ފްލެޓް ލިބޭނެކަމަށް ކުރީގެ މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗަރ އިން ގެޒެޓް ކުރި އެއްވެސް ފަރާތެއްގެ ނަން ބާތިލު ނުކުރުމަށް އެދި ރައްޔިތުންގެ މަޖިލީހަށް އަމިއްލަ ފަރާތްތަކުން ހުށަހަޅާފައިވާ ޕެޓިޝަންގެ މަސައްކަތް އިތުރަށް ކުރިއަށް ނުގެންދަން ނިންމާ ޕެޓިޝަން ކޮމިޓީން މައްސަލަ ބޭރުކޮށްލައިފިއެވެ.

ޑރ. މުއިއްޒު ސަރުކާރުގެ މެޖޯރިޓީ އޮންނަ ޕެޓިޝަން ކޮމިޓީން މި މައްސަލަ ނުބަލަން ނިންމީ އަންގާރަ ދުވަހުގެ ބައްދަލުވުމުގައެވެ.

މި ޕެޓިޝަންގެ މަސައްކަތް އިތުރަށް ކުރިއަށް ނުގެންދަން ހުށަހެޅުއްވީ ސަރުކާރު ހިންގާ ޕީއެންސީ އަށް ނިސްބަތްވާ ހެންވޭރު އުތުރު ދާއިރާގެ މެންބަރު އަދި އެ ކޮމިޓީގެ ނައިބު މުގައްރިރު އަހުމަދު އައިފާނެވެ. އަދި އެ ހުށަހެޅުއްވުމަށް ތާއީދު ކުރެއްވީ ޕީއެންސީ އަށް ނިސްބަތްވާ އުނގޫފާރު ދާއިރާގެ މެންބަރު އިބްރާހިމް ޝިފާޒެވެ.

މެންބަރު އައިފާން ވިދާޅުވީ، މި ޕެޓިޝަނަކީ 19 ވަނަ މަޖިލީހަށް ހުށަހަޅައިގެން ކުރިއަށް ގެންދިޔަ މަސައްކަތެއް ކަމަށާއި، އަސްލު ހައްގުވެރިންނަށް ފްލެޓް ދޭން އަލުން އެޕްލިކޭޝަންތައް އިވެލުއޭޓް ކުރުމުގެ މަސައްކަތް މި ސަރުކާރުގެ ހައުސިންގ މިނިސްޓްރީން ކުރިއަށް ގެންދާތީ ޕެޓިޝަން އާ ގުޅިގެން ބަލާނެ ކަމެއް ނެތް ކަމުގައެވެ.

ކުއްލި އަކަށް ޕެޓިޝަންގެ މައްސަލަ ނުބަލަން ފާސް ކުރިއިރު، މި ޕެޓިޝަނަކީ ނިމިދިޔަ 19 ވަނަ ރައްޔިތުންގެ މަޖިލީހަށް ހުށަހެޅި ޕެޓިޝަނެއް ކަމުގައި ވިޔަސް، 20 ވަނަ މަޖިލީހުގެ ޕެޓިޝަން ކޮމިޓީގެ މަސައްކަތުގެ ތެރޭގައި ހިމަނައިގެން ކޮމިޓީއަށް ކަމާ ބެހޭ އޮފީސްތަކުގެ މަންދޫބުން ހާޒިރުކޮށް ވަނީ ސުވާލުވެސް ކޮށްފައެވެ.

ރައްޔިތުންގެ މަޖިލީހުގެ ޕެޓިޝަން ކޮމިޓީން ބޭރު ކޮށްލި ފްލެޓާ ބެހޭ ޕެޓިޝަންގައި 920 މީހުން ސޮއިކޮށްފައިވެއެވެ. އޭގެ ތެރޭގައި ފްލެޓް ލިބުނު ކަމަށް ލިޔުން ލިބިފައިވާ ފަރާތްތަކާއި އެމީސް މީހުންގެ އާއިލާތަކުގެ މެމްބަރުންވެސް ހިމެނެއެވެ.

