ތުރުކީ ސިފައިން ގަތަރުގައި ހަރަކާތްތެރިވާން ފުރުސަތު ދިނުމަކީ "އަސްކަރީ ގޮތުން ކަންކަން ހަލަބޮލިކުރަން އުޅޭ އުޅުމެއް": ބަހްރައިން
27 ޖޫން 2017 | އަންގާރަ 04:00ކުރިއަށް ހުރި ހަފްތާތަކުގެ ތެރޭގައި ތުރުކީ އާއި ގަަތަރުގެ އަސްކަރިއްޔާ އިން ގުޅިގެން އަސްކަރީ ތަމްރީންތަކެއް ހިންގާނެ
ގަތަރުގައި ހަަަރަކާތްތެރިވާ ތުރުކީގެ ސިފައިން 1000 އަށް އިތުރުވާނެ ކަމަށް ބެލެވޭ
ތުރުކީގެ ސިފައިން ގަތަރަށް ވަނުމަށް ހުއްދަދީ އަދި މިހާރު އޮތް ފައުޖު ބޮޑު ކުރަން ގަތަރުން ފުރުސަތު ދިނުމަކީ "އަސްކަރީގޮތުން ކަންކަން ހަލަބޮލިކުރަން" އުޅޭ އުޅުމެއް ކަމަށް ބަހްރައިން އިން ތުހުމަތުކޮށްފިއެވެ.
ގަތަރުން ޓެރަރިޒަމަށް ހިއްވަރުދޭ ކަމަށް ބުނެ ގަތަރާ އެކު އޮންނަ ޑިޕްލޮމެޓިކް ގުޅުން ގަލްފުގެ ހަ ގައުމުކުން ކަނޑާލާފައިވާއިރު ގަތަރުގެ މަގުތަކުގައި ތުރުކީގެ އަސްކަރިއްޔާ ހަރަކާތްތެރިވަމުންދާ ވީޑިއޯ އާންމުވުމުގެ ސަބަބުން ގަލްފުގެ ގައުމުތަކުން ވަނީ އެކަމާ ވަރަށް ހިތްހަމަނުޖެހިފައެވެ.
ބަހްރައިންގެ ޚާރިޖީ ވަޒީރު ޝެއިޚް ހާލިދު ބިން އަހްމަދު އަލް-ހަލީފާ ވިދާޅުވީ ގަތަަރުން މިހާރު އަމަލު ކުރަމުންދާ ގޮތުގެ ސަބަބުން ހަމައެކަނި މައްސަލަ އިތުރަށް ގޯސްވުން ނޫން ކަމެއް ނުވާނެ ކަމަށެެވެ. އޭނާ ވިދާޅުވީ ގަތަރާ މެދު މިހާރު އުފެދިފައިވާ ހިޔާލު ތަފާތުވުމަކީ ސިޔާސީ އަދި ސަލާމަތްތެރިކަމާ ގުޅިފައިވާ މައްސަލައެއް ކަމަށެވެ. އެއީ އެއްވެސް ގޮތަކުން އަސްކަރީ ކަމަކާ ގުޅޭ މައްސަލައެއް ނޫން ކަމަށް އޭނާ ވިދާޅުވިއެވެ. އަދި ގަަތަރުން ބޭރު ގައުމެއްގެ އަސްކަރިއްޔާ އެގައުމުގައި ހަރަކާތްތެރިވާން ފުރުސަތު ދިނުމަކީ އަސްކަރީ ގޮތުން ކަންކަން ހަލަބޮލި ކުރުން ކަމަށާއި އަދި އެކަމުގެ ސަބަބުން ނިކުންނަ ނަތީޖާ އާ ގަތަރު ކުރިމަތިލާން ޖެހޭނެ ކަމަށެވެ.
ގަލްފުގެ މައްސަލަ ފެންމަތިވުމުގެ ކުރިން ގަތަރުގައި ތުރުކީގެ 100 ވަރަަކަށް ސިފައިން ހަރަކާތްތެރިވަމުން ދިޔައިރު، މައްސަލަ ފެންމަތިވުމަށް ފަހު ތުރުކީގެ ގާނޫނު ހަދާ މަޖިލީހުން ވަނީ ގަތަރުގައި ހަރަކާތްތެރިވާ އެގައުމުގެ ސިފައިން އިތުރު ކުރުމަށް ނިންމާފައެވެ.
ރިޕޯޓުތައް ބުނާ ގޮތުން ގަތަރުގައި ހަަަރަކާތްތެރިވާ ތުރުކީގެ ސިފައިންގެ އަަދަދު 1000 އަށް އިތުރުވާނެ ކަމަށް ބެލެވޭއިރު ކުރިއަށް އޮތް ހަފްތާތަކުގެ ތެރޭގައި ތުރުކީ އާއި ގަަތަރުގެ އަސްކަރިއްޔާ އިން ގުޅިގެން އަސްކަރީ ތަމްރީންތަކެއް ހިންގާނެއެވެ.
ގަތަރުން ޓެރަރިޒަމަށް ހިތްވަރު ދޭ ކަމަށް ބުނެ ގަތަރާ އޮންނަ ޑިޕްލޮމިޓިކް ގުޅުން އަރަބި ހަ ގައުމަކުން ކަނޑާލާފައިވާއިރު އެގައުމުތަކަކީ ސައުދީ އަރަބިއްޔާ، ޔޫއޭއީ، މިސްރު، ބަހްރައިން, ޔަމަން އަދި ލީބިޔާ އެވެ. ގަތަރާ މެދު ކުރެވޭ އެންމެހާ ތުހުމަތުތައް ގަތަރުން ދޮގު ކުރެއެވެ.ސައުދީ، ޔޫއޭއީ ބަހްރައިން އިން އިން ވަނީ ގަތަރާ އޮންނަ ޑިޕްލޮމެޓިކް ގުޅުން ކަނޑާލުމުގެ އިތުރަށް އެގައުމުތަކުގެ ވައި، ކަނޑު އަދި އެއްގަމު މަގުވެސް ގަަތަރަށް ބަންދުކޮށްފައެވެ.
