ރާއްޖެއެމްވީގެ އާ ވެބްސައިޓް ތައާރަފުކޮށްފި
ރާއްޖެއެމްވީގެ އާ ވެބްސައިޓް އައްޑޫ ސިޓީގައި ތައާރަފުކުރުން
އައްޑޫ ސިޓީގެ މޭޔަރު އަބުދުﷲ ސާދިގު ރާއްޖެއެމްވީގެ އާ ވެބްސައިޓް އިފްތާހު ކޮށްދެއްވުން
ރާއްޖެއެމްވީގެ އާ ވެބްސައިޓް އައްޑޫ ސިޓީގައި ތައާރަފުކޮށްފި އެވެ.
ހިތަދޫގައި ހުންނަ އީއެލްސީގެ އިދާރާގައި ބޭއްވި މި ހަފްލާގައި ވެބްސައިޓް ހުޅުވައިދެއްވީ އައްޑޫ ސިޓީގެ މޭޔަރު އަބްދުﷲ ސޯދިގެވެ.
މި ރަސްމިއްޔާތުގައި އަބްދުﷲ ސޯދިގް (ސޯބެ) ވިދާޅުވި ގޮތުގައި، ރާއްޖޭގެ އެންމެ މަގްބޫލް ޓީވީ ސްޓޭޝަން ހިންގާ، ރާއްޖެ ޓެލެވިޒަން ޕްރައިވެޓް ލިމިޓެޑް، ރާއްޖެއެމްވީ ވެބްސައިޓަށް ބޮޑު ބަދަލެއް ގެނެސް އައްޑޫ ސިޓީގައި ތައާރަފުކުރުމަކީ މި ސިޓީއަށް ލިބިގެންދިޔަ ޝަރަފެއް ކަމަށެވެ. ރާއްޖެ އެމްވީ އާއި ރާއްޖެ ޓީވީން މި ސިޓީއަށް ދޭ ސަމާލުކަން މިކަމުން އެނގިގެން ހިނގެއްޖެ ކަމަށް ވެސް އޭނާ ވިދާޅުވި އެވެ.
"މިއީ އަޅުގަނޑުމެންނަށް، މިސިޓީއަށް ވެސް ލިބިގެން ދިޔަ ވަރަށް ބޮޑު ޝަރަފެއް،" މޭޔަރު ވިދާޅިވި އެވެ.
އައްޑޫގެ މަޝްހޫރު ވިޔަފާރިވެރިންނާއި ކަމުވޮށިގެންވާ ބައެއް ބޭފުޅުންނާއެކު ބޭއްވި މި ހަފުލާގައި ރާއްޖެޓީވީގެ ޗީފް އޮޕަރޭޓިން އޮފިސަރު އަދި ރާއްޖެއެމްވީގެ އެޑިޓަރު ހުސައިން ފިޔާޒު ވިދާޅުވީ، އާ ވެބްސައިޓާއެކު އައްޑުއަށް ވަރަށް ހާއްސަ ކަވަރޭޖެއް ލިބިގެންދާނެ ކަމަށެވެ.
ރާއްޖެއެމްވީގެ އާ ވެބްސައިޓް އައްޑޫގައި ތައާރަފުކުރުމަކީ، ފިޔާޒު ވިދާޅުވި ގޮތުގައި، ރާއްޖެއެމްވީ އާއި ރާއްޖެ ޓީވީގެ މެނޭޖްމެންޓާއި ނޫސްވެރިންނަށް އަދި ހުރިހާ މުވައްޒަފުންނަށް ވެސް ލިބިގެން ދިޔަ ވަރަށް ބޮޑު އުފަލެކެވެ.
"އަޅުގަނޑުމެން ފުރަތަމަ ބެލީ މި ވެބްސައިޓް މާލޭގައި ތައާރަފުކުރަން. ނަމަވެސް މާލެ ފިޔަވައި އަޅުގަނޑުމެންގެ ވެސް އެންމެ ބޮޑު ސަޕޯޓަރުން، ބެލުންތެރިންނާއި ކިޔުންތެރިން ވެސް ތިބީ އައްޑޫގައި. އެހެންވެ، ޒަމާނީ ބަދަލުތަކާއެކު އަޅުގަނޑުމެންގެ ވެބްސައިޓް އައްޑޫގައި ތައާރަފުކުރުމަކީ ހަގީގަތުގައި ވެސް ވަރަށް ބޮޑު އުފަލެއް، ހިތްހަމަ ޖެހުމެއް،" ފިޔާޒު ވިދާޅުވި އެވެ.
