މިއީ ސިޔާސީ ހަމަލާއެއް ނޫން، ޒަމާނީ ރާއްޖެއެއް އުފައްދަން ކުރި މަސައްކަތަށް ދިން ހަމަލާއެއް: އާޒިމް
7 މެއި 2021 | ހުކުރު 01:01ގައުމު މޮޑާން ގައުމަކަށް ހެދުމަށް އެންމެ އިސް ސަފުގައި މަސައްކަތްކުރައްވާ އެއް ބޭފުޅަކީ ރައީސް ނަޝީދު
އަލީ އާޒިމް - އެމްޑީޕީގެ ޕީޖީ ލީޑަރު އަދި މެދު ހެންވޭރު ދާއިރާގެ މެންބަރު
ރައީސް ނަޝީދަށް ދިން ހަމަލާއަކީ ސިޔާސީ ހަމަލާއެއް ނޫން ކަމަށާއި، އެއީ ރައީސް ނަޝީދު ޒަމާނީކޮށް ކުރައްވާ މަސައްކަތްތަކުގެ ސަބަބުން ދިން ހަމަލާއެއް ކަމަށް އެމްޑީޕީގެ ޕީޖީ ލީޑަރު އަދި މެދު ހެންވޭރު ދާއިރާގެ މެންބަރު އަލީ އާޒިމް ވިދާޅުވެއްޖެވެ.
އާޒިމް ވިދާޅުވީ ކިޔަވައިގެން ތިބި ޒުވާނުން އިތުރު ކުރެއްވުމަށާއި، މި ގައުމަކީ ޒަމާނީ ގައުމަކަށް ހެދުމަށް އެންމެ އިސް ސަފުގައި މަސައްކަތްކުރައްވާ އެއް ބޭފުޅަކީ ރައީސް ނަޝީދު ކަމަށެވެ. އެގޮތުން ރާއްޖެ އޮތީ ދަށް ފެންވަރެއްގައި ކަން ގަބޫލުކޮށް، ރާއްޖެ އިތުރަށް ތަރައްގީކުރަން އަބަދުވެސް މަސައްކަތްކުރައްވާ ކަމަށެވެ. އަދި އަބަދުވެސް މި ގައުމުގައި އަނދިރި ދައުލަތެއް އޮތްކަން ރައީސް ނަޝީދު ފާހަގަކުރައްވާ އެ ކަންކަމަށް ވަކާލާތުކުރައްވާ ކަމަށް ވިދާޅުވިއެވެ.
އާޒިމް ވިދާޅުވީ އެކަންކަމާ ހެދި ސޯޝަލް މީޑިއާގައި އެކި ޕޯސްޓުތައް އަބަދުވެސް ފެންނަ ކަމަށެވެ. ރައީސް ނަޝީދަކީ އިސްލާމެއް ނޫންކަމަށް ބުނެ އެމަނިކުފާނު ދުނިޔޭގައި ނުބަހައްޓަން ގޮވާލައި ކުރާ ޓުވީޓުތައް އަބަދުވެސް ފެންނަ ކަމަށް ވިދާޅުވިއެވެ. ރަނގަޅު ތަހުގީގެއް ކުރާނަމަ އެފަދަ ޓްވީޓްތައް ކުރާ ފަރާތްތައް މިހާރު ތިބެން ޖެހޭނީ ސުވާލުކުރުމަށްޓަކައި ހައްޔަރުކޮށްފައި ކަމަށެވެ.
އާޒިމް ވިދާޅުވީ މި ހާލަތުގައި ސިޔާސީ ޕާޓީތަކުން އަމަލުކުރާ ގޮތާއި މެދު ވަރަށް ހިންހަމަޖެހިވަޑައިގަންނަވާ ކަމަށެވެ. އެގޮތުން ރައްޔިތުންގެ މަޖިލީހުގައި ބުރާސްފަތި ދުވަހުގެ ރޭ ބޭއްވި ޖަލްސާގައި ވެސް ސިޔާސީ ޕާޓީތަކުން އަމަލުކުރީ ވަރަށް ގުޅިގެން ކަމަށެވެ. ސިޔާސީ ފިކުރުގައި ޖެހިގެން ނުތިބެ މިފަދަ އަމަލުތަކަކީ ރާއްޖެ ކުރިއަށް ގެންދެވޭނެ ކަންތައްތަކެއް ނޫންކަމަށް ގަބޫލުކުރީތީ ވަރަށް އުފާވާ ކަމަށް ވިދާޅުވިއެވެ
ރައީސް ނަޝީދަށް ދިން ހަމަލާ ސިޔާސީ ގިނަ ބަޔަކު ކުށްވެރިކޮށްފައިވާއިރު، އިދިކޮޅު ކޯލިޝަންއާއި ސަޕޯޓަރުން ވެސް ވަނީ އެކަން ކުށްވެރިކޮށް އެކަމާ ދެކޮޅަށް ނިކުމެފައެވެ.
