މިއީ އިޤްތިސާދާއި ޑިމޮކްރަސީއަށް ދިން ޙަމަލާއެއް، މިފަދަ ޙަމަލާއަކަށް ޖާގައެއް ނެތް: ރައީސް
އަނިޔާއާ ގުޅިގެން އިތުރަށް ހަދަންޖެހޭ އެސެސްމަންޓުތައް ހަދާފައިވޭ
ޤައުމާ މުޚާތަބު ކުރައްވައި ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ވާހަކަ ދައްކަވަނީ
މިއީ އިޤްތިސާދާއި ޑިމޮކްރަސީއަށް ދިން ޙަމަލާއެއް ކަމަށާއި މިފަދަ ޙަމަލާއަކަށް ޖާގައެއް ނެތް ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިޙު ވިދާޅުވެއްޖެއެވެ.
ޤައުމާ މުޚާތަބު ކުރައްވައި ދެއްކެވި ވާހަކަފުޅުގައި ރައީސް ސޯލިޙު ވިދާޅުވީ، ރައީސް ނަޝީދުގެ ހަށިކޮޅަށް އަމާޒުކޮށް ދިން ޙަމަލާ ކުށްވެރިކުރައްވާ ކަމަށެވެ. މި ޙަމަލާ ދިންތާ ކުޑަ ވަގުތުކޮޅެއްގެ ތެރޭގައި އޭޑީކޭއަށް ގެންގޮސް މިހާރު ފަރުވާދެމުންދާކަން ފާހަގަ ކުރައްވައި ރައީސް ވިދާޅުވީ، އެމަނިކުފާނަށް ލިބިވަޑައިގެންނެވި ޒަޚަމްތަކަށް ފަރުވާ ދިނުމަށް އިތުރު އޮޕަރޭޝަނެއް ކުރުމަށް ތައްޔާރުވަމުންދާ ކަމުގެ މައުލޫމާތު ލިބިވަޑައިގެންފައިވާ ކަމަށެވެ.
ރައީސް ވިދާޅުވީ، މި ޙަމަލާ ތަހުޤީޤު ކުރުމަށް ބޭރުގެ މާހިރުންގެ އެހީ ހޯއްދަވާނެ ކަމަށާއި، އެގޮތުން މި ޙަމަލާގެ ތަހުޤީޤަށް އޮސްޓްރޭލިއަން ފެޑެރަލް ޕޮލިސްގެ ޓީމެއް ހޮނިހިރު ދުވަހު ރާއްޖެ އަންނާނެ ކަމަށެވެ.
އޭގެ އިތުރުން، މިއީ ރާއްޖޭގެ ޑިމޮކްރަސީއާ އިޤްތިސާދަށް ދިން ޙަމަލާއެއްކަން ފާހަގަކުރައްވައި ރައީސް ވިދާޅުވީ، މިފަދަ ޙަމަލާތަކަށް ރާއްޖޭގެ ބިމުގައި އެއްވެސް ޖާގައެއް ނެތް ކަމަށެވެ.
ބުރާސްފަތި ދުވަހުގެރޭ ދިން މި ޙަމަލާއާ ގުޅިގެން ދުނިޔޭގެ ޤައުމުތަކުގެ އިސްވެރިންނާއި، ރާއްޖޭގެ އެކުވެރި ޤައުމުތަކުންވެސް ދަނީ ކަންބޮޑުވުން ފާޅު ކުރަމުންނެވެ. އަދި ބޭރުގެ ބޮޑެތި މީޑިއާތަކުންވެސް މި ޙަމަލާއާ ގުޅޭ ޚަބަރުތައް ގެނެސްދެމުންދާއިރު، މިއީ ނިރުބަވެރި ޙަމަލާއެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.
