ކުޑަކުއްޖަކަށް ޖިންސީ ފުރައްސާރަކުރި ކަމުގެ ތުހުމަތުކުރާ ނަރުހަށް ދައުވާކުރަން ފޮނުވަން އެދިފައިވާނެ: ޕީޖީ އޮފީސް
އެނގިފައިވާގޮތުގައި އެ މައްސަލަ ފުލުހުންނަށް ރިޕޯޓުކުރި އިރު ވެސް އެ ނަރުސް މީހާ ވަނީ ފޮނުވާލާފަ
ހުޅުމާލޭގައި ހުންނަ ޓްރީޓޮޕް ހޮސްޕިޓަލް
ހުޅުމާލޭގައި ހުންނަ ޓްރީޓޮޕް ހޮސްޕިޓަލުގައި އެޑްމިޓް ކޮށްފައި އޮތް ކުޑަ ފިރިހެން ކުއްޖަކަށް ގަދަކަމުން ޖިންސީ އަނިޔާ ކުރި ކަމަށް ތުހުމަތު ކުރެވޭ ފިރިހެން ނަރުހެއްގެ މައްސަލަ ފައިލްކުރީ އެކަމުގައި މެނޭޖްމަންޓުގެ މައްޗަށް ތުހުމަތު ކުރެވޭ ޖިނާއީ މައްސަލަ ތަޙުޤީޤުކޮށް، ދަޢުވާ ކުރުމަށް ފޮނުވުމަށް ފުލުހުންނަށް އަންގާފައިވަނިކޮށް ކަމަށް ޕްރޮސެކިއުޓާ ޖެނެރަލް ހުސައިން ޝަމީމް ވިދާޅުވެއްޖެއެވެ.
ޕީޖީ ޝަމީމް މިހެން ވިދާޅުވީ ޓްރީޓޮޕް ހޮސްޕިޓަލުގައި ނަރުހަކު އެތަނުގައި އޮތް ކުޑަ ކުއްޖަކާ ބެހުނު މައްސަލައެއް ފެންމަތިވެފައިވާއިރު ޕީޖީގެ ލަފާގެ މަތިން އެމީހާ ރާއްޖެއިން ޑީޕޯޓުކޮށްލާ މައްސަލަ ފައިލްކޮށްފައިވާ ކަމަށް ބުނެ ބައެއް މީޑިއާތަކުގައި ހަބަރު ފަތުރަމުންދާތީއެވެ.
ޝަމީމް ވިދާޅުވީ އެމީހާ ޑީޕޯޓުކޮށް މައްސަލަ ފައިލްކުރި އިރު އެކަމުގައި ހޮސްޕިޓަލްގެ މެނޭޖްމަންޓުގެ މައްޗަށް ތުހުމަތު ކުރެވޭ ޖިނާއީ މައްސަލަ ތަޙުޤީޤުކޮށް، ދަޢުވާ ކުރުމަށް ފޮނުވުމަށް ފުލުހުންނަށް އަންގާފައިވާނެ ކަމަށެވެ. އެނގިފައިވާގޮތުގައި އެ މައްސަލަ ފުލުހުންނަށް ރިޕޯޓުކުރި އިރު ވެސް އެ ނަރުސް މީހާ ވަނީ ފޮނުވާލާފައެވެ.
އެ ކުއްޖާއަށް ލިބިފައިވާ އަނިޔާގެ ވަކި ތަފްސީލެއް ނޭނގުނަސް އެފަދަ މައްސަލައެއް މިދިޔަ ޖެނުއަރީގައި ހުށަހަޅާފައިވާކަން ފުލުހުން ވަނީ ކަށަވަރުކޮށްދީފައެވެ.
ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނު ބުނާގޮތުން ކުޑަކުއްޖަކު އިތުބާރުކުރަންޖެހޭ މަގާމެއްގައި ހުރި މީހަކު އެ ކުޑަކުއްޖަކާއެކު ޖިންސީ އަމަލެއް ހިންގައިފި ނަމަ އެއީ 15 އަހަރާއި 18 އަހަރާ ދެމެދުގެ މުއްތަކަށް ޖަލަށް ލެވޭ ކުށެކެވެ.
