އީދަށް ހަނދުބެލުން މިއަދު ހަވީރުން ފެށިގެން ކުރިއަށްދާނެ
11 މެއި 2021 | އަންގާރަ 06:38މިއަދު ހަވީރު 5.30 ން ފެށިގެން ޑީޖޭއޭއާއި، ރަށްރަށުގެ މެޖިސްޓްރޭޓް ކޯޓުތަކާއި، ރަށު ކައުންސިލްގެ އަދި އަތޮޅު ކައުންސިލްގެ އިދާރާތައް ހުޅުވިފައި ހުންނާނެ
ފިތުރު އީދުގެ ހަނދު ސާބިތުކުރުން އަންގާރަ ދުވަހު ހަވީރުން ފެށިގެން ކުރިއަށްދާނެ
މި އަހަރުގެ ފިތުރު އީދުގެ ހަނދު ސާބިތުކުރުން އަންގާރަ ދުވަހު ހަވީރުން ފެށިގެން ކުރިއަށްދާނެ ކަމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނެފިއެވެ.
ހަނދު ސާބިތުކުރުމާ ގުޅޭ ގޮތުން ޑީޖޭއޭއިން ކުރި އިއުލާނުގައި ބުނީ، ކުރީ އަހަރުތަކެކޭ ވެސް އެއްފަދައިން މިއަހަރުވެސް ޝައްވާލުމަހުގެ ހަނދު ސާބިތު ކުރުމަށްޓަކައި ހަނދު ދުށް މީހަކު ނުވަތަ ބަޔަކު ހެކިބަސް އަދާކުރުމަށް ހަމަޖެހިފައިވަނީ މާލޭގައި ނަމަ މާލޭގެ ކޯޓެއްގެ ގާޒީއެއްގެ ކުރިމަތީގައި ކަމަށެވެ. އަދި އަތޮޅުތަކުގައި ނަމަ އެރަށެއްގެ މެޖިސްޓްރޭޓްކޯޓުގެ މެޖިސްޓްރޭޓެއްގެ ކުރި މަތީގައެވެ. މެޖިސްޓްރޭޓެއް ނެތް ރަށެއްގައިނަމަ އެވަގުތަކު ރަށުކައުންސިލްގެ އިދާރާ ހިންގެވުމާ ހަވާލުވެހުންނެވި އިސް ވެރިއެއްގެ ކުރިމަތީ ހެކިބަސްދެވޭނެ ކަމަށް ޑީޖޭއޭއިން ބުނެއެވެ.
ހަނދު ފެނިގެން އެކަމުގެ މައުލޫމާތުދޭއިރު ގާތްގަޑަކަށް ހަނދުހުރި އުސްމިނާއި، މިސްރާބާއި، އަދި މިނޫން ވެސް މިފަދަ މުހިންމު މައުލޫމާތު ދޭން ޖެހެއެވެ.
ޝައްވާލުމަހުގެ ހަނދުގެ މައްސަލަ ވަކިގޮތަކަށް ނިމެންދެން އަންގާރަ ދުވަހުގެ ހަވީރު 5:30 ން ފެށިގެން ޑީޖޭއޭއާއި، ރަށްރަށުގެ މެޖިސްޓްރޭޓް ކޯޓުތަކާއި، ރަށު ކައުންސިލްގެ އިދާރާތަކާއި، އަތޮޅު ކައުންސިލްގެ އިދާރާތައް ހުޅުވިފައި ހުންނާނެ ކަމަށް ޑީޖޭއޭއިން މައުލޫމާތުދެއެވެ.
ހަނދުފެނިގެން ހެކިބަސް އަދާކުރުމަށްޓަކައި އައުމާއި، ދިއުމުގެ ޚަރަދު ދޫކުރާގޮތަށް ޑީޖޭއޭއިން ވަނީ ނިންމާފައެވެ.
މިއަހަރުގެ ރަމަޟާން މަހުގެ އެއްވަނަ ދުވަސް ދިމާވީ މީލާދީ ކަލަންޑަރުން އޭޕްރީލް 13 ވަނަ ދުވަހާއެވެ. ހަނދު ސާބިތުވެއްޖެ ނަމަ ރަމަޟާން މަހުގެ ފަހު ދުވަހަކީ މެއިމަހުގެ 11 ވަނަ ދުވަހެވެ. އެހެންނަމަވެސް ކަލަންޑަރުގައި ވާގޮތުން، މި އަހަރުގެ ރޯދަ މަހުގެ ފަހު ދުވަހަކީ މި މަހުގެ 12 ވަނަ ދުވަހެވެ.
