މަތީ ތައުލީމު ހާސިލް ކުރުމަށްދޭ ޒަކާތު ސްކޮލަރޝިޕް 24 ދަރިވަރަކަށް
ފުލް ސްކޮލަރޝިޕް 17 ދަރިވަރަކަށް، ސްޓިޕެންޑް ލިބުނު 6 ދަރިވަރަކަށް އަދި ޓިއުޝަން ފީ 1 ދަރިވަރަކަށް ލިބިފައިވޭ
ޒަކާތު ސްކޮލަރޝިޕް ލިބުނު ދަރިވަރުން
ޒަކާތު ފަންޑުން އިސްލާމީ ދާއިރާތަކުން މަތީ ތައުލީމް ހާސިލްކުރުމަށްދޭ ސްކޮލަރޝިޕް 24 ދަރިވަރަކަށް ދީފިއެވެ.
ހޮނިހިރު ދުވަހުގެ ރޭ އިސްލާމިކް މިނިސްޓްރީގައި ބޭއްވި ޚާއްސަ ރަސްމިއްޔާތެއްގައި ސްކޮލަރޝިޕް ލިބުނު ދަރިވަރުންނަށް ލިއުން ހަވާލުކޮށްދެއްވީ ރައީސުލްޖުމްހޫރިއްޔާގެ ނައިބު އަލްއުސްތާޒް ހުސައިން މުހައްމަދު ލަޠީފްއެވެ.
މިފަހަރު ސްކޮލަރޝިޕް ލިބިފައިވަނީ ޖުމްލަ 24 ދަރިވަރަކަށެވެ.
މީގެ ތެރޭގައި ހިމެނެނީ ފުލް ސްކޮލަރޝިޕް ލިބުނު 17 ދަރިވަރަކާއި، ސްޓިޕެންޑް ލިބުނު 6 ދަރިވަރަކާއި، ޓިއުޝަން ފީ ލިބުނު 1 ދަރިވަރެވެ. މީގެ ތެރޭގައި ހިމެނެނީ ރާއްޖެއާއި ރާއްޖޭން ބޭރުގެ އެކި ގައުމުތަކުގައި މަތީ ތައުލީމް ހާސިލްކުރުމުގެ ފުރުސަތުތަކެވެ. ރާއްޖޭން ބޭރުން ކިޔެވުން ކުރިއަށް ގެންދިއުމަށް ހަމަޖެހިފައިވާ ގައުމުތަކުގެ ތެރޭގައި ހިމެނެނީ މެލޭޝިއާ، ބުރުނާއީ ސައުދީ އަރަބިއްޔާ އަދި މިސްރު ކަމަށް އިސްލާމިކް މިނިސްޓްރީން ބުނެއެވެ.
މިރަސްމިއްޔާތުގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ، މިއަހަރުގެ ޒަކާތު ސްކޮލަރޝިޕަށް ހޮވޭ ދެވަނަ ބުރުގެ ދަރިވަރުން ވަރަށް އަވަހަށް ސްކޮލަރޝިޕްތައް ހަވާލުކުރެވޭނެ ކަމަށެވެ.
މީގެ އިތުރުން މިނިސްޓަރު ޝަހީމް ވިދާޅުވީ އަހަރުން އަހަރަށް ޒަކާތް ލިބޭ މިންވަރު އިތުރު ކަމަށާއި، މިދިޔަ އަހަރަކީ ރާއްޖޭގައި ތަރީހުގައި އެންމެ ގިނަ އަދަދަށް ޒަކާތް ލިބުނު އަހަރު ކަމަށެވެ. އަދި ވިދާޅުވީ މި ނިޒާމު އިތުރަށް ހަރުދަނާ ކުރުމަށް މަސައްކަތް ކުރަމުންދާ ކަމަށާއި، ޒަމާނާ އެއްވަރުގެ ޒަކާތުގެ ނިޒާމެއް ރާއްޖޭގައި ގާއިމްކުރުން އަމާޒު ހިފާފައިވާ ކަމަށެވެ. އޭރުން ފަގީރުންގެ ދަފްތަރުގައި ރަޖިސްޓްރީ ކުރެވިފައިވާ ފަގީރުންނަށް އެކަނި ވެސް ގިނަ ޚިދުމަތްތަކެއް ފޯރުކޮށްދެވޭނެ ކަމަށް މިނިސްޓަރު ޝަހީމް ވިދާޅުވިއެވެ.
މިދިޔަ އަހަރަކީ ދިވެހިރާއްޖޭގައި ތަރީހުގައި އެންމެ ގިނަ އަދަދަށް ޒަކާތް ލިބުނު އަހަރު. އެއްސަތޭކައަށް ވުރެ ގިނަ މިލިއަން ރުފިޔާ ޒަކާތަށް ވަނީ ލިބިފައި. އެއީ ވަރަށް ބޮޑު އުފާވެރިކަމެއް. އަޅުގަނޑުމެން މިދަނީ އިވެސްޓްމަންޓަށް ދިއުމަށްޓަކައި މަސައްކަތް ކުރަމުން. އެކަންކަން ގާއިމް ކުރެވިއްޖެނަމަ ޒަކާތު ފަންޑު އިތުރަށް ގިނަވެގެންދާނެ. އެއީ ޒަކާތުގެ ބެހެނިވެރިންގެ ގޮތުގައި ހިމެނޭ ހުރިހާ ބައިތަކެއް ލިބިގެންދާނެ ވަރަށް ބޮޑު ކުރިއެރުމަކަށްވާނެ. އެހެންވީމަ ގައުމު ބިނާ ކުރުމުގައި ހުރިހާ ފަރާތެއް ތަނަވަސްކަމުގެ އަހުލުވެރިން މުޅި ގައުމު އެންމެހާ ލޮބުވެތި ރައްޔިތުން ގުޅިގެން މަސައްކަތް ކުރަންވީ.އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު
ޒަކާތު ފަންޑު މެދުވެރިކޮށް ރާއްޖެއާއި ރާއްޖެއިން ބޭރުން މަތީ ތަޢުލީމު ހާސިލްކުރުމަށް، ސްކޮލަރޝިޕަށް އެދުމުގެ ފުރުސަތު ހުޅުވާލީ މިދިޔަ އޭޕްރިލްމަހުއެވެ. އަދި ސްކޮލަރޝިޕަށް އެދުމުގެ ފުރުސަތު މިދިޔަ މެއި މަހުގެ 29 ވަނަ ދުވަހު ވަނީ ހަމަވެފައެވެ.
މި ސްކޮލަރޝިޕް ލިބުނު ދަރިވަރުން ކަނޑައަޅާފައިވަނީ އެކަމަށް ޚާއްސަކޮށް ނަގާފައިވާ ކޮމިޓީއަކުންނެވެ.
