އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް އަމާޒުކޮށް ދިން ޙަމަލާއާ ގުޅިގެން ލިބިވަޑައިގަތް އަނިޔާއަށް ފަރުވާ ހޯއްދެވުމަށް އިތުރު އޮޕަރޭޝަނަކަށް ތައްޔާރުވެއްޖެއެވެ.

އެކަނާ ހާމަކޮށް އޭޑިކޭއިން ކުރި ޓްވީޓެއްގައި ބުނީ، ރައީސް ނަޝީދަށް ލިބިވަޑައިގެންފައިވާ އަނިޔާއާ ގުޅިގެން އިތުރަށް ހަދަންޖެހޭ އެސެސްމަންޓުތައް ހަދަމުންދާ ކަމަށެވެ. އަދި އިތުރު ސަރޖަރީއެއް ހަދަންޖެހޭކަން ފާހަގަކޮށް އޭޑީކޭއިން ބުނީ، އެކަމުގެ ތައްޔާރީތައް މިހާރު ސްޕެޝަލިސްޓު ޓީމުތަކުން ކުރަމުންދާ ކަމަށެވެ.

މި ޙަމަލައާ ގުޅިގެން އެމަނިކުފާނުގެ 3 ހަށިފާރަވެރިއަކަށްވެސް އެކިވަރުގެ އަނިޔާތައް ވެފައިވާއިރު، އޭޑީކޭގައި ފަރުވާ ހޯދަމުން ދިޔަ ދެ އޮފިސަރުންނާއި، އައިޖީއެމްއެޗް ގައި ފަރުވާ ހޯދާފައިވާ އޮފިސަރުވެސް މިހާރު ވަނީ ދޫކޮށްލާފައެވެ.

އެކިވަރުގެ އަނިޔާތައް ލިބިވަޑައިގެން ރައީސް ނަޝީދު އޭޑީކޭއަށް ގެންދެވުނީ ބުރާސްފަތި ދުވަހުގެރޭ 08:30 ހާއިރުއެވެ. އެގޮތުން މަލްޓި ސްޕެޝަލިޓީ މެޑިކަލް ޓީމަކުން އެމަނިކުފާނަށް ފަރުވާދެމުންދާއިރު، އެމަނިކުފާނުގެ "ވައިޓަލްސް" ސްޓޭބަލްކަމަށް އޭޑީކޭއިން މީގެ ކުރިން ކުރި ޓްވީޓެއްގައި ބުނެފައިވެއެވެ.