ހައިރިސްކް ގައިދީން ދެނެގަތުމުގެ މަސައްކަތް ފަށައިފި

ޖަލުތަކުގައި ކޮވިޑް-19 ފެތުރެމުންދާ މި ޙާލަތުގައި ހައިރިސްކް ގައިދީންނަކީ ކޮބައިކަން ދެނެގަތުމުގެ މަސައްކަތް ފަށާފައިވާކަމަށް މޯލްޑިވްސް ކަރެކްޝަނަލް ސަރވިސަސްއިން ބުނެފިއެވެ.

އެކަމާ ގުޅޭގޮތުން "ރާއްޖެއެމްވީ" އަށް މައުލޫމާތު ދެއްވަމުން ކަރެކްޝަންސްގެ މީޑިއާ އޮފިޝަލު އާމިނަތު ޔުސްރީން ވިދާޅުވީ، ސިއްހީ ޙާލަތަށް ބަލައި ހައިރިސްކް ގައިދީން ދެނެގަތުމުގެ މަސައްކަތް ހުރިހާ ޖަލެއްގައި ވެސް ފަށާފައިވާ ކަމަށާއި، އެކަމާ ގުޅިގެން ބަލަންޖެހޭ ކަންކަން ޑޮކްޓަރުން ބަލަމުން ގެންދާނެ ކަމަށެވެ. އަދި ހަފްތާއެއްހާ ދުވަސްތެރޭގައި އެ މަސައްކަތް މުޅިން ނިންމާލެވޭނެކަމަށް ލަފާ ކުރެވޭކަމަށް ޔުސްރީން ވިދާޅުވިއެވެ. ޔުސްރީން ވިދާޅުވީ، ކޮވިޑުގެ މި ޙާލަތުގެ ސަބަބުން އެކަމުގައި ވެސް ދަތިތަކެއް ހުރި ކަމަށެވެ.

ޔުސްރީން އިތުރަށް ވިދާޅުވީ، ހައިރިސްކް ގައިދީންގެ ތެރެއިން ވެސް މުޖުތަމަޢުއަށް ނުރައްކާވާނެ ފަދަ ގައިދީން ގެއަށް ބަދަލެއް ނުކުރާނެ ކަމަށެވެ. އެގޮތުން ގައިދީންގެ ސެކިއުރިޓީ ރިސްކް ލެވެލްއާއި ތަންފީޒު ކުރަމުންދާ ޙުކުމުގެ ބާވަތަށް ބަލާނެކަމަށް ޔުސްރީން ފާހަގަކުރެއްވިއެވެ. އަދި ވަގުތީ ގޮތުން ގޭބަންދަށް ބަދަލު ކުރިނަމަވެސް، ބެލެނިވެރިޔާގެ ހުއްދަ ނެތްނަމަ ދޫނުކުރާނެކަން ޔުސްރީން ފާހަގަ ކުރެއްވިއެވެ.

ކަރެކްޝަނަލް ސަރވިސަސްއިން ބަލަހައްޓަމުންދާ ހުރިހާ ޖަލުތަކުން ވެސް ޕޮޒިޓިވް ކޭސްތަކާއި ކޮންޓެކްޓުން ފެނިފައިވާއިރު، ޖަލު އޮފިސަރުންނާއި މުވައްޒަފުންގެ ތެރެއިން 33 މީހަކު ޕޮޒިޓިވްވެ، 105 މީހަކު ކަރަންޓީނުގައި ތިބި ކަމަށް ކަރެކްޝަންސްއިން އެންމެ ފަހުން އާންމުކުރި ތަފާސްހިސާބުތަކުން ދައްކައެވެ. އަދި ގައިދީންގެ ތެރެއިން ވެސް 20 މީހަކު ޕޮޒިޓިވްވެފައިވާއިރު، 22 ގައިދީއަކު ވަނީ ކަރަންޓީން ކޮށްފައެވެ.

ހައި ރިސްކް ހުރިހާ ގައިދީން ވަގުތީގޮތުން ގެއަށް ބަދަލުކުރަން ނިންމާފައިވާ ކަމަށް ކޮމިޝަނަރ އޮފް ޕްރިޒަންސް އަހުމަދު މުހައްމަދުފުޅު ދާދި ފަހުން ވަނީ އިއުލާނު ކުރައްވާފައެވެ. ކޮމިޝަނަރު ވިދާޅުވީ ގައިދީން ގޭ ބަންދަށް ބަދަލު ކުރުމަށް ނިންމާފައިވަނީ ޖަލުތަކުގައި ކޮވިޑް ފެތުރުން ކޮންޓްރޯލް ކުރުމަށްޓަކައި އަަޅާ ރައްކާތެރިކަމުގެ ފިޔަވަޅެއްގެ ގޮތުން ކަމަށެވެ. އެގޮތުން މާފުށީ ޖަލުގައި ކޮވިޑް-19 ފެތުރެމުންދާތީ ކުރީގެ ރައީސް އަބްދުﷲ ޔާމީން ގެއަށް ބަދަލު ކުރުމުން، އޭރު ގިނަ ބަޔަކު ވަނީ ހައިރިސްކް އެހެން ގައިދީންނަށް ވެސް އެ ފުރުސަތު ދިނުމަށް ގޮވާލާފައެވެ.