނަގަން 16 ގަޑިއިރުގެ އޮޕަރޭޝަންތަކެއް ކުރިއެވެ.

ނަޝީދަށް ފަރުވާ ދެއްވި އޭޑީކޭގެ ޑޮކްޓަރުންގެ ޓީމުން މީޑިއާތަކަށް އާއްމުކުރި މައުލޫމާތުން ރައީސް ނަޝީދުގެ ފުރާނަ ސަލާމަތްވީ ހަމަ ކިރިޔާކަން އެނގެއެވެ.

ހޭނައްތައިގެން ކުރި ސާޖަރީތަކަށް ފަހު ރައީސް ނަޝީދު ވެންޓިލޭޓަރުން ނެގީ މި ހަފުތާގައެވެ. އެހެންވިޔަސް ވަރަށް ރަނގަޅަށް މޮނިޓަކުރަން ޖެހޭ ކަަމަށާއި ރައީސް ނަޝީދު ހޮސްޕިޓަލުން ދޫކޮށްލުމާ ގުޅޭ ޕްލޭނެއް އަދި ނެތް ކަމަށް ޑޮކްޓަރުން ވަނީ ވިދާޅުވެފައެވެ.

ރައީސް ނަޝީދަށް ދިން ހަމަލާއާ ގުޅިގެން ތިން މީހަކު ވަނީ ހައްޔަރުކޮށް ބަންދުގެ މުއްދަތު ޖަހައިފައެވެ. މި ހަމަލާ އަމާޒުވި ސީދާ ސަބަބެއް އަދި ނޭނގުނުނަމަވެސް ބޮޑަށް ގުޅެނީ ހަރުކަށި ފިކުރާ ކަމަށް ފުުލުހުން މިހާތަނަށް އާއްމުކުރި މައުލޫމާތުތަކުން އެނގެއެވެ.