ލޯކަލް ކައުންސިލް އިންތިޚާބުގެ ދެވަނަ ބުރުގެ ވޯޓުލުން ފެށިއްޖެ
އަލަށް އިންތިޚާބުވި ކައުންސިލަރުން ހުވާކުރުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ ރޯދައިގެ ފަހުން
ލޯކަލް ކައުންސިލް އިންތިޚާބުގެ ވޯޓުލުން
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބު 2020ގެ ދެވަނަ ބުރުގެ ވޯޓުލުން ފެށިއްޖެއެވެ.
އިންތިޚާބުގެ ދެވަނަ ބުރުގެ ވޯޓުލުން ކުރިއަށްދާ ރަށްރަށަކީ، ހއ. ތަކަންދޫ، ހއ. އުލިގަން، ނ. މަގޫދޫ، ރ. މާކުރަތު، ބ. ކެންދޫ، ބ. ކިހާދޫ، ވ. ފުލިދޫ، މ. ރަތްމަންދޫ، ފ. ދަރަނބޫދޫ، އަދި ލ. ކަލައިދޫ އެވެ.
އިންތިޚާބުގެ ދެވަނަ ބުރުގެ ވޯޓުލުން ފެށިފައިވަނީ ހޮނިހިރު ދުވަހު ހެނދުނު 9:00 ގައެވެ. ވޯޓުލުން ކުރިއަށްގެންދިއުމަށް އިލެކްޝަންސް ކޮމިޝަނުން ނިންމާފައިވަނީ ހަވީރު 4 ޖެހުމާއި ހަމައަށެވެ.
ކޮވިޑް-19އާ ގުޅިގެން ދެ ފަހަރެއްގެ މަތީން ފަސްކުރަންޖެހުނު ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިޚާބުގެ ފުރަތަމަ ބުރުގެ ވޯޓުލުން ކުރިއަށް ގެންގޮސްގައިވަނީ އޭޕްރީލް 10 ވަނަ ދުވަހުއެވެ.
އިންތިޚާބުގެ ދެވަނަ ބުރެއް ބައެއް ރަށްރަށުގައި ބޭއްވުމަށް ނިންމީ ބައެއް ދާއިރާތަކުގެ ކެންޑިޑޭޓުންނަށް ލިބުނު ވޯޓު އެއްވަރުވުމުންނެވެ. އެއާއެކު ބައެއް ފޮށިތަކަށް ދާއިރާއިން ބޭރު މީހުން ވޯޓު ލާފައިވާތީ އެ ފޮށިތަކުގެ އިންތިޚާބު އަލުން ކުރިއަށް ގެންދިއުމަށް އިލެކްޝަންސްއިން ވަނީ ނިންމާފައެވެ.
އަލަށް އިންތިޚާބުވި ކައުންސިލަރުން ހުވާކުރުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ ރޯދައިގެ ފަހުން މެއި މަހުގެ މެދުތެރޭގައި ކަމަށް ލޯކަލް ގަވަރުމަންޓް އޮތޯރިޓީން ބުނެފައިވެއެވެ.
