ސިވިލް ސަރވިސް ކޮމިޝަނުން އަންހެނުންނަށް 2 ގޮނޑި ޚާއްސަކުރަންވާނެކަމަށް އެބިލަށް ގެނައި އިސްލާހުގެ މާއްދާ އުނިކޮށް މިންތީގެ ހަމަހަމަކަމަށް އިސްކަންދޭންވާނެކަމަށް ބަޔާންކޮށް ބިލް ފާސްކޮށްފިއެވެ.

ސިވިލް ސަރވިސް ގާނޫނަށް އިސްލާހު ގެނައުމަށް ހުށަހެޅުއްވީ އައްޑޫ މީދޫ ދާއިރާގެ މެމްބަރ ރޮޒައިނާ އާދަމްއެވެ. އެއިސްލާހުގައި ވަނީ ސިވިލް ސަރވިސް ކޮމިޝަންގައި ތިބޭނީ 5 މެމްބަރުންކަމަށެވެ. އަދި ކޮމިޝަންގެ މެމްބަރުންގެ ގޮތުގައި މަދުވެގެން އަންހެން 2 މެމްބަރުން ތިބެންވާނެކަމަށެވެ. މިބިލް މިނިވަން މުއައްސަސާތަކުގެ ކޮމިޓީން ދިރާސާކުރުމަށްފަހު ނިންމާފައިވަނީ އެމާއްދާ އުވާލުމަށެވެ.

މިބިލް ދިރާސާކުރުމަށްފަހު މިނިވަން މުއައްސަސާތަކުގެ ކޮމިޓީން ހުށަހެޅި ރިޕޯޓަށް ތަޅުމުން އިސްލާހު ހުށަހެޅުއްވީ އައްޑޫ މީދޫ ދާއިރާގެ މެމްބަރ ރޮޒައިނާ އާދަމްއެވެ. ރޮޒައިނާ އާދަމް ހުށަހެޅުއްވި އިސްލާހުގައި ވަނީ ސިވިލް ސަރވިސް ކޮމިޝަންގައި ތިބޭނީ 5 މެމްބަރުންކަމަށެވެ. އަދި މެމްބަރުން އައްޔަނުކުރުމުގައި މިންތީގެ ހަމަހަމަކަމަށް އިސްކަންދޭންވާނެކަމަށް ވަނީ ހުށަހަޅުއްވާފައެވެ. މިއިސްލާހު ފާސްވެފައިވަނީ ވޯޓުގައި ބައިވެރިވެވަޑައިގެންނެވި 65 މެމްބަރުންގެ ވޯޓުންނެވެ. އެއް މެމްބަރަކު ވަކިގޮތަކަށް ވޯޓު ނުދެއްވާ އިންނެވިއެވެ.

މިއިސްލާހާއެކު ރިޕޯޓް ފާސްކުރުމަށް ނެގުނު ވޯޓުގައި ބައިވެރިވެވަޑައިގެންނެވި 68 މެމްބަރުންގެ އިއްތިފާގުން ވަނީ މިބިލް ފާސްވެފައެވެ.

މަޖިލީހުން މިހާރު ބިލް ފާސްކޮށްފައިވާ ގޮތަށް ބަލާއިރު ބިލްގެ 41 ވަނަ މާއްދާއަށް ވަނީ އަކުރެއް އިތުރުކޮށްފައެވެ. އެއީ ކުޑަކުދިންނަށް ޖިންސީ ގޯނާކުރުމުގެ ކުށެއް ސާބިތުވެފައިވާ މީހަކަށް ކުޑަކުދިންނާ މުއާމަލާތު ކުރަންޖެހޭ ވަޒީފާއެއް ދީގެން ނުވާނެއެވެ.

މީގެއިތުރުން ޕާމަނަންޓް ސެކްރެޓަރީ ވަޒީފާ އަދާކުރާ މިނިސްޓްރީގެ މިނިސްޓަރަށް ޕާމަނަންޓް ސެކެޓްރީގެ އިތުބާރު ނެތްކަމަށް ބެލެވޭނެ ހާލަތްތައް ބިލްގައި ވަނީ ބަޔާންކޮށްފައެވެ. އެހާލަތްތަކުގެ ތެރޭގައި ހިމެނެނީ:

- އެއިރެއްގައި އޮންނަ ސަރުކާރެއްގެ ސިޔާސަތުތައް ތަންފީޒުކުރުމަށްޓަކައި އެ އޮފީހެއްގެ މެންޑޭޓުގެ ދަށުން ކުރުމަށް މިނިސްޓަރު ކަނޑައަޅާ މަސްއޫލިއްޔަތުތައް އަދާކުރުމަށް، މަގުބޫލު ސަބަބަކާ ނުލައި އުޒުރުވެރިވުން

- ޕާމަނަންޓް ސެކެރެޓަރީގެ ހައިސިއްޔަތުން އަދާކުރަންޖެހޭ މަސްއޫލިއްޔަތުތައް ކަމުގައި އޭނާގެ ވަޒީފާ ބަޔާނުގައި ކަނޑައަޅާފައިވާ މަސްއޫލިއްޔަތުތައް އަދާކުރުމަށް މަގުބޫލު ސަބަބަކާ ނުލައި އުޒުރުވެރިވުން

- ޕާމަނަންޓް ސެކެޓްރީގެ ހައިސިއްޔަތުން އަދާކުރަންޖެހޭ މަސްއޫލިއްޔަތާ ތަޢާރަޒްވާ ފަދަ އަމިއްލަ މަސްލަހަތެއް ނުވަތަ ފައިދާއެއް ނުވަތަ މަންފާއެއް އޮތްކަމެއްގައި ޝާމިލްވުން

މީގެއިތުރުން ސެކެރެޓަރީ ޖެނެރަލް ވަޒީފާ އަދާކުރާ ލޯކަލް ކައުންސިލަށް ސެކްރެޓަރީ ޖެނެރަލްގެ އިތުބާރު ނެތް ކަމަށް ބެލެވޭނެ ހާލަތްތަކެއްވެސް ބިލްގައި ވަނީ ބަޔާންކޮށްފައެވެ. އެހާލަތްތަކަކީ:

- އެއިރެއްގައި އޮންނަ ކައުންސިލްގެ ސިޔާސަތުތައް ތަންފީޒުކުރުމަށްޓަކައި ކައުންސިލުން ކަނޑައަޅާ މަސްއޫލިއްޔަތުތައް އަދާކުރުމަށް، މަގުބޫލު ސަބަކަކާ ނުލައި އުޒުވެރިވުން

- ސެކެރެޓަރީ ޖެނެރަލްގެ ހައިސިއްޔަތުން އަދާކުރަންޖެހޭ މަސްއޫލިއްޔަތުތައް ކަމުގައި އޭނާގެ ވަޒީފާ ބަޔާނުގައި ކަނޑައަޅާފައިވާ މަސްއޫލިއްޔަތުތައް އަދާކުރުމަށް މަގުބޫލު ސަބަކާ ނުލައި އުޒުރުވެރިވުން

- ސެކްރެޓަރީ ޖެނެރަލްގެ ހައިސިއްޔަތުން އަދާކުރަންޖެހޭ މަސްއޫލިއްޔަތާއި ތަޢާރަޒްވާފަދަ އަމިއްލަ މަސްލަހަތެއް ނުވަތަ ފައިދާއެއް ނުވަތަ މަންފާއެއް އޮތް ކަމެއްގައި ޝާމިލްވުން.