ފިތުރު ޒަކާތް ދެއްކި މީހުންގެ އަދަދު ކުރީ އަހަރުތަކާ އަޅާބަލާއިރު މަދު: މިނިސްޓަރ

މިހާތަނަށް ފިތުރު ޒަކާތް ދައްކާފައިވާ މީހުންގެ އަދަދު އޭގެ ކުރީ އަހަރުތަކާއި އަޅާބަލާއިރު މަދު ކަމަށް އިސްލާމިކް މިނިސްޓަރ ޑރ އަހުމަދު ޒާހިރު އަލީ ވިދާޅުވެއްޖެއެވެ.

ބުދަ ދުވަހުގެރޭ މިނިސްޓަރ ކުރެއްވި ޓްވީޓެއްގައި ވިދާޅުވީ، މިއަހަރުގެ އަދަދުތަކަށް ބަލާއިރު ފިތުރު ޒަކާތް ދެއްކި މީހުންގެ އަދަދުތައް އޭގެ ކުރީ އަހަރުތަކާއި އަޅާބަލާއިރު މަދު ކަމަށާއި، ފިތުރު ޒަކާތް އަވަހަށް ދެއްކުން މުހިއްމު ކަމަށެވެ. މިނިސްޓަރ ވަނީ ފަހު ވަގުތަށް މަޑު ނުކުރައްވައި އަވަހަށް ޒަކާތް ދެެއްކުމަށް ސަމާލުވުމަށް އެދިވަޑައިގަންނަވާފައެވެ.

މިނިސްޓަރ ވިދާޅުވީ، ފައިސާއާއި ގޮވާމުންވެސް ފިތުރު ޒަކާތް ދެއްކުމުގެ އިންތިޒާމު ހަމަޖެހިފައިވާ ކަމަށެވެ.

އޭޕްރީލް މަހުގެ ނިޔަލަށް މިނިސްޓްރީން އާންމުކުރި ތަފާސްހިސާބުތަކަށް ބަލާއިރު، މާލޭ ސިޓީން 20,863 މީހުން ފިތުރު ޒަކާތް ދައްކާފައިވެއެވެ. އަދި ފިތުރު ޒަކާތުގެ ގޮތުގައި މިހާތަނަށް މާލެ ސިޓީން 8 ލައްކަ ރުފިޔާ ދައްކާފައިވާކަމަށް އިސްލާމިކް މިނިސްޓްރީން ވަނީ ބުނެފައެވެ.

މިނިސްޓްރީން ބުނީ، 1442 ވަނަ އަހަރުގެ ރަމަޟާންމަހުގެ 12 ވަނަ ދުވަހާ ހަމައަށް މާލޭ ސިޓީން ފިޠުރު ޒަކާތުގެ ގޮތުގައި 899،031.00ރ ލިބިފައިވާ ކަމަށެވެ. އަދި އެއީ ޖުމްލަ 20،863 މީހުންގެ ފަރާތުން ލިބިފައިވާ އަދަދުކަން މިނިސްޓްރީން ފާހަގަކޮށްފައިވެއެވެ.