ރައީސް ނަޝީދަށް ދިން ހަަމަލާ ތަހުގީގުކޮށް އިންސާފު ގާއިމުކުރުމަށް ކުރަން ޖެހުނު ކޮންމެ ކަމެއް ކުރާނަން: ހޯމް މިނިސްޓަރ
މިކަމުގައި ރައްޔިތުންގެ ފުރިހަމަ އެއްބާރުލުން ބޭނުންވޭ
ހޯމް މިނިސްޓަރ ޝެއިހް އިމްރާން އަބްދުﷲ
ބުރާސްފަތި ދުވަހުގެ ރޭ އިރާކޮޅު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާ ތަހުގީގުކޮށް އިންސާފު ގާއިމުކުރުމަށް ކުރަން ޖެހުނު ކޮންމެ ކަމެއް ކުރައްވާނެ ކަމަށް ހޯމް މިނިސްޓަރ ޝެއިހް އިމްރާން އަބްދުﷲ ވިދާޅުވެއްޖެއެވެ.
ހޮނިހިރު ދުވަހު އިމްރާން ކުރެއްވި ޓުވީޓެއްގައި ވިދާޅުވީ ތަހުގީގީ ބޭނުމަށް މީހުން ހައްޔަރުކޮށް ފިޔަވަޅު އަޅަމުންދަނީ ޖިނާއި އަދުލުގެ ނިޒާމު ރޭވިފައި އޮންނަ ގޮތަށް، އިޖުރާއަތުގެ ހަމަތަކަށް ރިޔާއަތްކޮށް ޝަރީއަތަށް ބޭނުންހިފޭ ހެކި ހޯދުމަށް އަމާޒުކޮށްގެން ކަމަށެވެ. އަދި މިކަމުގައި ރައްޔިތުންގެ ފުރިހަމަ އެއްބާރުލުން ބޭނުންވާ ކަމަށް ވެސް އިމްރާން ވިދާޅުވިއެވެ.
އިމްރާން އިތުރަށް ވިދާޅުވީ ރައީސް ނަޝީދަށް އަމާޒުކޮށް ދިން ޓެރަރިސްޓް ހަމަލާ ތަހުގީގުކޮށް އިންސާފު ގާއިމު ކުރުމަށް ފުލުހުން ކުރަންޖެހޭ ކޮންމެ ކަމެއް ކުރާނެ ކަމުގެ ފުރިހަމަ ޔަގީންކަން އަރުވާ ކަމަށެވެ.
މިނިސްޓަރ އިމްރާން މިހެން ވިދާޅުވެފައިވާއިރު ފުލުހުން ބުނެފައިވަނީ މި ޓެރަރިސްޓް ހަމަލާއާ ގުޅިގެން ދެމީހަކު ހައްޔަރުކޮށްފައިވާ ކަމަށެވެ. ރައީސް ނަޝީދަށް އަމާޒުކޮށް ދިން ހަމަލާއަކީ އެމަނިކުފާނުގެ ފުރާނަފުޅަށް އަމާޒުކޮށް ދިން ހަމަލާއެއްކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވެސް ވަނީ ވިދާޅުވެފައެވެ.
