އިޒްރޭލުގައި ހުންނަ އެމެރިކާ އެމްބަސީ ގުދުސް އަށް ބަދަލު ކުރަނީ!

އިޒްރޭލުގެ ޓެލް އަވީވްގައި ހުންނަ އެމެރިކާގެ އެމްބަސީ، ޤުދުސް އަށް ބަދަލު ކުރުމަށް ނިންމާފައިވާ ކަމުގެ މަޢުލޫމާތު ފަލަސްތީނުގެ ރައީސް މަޙުމޫދު އައްބާސްއާ، އެމެރިކާގެ ރައީސް ޑޮނަލްޑް ޓްރަމްޕް ހިއްސާކުރައްވައިފި އެވެ.

ފަލަސްތީނުގެ ރަސްމީ ނޫސް އޭޖެންސީ ވަފާ އިން އަންގާރަ ދުވަހު އާއްމުކުރި ރިޕޯޓެއްގައި ވަނީ، ފަލަސްތީނާއި އިޒްރޭލާއި ދެމެދު ޚިޔާލުތަފާތުވުން އުފެދިފައިވާ ޤުދުސް އަށް އެމެރިކާގެ އެމްބަސީ ބަދަލު ކުރުމުގެ ވާހަކަ ފަލަސްތީނުގެ ރައީސްއާއި ހިއްސާ ކުރައްވާފައި ވަނީ އެމެރިކާގެ ރައީސް ކުރެއްވި ފޯން ކޯލެއްގައި ކަމަށެވެ.

އަދި، އެމެރިކާގެ ރައީސް ޑޮނަލްޑް ޓްރަމްޕްގެ މިނިންމެވުމުގެ ސަބަބުން، ސުލްހައިގެ މަސައްކަތްތަކަށާއި، އެސަރަޙައްދާއި ދުނިޔޭގެ ސުލްހައާއި ސަލާމަތާއި ރައްކާތެރިކަމަށް ކުރިމަތިވެދާނެ ނުރައްކާތެރި މައްސަލަތައް އެމެރިކާގެ ރައީސަށް ފަލަސްތީނުގެ ރައީސް މަހުމޫދު އައްބާސް ހިއްސާ ކުރެއްވި ކަމަށް އައްބާސްގެ ތަރުޖަމާނު ނާބިލް އަބޫ ރުދެއިނާ ވިދާޅުވި އެވެ.

އިޒްރޭލުގައި ހުންނަ އެމެރިކާގެ އެމްބަސީ ޤުދުސް އަށް ބަދަލު ކުރުމުގެ ނިންމެވުމާއި ގުޅޭ އިތުރު ތަފްސީލް ދެއްވާފައެއްނުވެއެވެ.

މިޚަބަރު ފެތުރުމާއެކު އުރުދުންގެ ޝާހީ ގަނޑުވަރުން ވަނީ، އެ މައުލޫމާތު އުރުދުންގެ ރަސްގެފާނު އަބްދުﷲ އާވެސް، ޓްރަމްޕް ހިއްސާ ކުރައްވާފައިވާ ކަމަށް ބުނެ ބަޔާނެއް ނެރެފައެވެ.

އަދި، އެކަމުގެ ސަބަބުން ނުކުމެދާނެ މައްސަލަތައް އުރުދުންގެ ރަސްގެފާނުވެސް ޓްރަމްޕާއި ހިއްސާ ކުރައްވާފައިވާ ކަމަށް އެބަޔާނުގައިވެއެވެ.

އިޒްރޭލާއި ފަލަސްތީނާއި ދެމެދުވާ ހިޔާލުތަފާތުވުންތަކުގެ ތެރެއިން އެންމެ ނާޒުކު މައްސަލައަކީ ގުދުސްގެ މައްސަލައެވެ.

1967 ވަނަ އަހަރު ކުރި ހަނގުރާމާގައި އިޒްރޭލުން އިރުމަތީ ގުދުސް ހިފުމަށްފަހު، އިޒްރޭލުން ބަލަނީ އިރުމަތީ ގުދުސް އަކީ އެމީހުންގެ ވެރިރަށުގެ ގޮތުގައެވެ. އެހެންނަމަވެސް ފަލަސްތީނުން ބޭނުން ވަނީ ފަލަސްތީނުގެ މިނިވަން ދައުލަތެއް އުފެދުމުން، އެ ދައުލަތުގެ ވެރިރަށުގެ ގޮތުގައި އިރުމަތީ ގުދުސް ހެދުމަށެވެ.

ގުދުސްގައި މިހާތަނަށް އެއްވެސް ގައުމެއްގެ އެމްބަސީ އެއް ގާއިމްކޮށްފައެއްނުވެއެވެ. އަދި ގުދުސް އަކީ އިޒްރޭލުގެ އިހްތިސާސް ހިނގާ އިޒްރޭލުގެ ސަހަރެއްގެ ގޮތުގައި ބައިނަލްއަގްވާމީ މުޖުތަމައު އިން ބަލައިގަނެފައެއްނުވެއެވެ.