އިންޑިއާގައި ރެކޯޑެއް، އެއްދުވަހާ ޕޮޒިޓިވްވި މީހުންގެ އަދަދު ހަތަރު ލައްކަ އަށްވުރެ މަތި

އިންޑިއާގެ ކޮވިޑް-19ގެ ހާލަތު ގޯސްވެފައިވާއިރު ވައިރަސްއަށް ޕޮޒިޓިވްވާ މީހުންނާއި މި ބަލީގައި މަރުވާ މީހުންގެ އަދަދު ދުވަހެއް ދުވަހަކަށް މި އަންނަނީ އިތުރުވަމުންނެވެ.

އެގޮތުން އިންޑިއާގައި އެއްދުވަހާ ރެކޯޑް އަދަދަކަށް މީހުން ޕޮޒިޓިވްވެ، ވައިރަސް ޖެހިގެން މިވަނީ މަރުވެފައެވެ. އިންޑިއާގެ ހެލްތް މިނިސްޓްރީން ހާމަކޮށްފައިވާ ގޮތުން ފާއިތުވެ ދިޔަ 24 ގަޑިއިރު ތެރޭގައި 412,262 މީހުން ވައިރަސްއަށް ޕޮޒިޓިވްވެފައިވާއިރު 3,980 މީހުން ވަނީ ވައިރަސް ޖެހިގެން މަރުވެފައެވެ.

އިންޑިއާގެ ހާލަތު ދުވަހެއް ދުވަހަކަށް ދަށަށް ދާއިރު އެ ގައުމުގެ ހޮސްޕިޓަލްތަކަށް އޮކްސިޖަން ލިބުން ދަތިވެ، ބަލިޖެހޭ މީހުންނަށް އެންމެ އެކަށޭނެ ގޮތުގައި ފަރުވާނުދެވޭތީ ހޮސްޕިޓަލްތަކުން ވަނީ އެ މައްސަލަ ދިއްލީގެ ހައިކޯޓަށް ވެސް ހުށަހަޅާފައެވެ. ކޯޓުން ވަނީ ހޮސްޕިޓަލްތަކަށް އޮކްސިޖަން ފޯރުކޮށްދިނުމަށް އަމުރު ވެސް ކޮށްފައެވެ.

އިންޑިއާއިން އޮކްސިޖަންގެ ސަޕްލައި މަދުވަމުންދާ މައްސަލައާ ކުރިމަތިލާއިރު، އެގައުމުން ކޮވިޑް-19ށް ޕޮޒިޓިވްވި މީހުންގެ ޖުމްލަ އަދަދު މިހާރު ވަނީ 20 މިލިއަން ފަހަނައަޅައި ގޮސްފައެވެ.

އިންޑިއާގެ ކޮވިޑް-19ގެ ހާލަތު ގޯސްވެފައި މިވަނީ ކޮންބައެއްގެ އިހުމާލުންތޯ ސަރުކާރުން އެކަކު އަނެކަކަށް އިނގިލި ދިއްކުރަމުންދާއިރު، ބަލިޖެހޭ މީހުންގެ ނަންބަރުތައް އިތުރުވެ ހޮސްޕިޓަލްތައް ވަނީ ފުރި ބާރުވެފައެވެ.