ރާއްޖެ ބޮޑީބޯޑިންނުން އިންތިޒާމުކޮށްގެން ބޭއްވި "ސީ ސްޕޯޓްސް ވަރުނުލާ ގްރޮމްސް 2021" ގެ އެއްވަނަ މުޙައްމަދު ރީޝާން ރަޝީދު ހޯދައިފިއެވެ.
ޒުވާން ބޮޑީބޯޑަރުންނަށް އަމާޒުކޮށް ބޭއްވި މި މުބާރާތުގައި 12 ބޮޑީބޯޑަރުން ވަނީ ވާދަކޮށްފައެވެ.
މިދިޔަ އޭޕްރީލް މަހުގެ 26 ވަނަ ދުވަހު މި މުބާރާތް ފެށިއިރު، ހުކުރު ދުވަހު ހަވީރު ވަނީ މުބާރާތުގެ ފައިނަލް ކުރިއަށްގެންގޮސްފައެވެ. މުބާރާތުގެ ފައިނަލުގައި ވާދަކޮށް އެއްވަނަ ހޯދީ އުމުރުން 18 އަހަރުގެ މުޙައްމަދު ރީޝާން ރަޝީދެވެ. އަދި ދެވަނަ އުމުރުން 15 އަހަރުގެ އިބްރާހީމް އަތޫފް ހޯދިއިރު، ތިންވަނައަށް ހޮވުނީ އުމުރުން 16 އަހަރުގެ މުޙައްމަދު ކައިފް ރައިމޫނެވެ.
މި މުބާރާތުގައި އަލަށް ތައާރަފުކުރި އެވޯޑެއް ކަމަށްވާ އެންމެ އުންމީދީ ބޮޑީބޯޑަރަށް ދޭ ވަރުނުލާ ބޮޑީބޯޑަރު އެވޯޑް ހޯދީ އުމުރުން 11 އަހަރުގެ އިޔާން އަޙްމަދެވެ. އިޔާނަކީ މި މުބާރާތުގެ އެންމެ ހަގު ބޮޑީބޯޑަރުވެސްމެއެވެ. ރާއްޖެ ބޮޑީބޯޑިންނުން ބުނީ މި އަހަރަށްފަހު ކޮންމެ އަހަރަކުވެސް މި އެވޯޑް ދިނުމަށް ނިންމާފައިވާ ކަމަށެވެ.
މި މުބާރާތުގެ ފައިނަލް ހީޓު ބައްލަވައިލައްވަން ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ވަޑައިގެންނެވި އެވެ.
"ރާއްޖެ.އެމްވީ" އަށް ދިން އިންޓަވިއުއެއްގައި މުބާރާތުގެ އިވެންޓް މެނޭޖަރު އަލީ ޚުޝްރުވާން އަޙްމަދު (ކުޑަ އައްޔަ) ބުނީ މިއީ މި އަހަރު ކުރީކޮޅު ބާއްވަން ނިންމި މުބާރާތެއް ކަމަށާއި، އެކަމަކު ކޮވިޑް-19 އާއެކު އެޗްޕީއޭއިން އެކުލަވާލި އުސޫލުތަކާ ގުޅިގެން މުބާރާތް ފަސްކުރަން ޖެހުނު ކަމަށެވެ. އަދި މުބާރާތް ރަމަޟާން މަހު ބާއްވަން ޖެހުމުން އެކަމުގައިވެސް ގޮންޖެހުންތަކެއް ކުރިމަތިވި ކަމަށްވެސް ބުންޏެވެ.
ކުޑަ އައްޔަ އިތުރަށް ބުނީ މި އަހަރުގެ މުބާރާތުގައި 12 ބޮޑީބޯޑަރުން ވާދަކުރި ނަމަވެސް، ކުރިއަށް އޮތް ތަނުގައި މުބާރާތުގައި ވާދަކުރާ ބޮޑީބޯޑަރުންގެ އަދަދު އިތުރުވެގެންދާނެ ކަމަށް އުއްމީދުކުރާ ކަމަށެވެ. އަދި ކުރިއަށް އޮތް ތަނުގައި މި މުބާރާތް ރާއްޖޭގެ އެކި ކަންކޮޅުތަކުގައި ބޭއްވިގެންދާނެ ކަމަށާއި، އުއްމީދަކީ މުޅި ރާއްޖެއަށް ބޮޑީބޯޑިން ފުޅާކުރުން ކަމަށްވެސް ބުންޏެވެ. އެގޮތުން މި އަހަރުގެ ތެރޭގައި އަތޮޅުތެރޭގައި ވެސް ބޮޑީބޯޑިން މުބާރާތްތައް ބޭއްވިގެންދާނެ ކަމަށްވެސް ކުޑަ އައްޔަ ބުންޏެވެ.
ސީ ސްޕޯޓްސް ވަރުނުލާ ގްރޮމްސްއަކީ ކުރިއަރަމުން އަންނަ ޒުވާން ބޮޑީބޯޑަރުންނަށް ވާދަވެރި މާހައުލެއްގައި މުބާރާތްތަކުގައި ވާދަކުރުމުގެ ފުރުސަތު ހުޅުވާލުމަށް ބާއްވަމުން އަންނަ މުބާރާތެކެވެ. އަދި މި މުބާރާތުގެ ސަބަބުން ޒުވާން ބޮޑީބޯޑަރުންނަށް ބޮޑެތި މުބާރާތްތަކުގައި ވާދަކުރާއިރު، ޕްރެޝަރު ހޭންޑަލްކުރުމުގެ ތަޖުރިބާ ލިބިގެންދާނެ ކަމަށް މުބާރާތް އިންތިޒާމުކުރާ ރާއްޖެ ބޮޑީބޯޑިންނުން މައުލޫމާތުދެއެވެ.