ފްލެޓް ލިސްޓް ބަދަލު ނުކުރުމަށް ގޮވާލާ ހުށަހެޅި ޕެޓިޝަން އާ ބެހޭ ގޮތުން މިހާރުގެ ހައުސިން މިނިސްޓަރ ޑރ. އަލީ ހައިދަރު ޖުލައި 29 ގައި ބޭއްވި ކޮމިޓީގެ ބައްދަލުވުމުގައި ވިދާޅުވީ، މި އަހަރުގެ އޮކްޓޯބަރު މަހު 4000 ފްލެޓް ލިބޭ މީހުންގެ ލިސްޓް އާންމު ކުރާނެ ކަމަށެވެ.

ރައީސް ސޯލިހްގެ ސަރުކާރުގައި ގެދޮރުވެރިޔާ ސްކީމުގެ ދަށުން ފަހި ދިރިއުޅުން ކޯޕަރޭޝަން (އެފްޑީސީ)އާ ހަވާލުކޮށްގެން ހުޅުމާލޭގައި ހަދަމުންދާ 4،000 އެޕާޓްމަންޓް ގެ ތެރޭގައި ހިމެނެނީ ދެ ކޮޓަރީގެ އެޕާޓްމަންޓްތަކުގެ ގޮތުގައި 650 އަކަފޫޓުގެ 1،200 އެޕާޓްމަންޓާއި ތިން ކޮޓަރީގެ އެޕާޓްމަންޓްތަކުގެ ގޮތުގައި 900 އަކަފޫޓްގެ 2،800 އެޕާޓްމަންޓެވެ.

ރައީސް ސޯލިހް ގެ ސަރުކާރު ނިމުނު އިރު މި 4000 ފްލެޓް ލިބޭ މީހުންގެ ލިސްޓް ވަނީ ގެޒެޓް ކޮށްފައެވެ. މީގެ ތެރެއިން 3778 ފަރާތާ އެކު ވަނީ ފްލެޓް ލިބުނު ކަމުގެ އެއްބަސްވުން ވެސް ހަދާފައެވެ.

ރައީސް ސޯލިހްގެ ސަރުކާރުން ގެޒެޓް ކުރި ފްލެޓް ލިސްޓަށް ފްލެޓް ލިބޭނެ ކަމަށް ވެރިކަމަށް ވަޑައިގަތުމުގެ ކުރިން އަދި ވެރިކަމަށް ވަޑައިގަތް ފަހުން ވެސް ޑރ. މުއިއްޒު ވިދާޅުވެފައިވެއެވެ.

5 ޑިސެމްބަރ 2023 ވަނަ ދުވަހު އޮތް ނޫސްވެރިންގެ ބައްދަލުވުމުގައި ސީދާ މި ކަމާ ބެހޭ ގޮތުން ނޫސްވެރިއަކު ސުވާލު ކުރުމުން ރައީސް ޑރ. މުއިއްޒު ވިދާޅުވެފައިވަނީ ފައިނަލް ލިސްޓެއް ގެޒެޓު ކުރެވިފައިވުން އެއީ ސަރުކާރުގެ ނިންމުމެއް ކަމަށެވެ. އެހެންކަމުން އެއަށް އެއްވެސް ބަދަލެއް ނާންނާނެ ކަމަށެވެ.

ރައީސް މުއިއްޒު މިހެން އެތައް ތަނެއްގައި ވިދާޅުވެފައިވީ ނަމަވެސް، ޕެޓިޝަން ކޮމިޓީގައި މި ސަރުކާރުގެ ހައުސިންގ މިނިސްޓަރ ހައިދަރު ދެއްކެވި ވާހަކަފުޅުން އެނގޭ ގޮތުގައި މި ސަރުކާރުން ގެންދަނީ، ކުރީ ސަރުކާރުން ގެޒެޓް ކުރި ފްލެޓް ލިބުނު މީހުންގެ ލިސްޓަށް ބެލުމެއް ނެތި، ފްލެޓަށް އެދުނު އެންމެންގެ މުޅި ލިސްޓު އަލުން އިވެލުއޭޓް ކޮށް އައު ލިސްޓެއް ތައްޔާރު ކުރުމުގެ މަސައްކަތް ކުރަމުންނެވެ.