ރައީސް މުއިއްޒުގެ ވައުދުވެވަޑައިގެންނެވި ކެންދޫ 2 ބުރި މިސްކިތާއި ގުޅޭގޮތުން ރައީސްގެ ޖަވާބެއް ނެތް
ރައީސް މުއިއްޒު ކެމްޕޭނުގައި ކެންދޫގެ މިސްކިތް 2 ބުރިއަށް ނަންގަވައިދެއްވާނެ ކަމަށް ވައުދުވެވަޑައިގަތް
ރައީސް މުއިއްޒު ކެންދޫ ކައުންސިލާއެކު ބޭއްވި ބައްދަލުވުމުގެ ތެރެއިން، ކެންދޫ މިސްކިތާއި ގުޅޭ ސުވާލަށް ރައީސްގެ ޖަވާބެއް ނެތް
ރައީސް ޑރ. މުހައްމަދު މުއިއްޒުގެ ވައުދުވެވަޑައިގެންނެވި ކެންދޫގައި 2 ބުރިއަށް އަޅާ މިސްކިތާއި ގުޅޭގޮތުން ސުވާލުކުރެއްވުމުން ރައީސް ޖަވާބެއް ނުދެއްވި ކަމަށް ކެންދޫ ކައުންސިލްގެ ރައީސް އިބްރާހީމް ޢަބްދުއްރަޙުމާން ވިދާޅުވެއްޖެ އެވެ.
ބ. އަތޮޅަށް ކުރައްވަމުން ގެންދަވާ ދަތުރުފުޅުގައި ރައީސް މުއިއްޒު ކެންދޫއަށް ވަޑައިގެންނެވީ ހޯމަ ދުވަހުއެވެ. އަދި އެރަށު ކައުންސިލާއި، އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރުންނާއި މުއައްސާސާތަކުގެ އިސްވެރިންނާއި ބައްދަލުކުރައްވާފައިވެއެވެ.
ކައުންސިލްގެ ރައީސް އިބްރާހިމް އަބްދުއްރަހުމާން ވިދާޅުވީ ކެންދޫގައި ކުރީ ސަރުކާރުން އަޅަންފެށި މިސްކިތް 2 ބުރިއަށް ނަންގަވައިދެއްވާނެ ކަމަށް ރައީސް ޑރ. މުހައްމަދު މުއިއްޒު ވައުދުވެވަޑައިގެންފައިވަނީ 2023 ވަނަ އަހަރު ކެމްޕޭނުގައި އެރަށަށް ވަޑައިގެން ކަމަށެވެ. އެއިރު އެރަށުގައި ޒަމާނީ ރީތި މިސްކިތެއް ބިނާކުުރުމަށް އޮތީ ބަޔަކާއި ހަވާލުކޮށް މަސައްކަތްވެސް ފަށާފައެވެ.
އެއީ 500 މީހުންގެ ޖާގައިގެ މިސްކިތެކެވެ. މި ޕްރޮޖެކްޓަކަށް 15,424,823.52 (ފަނަރަ މިލިއަން ހަތަރު ލައްކަ، ސައުވީސް ހާސް އަށްސަތޭކަ ތޭވީސް ރުފިޔާ ފަންސާސް ދެ ލާރި) ޚަރަދުވާނެ ކަމަށް އެއިރު ފިނޭންސް މިނިސްޓްރީން ބުންޏެވެ.
ނަމަވެސް ކެމްޕޭނަށް ވަޑައިގެން ކެންދޫ ރައްޔިތުންނަށް ކޮށްދެއްވާ ކަމެއްގެ ގޮތުގައި މިސްކިތް 2 ބުރިއަށް ހިއްލާލައްވާ އެކަމަށް ބޭނުންވާ ބަޖެޓް ހަމަޖައްްސަވާ މަސައްކަތް ކުރިއަށްގެންދަވާނެކަމަށް ރައީސް މުއިއްޒު ވިދާޅުވެފައިވެއެވެ. ނަމަވެސް ސަރުކާރު ބަދަލުވެގެންދިޔަ އިރު ރައީސް މުއިއްޒު ވިދާޅުވި ބަދަލެއް މިހާތަނަށް މިސްކިތަށް ގެނެސްފައި ނުވާއިރު މިސްކިތް ނިންމަން އިން މުއްދަތު ހަމަވެ މަސައްކަތުގެ ސްޕީޑް ސްލޯވެފައިވާ ކަމަށް ކައުންސިލްގެ ރައީސް ވިދާޅުވިއެވެ.
ކައުންސިލްގެ ރައީސް ވިދާޅުވީ މިސްކިތުގެ ކޮންކްރީޓް މަސައްކަތް އަދި ނުނިމޭކަމަށާއި، ތަނބުތަކުގައި ޖަހާފައި ހުރި ދަގަނޑުތައް ދަބަރު ޖަހާ އަލުން ދެވަނަ ފަހަރަށް އެ މަސައްކަތް ކުރަންޖެހޭ ހިސާބަށް ގޮސްފައިވާ ކަމަށެވެ. އަދި މަސައްކަތް ހަވާލުކޮށްފައިވާ ކުންފުންޏަށް މި ސަރުކާރުން އިތުރު މުއްދަތެއް ދިން ނަމަވެސް މިސްކިތް ދެ ބުރިއަށް ނެގުމާއި ގުޅޭ މަސައްކަތެއް ހަވާލުކުރިކަމެއް އަދި އެކަމާއި ގުޅޭ އެއްވެސް މައުލޫމާތެއް ދެއްވާނެ ބޭފުޅެއްވެސް ރައީސްގެ އަރިހުގައި ނެތްކަމަށް ކައުންސިލްގެ ރައީސް އަބްދުއްރަހުމާން ވިދާޅުވިއެވެ. އަދި ކައުންސިލާއެކު ބޭއްވި ބައްދަލުވުމުގައި އެކަމުގެ ކަންބޮޑުވުންތަކާއެކު ސުވާލުކުރުމުންވެސް ރައީސް އެކަމަށް ޖަވާބެއް ނުދެއްވި ކަމަށާއި، އިސްލާމިކް މިނިސްޓްރީ އިން ވެސް މިކަމާއި ގުޅޭ އެއްވެސް މައުލޫމާތެއް ސާފުވާގޮތެއް ނުވި ކަމަށް ކައުންސިލްގެ ރައީސް ވިދާޅުވިއެވެ. ކައުންސިލްގެ ރައީސް ވިދާޅުވީ ތަކުރާރުކޮށް ސުވާލުކުރުމުންވެސް ޖަވާބެއް ނުދެއްވި ކަމަށެވެ.
މި ސަރުކާރަށް 2 އަހަރުވި އިރު ކެންދޫއަށް މި ސަރުކާރުން ކޮށްދިން ކަމަކީ ބީއެމްއެލް މެދުވެރިކޮށް އޭޓީއެމްއެއް ބެހެއްޓުމެވެ. ރައީސް މުއިއްޒު ކެމްޕޭނުގައި އެރަަށަށް ވަޑައިގެން ވައުދުފުޅުވި އެއްވެސް ކަމެއް އެރަށުގައި ފަށާފައި ނުވެއެވެ. އަދި ކުރީ ސަރުކާރުން ފެށި ގިނަ މަސައްކަތްތައް ހުރީ ހުއްޓިފައެވެ.