މީގެ ކުރިން ރާއްޖެއެމްވީއާ ގުޅޭ ގޮތުން ވަރަށް ގިނަ ޝަކުވާ ލިބެމުންދިޔަ ކަމަށާއި ކުރީގެ ވެބްސައިޓަށް ލިބެމުންދިޔަ އެ ޝަކުވާގެ ތެރެއިން، އާ ވެބްސައިޓްގައި ޒަމާނީ ދިރިން އެޅުވުމަށް ވަރަށް މުހިންމު ހިޔާލުތަކެއް ލިބިގެން ދިޔަ ކަމަށް ފިޔާޒު ފާހަގަ ކުރެއްވެވި އެވެ.
މި ވެބްސައިޓް ހަގީގަތަކަށް ހެދުމުގައި ރާއްޖެޓީވީގެ މެނޭޖިން ޑިރެކްޓަރު އަހްމަދު ސަލީމާއި ސޯޝަލް މީޑިއާ މެނޭޖަރު އިސްމާއީލް ރިޔާޒު ކުރެއްވި މަސައްކަތް ފާހަގަކުރައްވަމުން ފިޔާޒު ވިދާޅުވީ އާ ވެބްސައިޓްގައި ރާއްޖޭގެ އެހެން ނިއުސް ސައިޓްތަކާ ވަރަށް ބޮޑެތި ތަފާތުތަކެއް ހުންނާނެ ކަމަށެވެ. އެގޮތުން، ވިޔަފާރިވެރިންނާއި ކިޔުންތެރިންގެ ކޮންޓެންޓް ޕްރޮމޯ÷ޓްކުރުމަށްޓަކައި ޕްރޮމޯޓެޑް ނިއުސްގެ ގޮތުގައި ސެކްޝަނެއް ހިމެނުމާއި ދިވެހި ތާރީހާއި ނަމާދު ވަގުތު އެނގޭ ގޮތަށް ހުރުމާއި ނަކަތް ވެސް އެނގޭ ގޮތަށް ހުރުން ހިމެނޭކަން ފިޔާޒު ފާހަގަ ކުރެއްވެވި އެވެ. މި ނޫން ވެސް ޒަމާނީ ބަދަލުތައް ވެބްސައިޓަށް ގެނެސްފައިވާއިރު، ބޭނުންކުރަން ވަރަށް ފަސޭހަ ވާނެ ކަމަށް ވެސް އޭނާ ވިދާޅުވި އެވެ.
ރާއްޖެ އެމްވީގެ އާ ވެބްސައިޓްގެ ޑިވެލޮޕެރަކީ ސަމާހް ރަޝީދެވެ.
އާ ވެބްސައިޓް ތައާރަފުކުރުމުގެ އިތުރުން، އައްޑޫ ސިޓީއަށް އުފާވެރި އެހެން ހަބަރެއް ވެސް ފިޔާޒު ދެއްވި އެވެ. އެއީ ރާއްޖެޓީވީގެ ބިއުރޯއެއް ވަރަށް އަވަހަށް މި ސިޓީގައި ގާއިމުކޮށް، މަސައްކަތް ފަށުން ކަމަށް އޭނާ ވިދާޅުވި އެވެ.
"އަޅުގަނޑުމެންގެ މެނޭޖިން ޑިރެކްޓަރު އަދި ސީނިއާ މެނޭޖްމެންޓުން ވެސް ބޭނުންވޭ ވަރަށް އަވަހަށް މި ސިޓީގައި ބިއުރޯ ރަސްމީކޮށް ހުޅުވަން. ދެކުނު ބިއުރޯއިން އައްޑޫގެ އިތުރުން ދެކުނުގެ ހުރިހާ އަތޮޅެއްގެ ހަބަރާއި މައުލޫމާތު ގެނެސްދޭނެ،" އޭނާ ވިދާޅުވި އެވެ.
