އިޒްރޭލުގައި ސަރުކާރެއް އެކުލަވާލުމުގެ ފުރުސަތު އިދިކޮޅަށް
6 މެއި 2021 | ބުރާސްފަތި 12:29ސަރުކާރު އެކުލަވާލުމަށް ދީފައިވަނީ 28 ދުވަސް
ޔައިރް ލަޕީދު- ކޯލިޝަން ސަރުކާރެއް އެކުލަވާލުމަށް ރައީސް ވަނީ ހަވާލުކުރައްވާފައި
އިޒްރޭލުގައި ސަރުކާރެއް އެކުލަވާލުން އިދިކޮޅު ލީޑަރު ޔައީރު ލަޕީދުއާ ހަވާލު ކުރައްވައިފިއެވެ.
މިކަމަށް ރައީސް ރޫވެން ރިވްލިން ދެއްވާފައިވަނީ 28 ދުވަހުގެ މުހުލަތެކެވެ. މި ފުރުސަތު އިދިކޮޅު ލީޑަރަށް ލިބިވަޑައިގަތީ އިޒްރޭލުގެ މިހާރު ބޮޑުވަޒީރު ބެންޖަމިން ނަތަންޔާހޫއަށް ދެއްވި 28 ދުވަސް ފާއިތުވި އިރުވެސް ސަރުކާރެއް އެކުލަވާލެވިފައި ނުވާތީއެވެ.
އިޒްރޭލުގައި މާޗް 23 ގައި ގާނޫނު ހަދާ މަޖިލީހަށް މެމްބަރުން ހޮވަން ބޭއްވި އިންތިޚާބުގައި ސަރުކާރެއް އެކުލަވާލެވޭ ވަރަށް އެއްވެސް ޕާޓިއަކަށް ގޮނޑި ކާމިޔާބު ކުރެވިފައެއް ނުވެއެވެ.
ޔައީރު ލަޕީދުއަށް ދެއްވި 28 ދުވަސް ހަމަވާއިރު ވެސް ކޯލިޝަން ސަރުކާރެއް އެކުލަވައި ނުލެވިއްޖެނަމަ އެ މަސްއޫލިއްޔަތު ރައީސް ދެން ހުށަހަޅުއްވާނީ ގާނޫނު ހަދާ މަޖިލީހަށެވެ. އެތަނުގައި އެމްޕީން މެދުވެރިކޮށް ސަރުކާރެއް އެކުލަވައި ނުލެވިއްޖެނަމަ އަލުން އާ އިލެކްޝަނެއް ބާއްވަން ޖެހެއެވެ.
ބޮޑު ވަޒީރު ބެންޖަމިން ނަތަންޔާހޫއަށް ސަރުކާރެއް އެކުލަވާލުމުގައި ނާކާމިޔާބުވުމާ ގުޅިގެން އޭނާގެ ކުރިމަގާމެދު ވެސް މިހާރު އޮތީ ސުވާލު އުފެދިފައެވެ. މިއީ އޭނާގެ މައްޗަށް އުފުލާފައި ހުރި ކޮރަޕްޝަންގެ މައްސަލަތައް ތަންކޮޅެއް ބާރަށް ހިނގައިގަންނާނެ މަރުހަލާއަކަށް ވާނެކަމަށް ބެލެވެއެވެ.
