ހުރިހާ އިދިކޮޅު ކެންޑިޑޭޓުންނަށް ފުރުސަތު ބަންދު، އިންތިޚާބުގައި ސީސީގެ ނަންފުޅު އެކަނި!

މިޞްރުގެ ރިޔާސީ އިންތިޚާބުގައި ވާދަކުރައްވާނެކަމަށް ކުރިން އިޢުލާންކުރެއްވި މަޝްހޫރު ޤާނޫނީ ވަކީލު ޚާލިދު ޢަލީ، އިންތިޚާބުގައި ވާދަނުކުރައްވާނެކަން އިޢުލާން ކުރައްވައިފިއެވެ.

ޢަލީ އިންތިޚާބުގައި ވާދަނުކުރައްވާނެކަން ހާމަކުރެއްވީ ބުދަ ދުވަހު ވެރިރަށް ޤާހިރާގައި ބޭއްވި ނޫސްވެރިންގެ ބައްދަލުވުމެއްގައެވެ. އޭނާ ވިދާޅުވީ އިންތިޚާބުގައި ވާދަކުރޭވޭނެ މާހައުލެއް ނެތް ކަމަށާއި، އިންތިޚާބުގައި ވާދަކުރުމަށް ބޭނުންވާ ލިޔެކިޔުންތައް ހުށަނާޅުއްވާނެ ކަމަށެވެ. ޢަލީ ވަނީ 2012 ވަނަ އަހަރުވެސް އިންތިޚާބުގައި ވާދަކުރައްވާފައެވެ. އޭނާއަކީ އިންސާނީ ހައްޤުތަކަށް ވަކާލާތު ކުރެއްވުމަށް މިސްރުގައި މަޝްހޫރު ބޭފުޅެކެވެ.

އޭނާގެ މައްޗަށް މިހާރުވަނީ އާއްމުތަނެއްގައި އާއްމު މިންގަނޑުތަކާއި ޚިލާފު އަމަލެއް ހިންގަވާފައިވާ ކަމަށް ނިންމައި، 3 އަަހަރުގެ ޖަލު ޙުކުމެއް އިއްވާފައެވެ. އެހެން ނަމަވެސް އެޙުކުމަށް ޢަމަލުކުރުން ވަނީ ލަސްކޮށްފައެވެ. ފާޑުކިޔާ ފަރާތްތަކުން ބުނާ ގޮތުގައި މިއީ ޢަލީއަށް އިންތިޚާބުގައި ވާދަ ނުކުރެވޭ ގޮތް ހެދުމަށްޓަކައި ސިޔާސީ ގޮތުން ރައީސް އަބްދުލްފައްތާޙު ސީސީގެ ސަރުކާރުން ޖެހި ދަންތުރައެކެވެ.

މިހާރު އޮތް ގޮތުން އިންތިޚާބުގައި ވާދަކުރައްވާނީ ސީސީ އެކަންޏެވެ. މިސްރުގެ ރިޔާސީ އިންތިޚާބު އޮންނާނީ މާޗް މަހުގެ 26 އިން 28 އަށެވެ.

މިސްރުގެ އަސްކަރިއްޔާއިން ވަނީ އިންތިޚާބުގައި ވާދަކުރައްވާނެކަން އިއުލާން ކުރެއްވި އަސްކަރިއްޔާގެ ކުރީގެ ވެރިއެއް ކަމަށްވާ ސާމީ އަނާން ވެސް ހައްޔަރު ކޮށްފައެވެ. އޭނާ ހައްޔަރު ކޮށްފައިވަނީ ވަގު ޑޮކިއުމަންޓްތަކެއް ހެއްދެވިކަމުގެ ތުހުމަތުގަޔާއި، އަސްކަރީ ބާރުތަކާއި ބެހޭ އެންމެ މަތީ ކައުންސިލްގެ ހުއްދަ ނުޙޯދައި، އިންތިޚާބުގައި ވާދަކުރައްވަން ނިންމެވުމާއި ގުޅިގެންނެވެ.

ސީސީގެ ސަރުކާރުން ގެންދަނީ އިންތިޚާބުގައި ވާދަކުރާނެކަން އިއުލާންކުރާ ސިޔާސީ އެންމެންނަށް ބިރު ދައްކައި، ފިއްތުންތައް ކުރިމަތިކުރަމުންނެވެ.

ސީސީއަކީވެސް އަސްކަރިއްޔާގެ ކުރީގެ ވެރިއެކެވެ. އޭނާ ވެރިކަމަށް ވަޑައިގަތީ މިސްރުގައި މިނިވަން އިންތިޚާބަކުން ވެރިކަމަށް ވަޑައިގަތް ފުރަތަމަ ރައީސް މުހައްމަދު މުރްސީގެ ސަރުކާރު އަސްކަރީ ބަޣާވާތަކުން ވައްޓާލުމަށް ފަހު 2013 ވަނަ އަހަރުއެވެ. އަދި އޭގެ އަހަރެއްފަހުން ބޭއްވި ރިޔާސީ އިންތިޚާބު ކާމިޔާބުކުރެއްވިއެވެ. މިފަހަރު ސީސީ އެކުރިމަތިލެއްވީ ވެރިކަމުގެ 2 ވަނަ ދައުރަށެވެ. މިސްރުގެ ރިޔާސީ ދައުރުގެ މުއްދަތަކީ 4 އަހަރެވެ.