އޮޑިޓް އެޕް ތައާރަފުކޮށްފި
5 މެއި 2021 | ބުދަ 07:07އެޕް މެދުވެރިކޮށް އޮޑިޓަރ ޖެނެރަލްގެ އޮފީހުން ހޯދަން ބޭނުންވާ މައުލޫމާތު ފަސޭހަކަމާއެކު ލިބޭނެ
މި އެޕް ތައާރަފު ކޮށްދެއްވީ ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔައުގޫބް އަބްދުﷲ
އޮޑިޓަރ ޖެނެރަލްގެ އޮފީހުގެ މޯބައިލް އެޕްލިކޭޝަނެއް ކަމަށްވާ "އޮޑިޓް އެޕް" ތައާރަފު ކޮށްފިއެވެ.
އޮޑިޓަރ ޖެނެރަލްގެ އޮފީހުގައި ބޭއްވި ހާއްސަ ރަސްމިއްޔާތެއްގައި މި އެޕް ތައާރަފު ކޮށްދެއްވީ ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރު ޔައުގޫބް އަބްދުﷲ އެވެ. އެ އޮފީހުން ބުނީ މި އެޕް އުފެއްދުމުގެ އެންމެ ބޮޑު ބޭނުމަކީ އޮޑިޓް އޮފީހުން ހިންގާ ކަންތައްތަކުގެ މައުލޫމާތު ނޮޓިފިކޭޝަންގެ ޒަރިއްޔާއިން އާންމުންނާ ހިއްސާ ކުރުން ކަމަށެވެ. އޭގެ އިތުރުން އެޕް މެދުވެރިކޮށް އޮޑިޓަރ ޖެނެރަލްގެ އޮފީހުން ހޯދަން ބޭނުންވާ މައުލޫމާތުތަކަށް ފަސޭހަކަމާއެކީގައި ރިކުއެސްޓް ކުރެވޭނެ ކަމަށެވެ.
މި އެޕްލިކޭސަން ޕްލޭ ސްޓޯރއިން ބުރާސްފަތި ދުވަހުން ފެށިގެން ޑައުންލޯޑް ކުރެވޭނެއެވެ. އޭޖީ އޮފީހުން އޮޑިޓް އެޕް ތައާރަފުކޮށްފައިވާއިރު އެ އޮފީހުން ވަނީ އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް (ސީއޭ) ގެ ވެބްސައިޓާއި ލޯގޯ އިފްތިތާހުކޮށްފައެވެ.
އިންސްޓިޓިއުޓް އޮފް ޗާޓަރޑް އެކައުންޓެންޓްސް އޮފް ދަ މޯލްޑިވްސް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު އުފައްދަވާފައިވަނީ މިދިޔަ އަހަރުގެ ސެޕްޓެމްބަރު މަހުގައެވެ. އެ އިންސްޓިޓިއުޓް އުފެއްދެވުމާ ގުޅިގެން އިންސްޓްޓިއުޓްގެ ކައުންސިލް މެމްބަރުން ވަނީ ކައުންސިލްގެ ރައީސް ކަމަށް އޮޑިޓަރ ޖެނެރަލް އައްޔަން ކުރައްވާފައެވެ. އިންސްޓްޓިއުޓް އުފެދޭތާ ފުރަތަމަ ހަތަރު އަހަރު އިންސްޓްޓިއުޓް ހިންގުމުގެ މަސައްކަތް ކުރާނީ މި ކައުންސިލުން ކަމަށް އޭޖީ އޮފީހުން ބުންޏެވެ.
ކައުންސިލްގެ މައިގަޑު މަސްއޫލިއްޔަތަކީ ދިވެހިރާއްޖޭގެ އެކައުންޓެންސީ ޕްރޮފެޝަނުގެ ބައިނަލްއަގުވާމީ އުސޫލުތަކާއި ހަމަތަކާ އެއްގޮތްވާ ގޮތުގެ މަތިން އިންސްޓްޓިއުޓް ހިންގައި ބެލެހެއްޓުމެވެ. އަދި މީގެ ތެރޭގައި ކައުންސިލް ހިންގާ ގަވާއިދު ތައްޔާރު ކުރުމާއި، ކޮމިޓީތައް އެކުލަވާލުމާއި، އިންސްޓްޓިއުޓްގެ ރަޖިސްޓްރީ ބަލަހައްޓައި ގިންތި ކަނޑައެޅުމާއި ޕްރައިވެޓް ސެކްޓަރގެ އެކައުންޓިންގ އަދި އޮޑިޓިންގ ސްޓޭންޑަރޑްތައް އެކުލަވާލުން ހިމެނެއެވެ.
